Read Ateso Esekiel 32 Bible Online

Esekiel 32 - Ateso bible

Esekiel 32

¹Kosodi kanen kokaru lokitomonet kaarei, kolap lokitomonet kaarei, kapaaran nasodit naka elap, kobu akirot naka EJAKAIT mama ajai ebe:

² “Okoku loka etuŋanan, kokuudianik Parao ekabaka loko Misiri, kolimok ŋes ebe: Kitupusitoi kiŋatuny yenika atekerin: Kwabo iputos kapiu naejai aŋololin; Ido ibeluni kocorinikon, Iticani akipi kakejekon, Komunaa icorinikec.

³ Inera kwanata Ejakait EDEKE ebe: Kapesikini jo ekaboi Katukot naka ituŋa luipu; Kibwosunete kekaboi.

⁴ Kenyeini jo kaneeoŋit, Kacakar kiŋa ais, Ketodoikini jo akweny kere nuka apak, Kesimonikinia da itiaŋ luka alwap kere.

⁵ Aloikini akonikiriŋ oroŋan, Elelebi aditon kamukururukon.

⁶Ido ecocoi akwap kaokotokon nuiduio Kiton oroŋan; Ilelebi alelesia kere.

⁷ Kasodi kadau aitudeŋ jo, arapari akuj, Etumutonori aacer; Arapakini edou akoloŋ, Kwabo mam elap ecauni.

⁸Ebala Ejakait EDEKE ebe, Etumutonori italai kere Luecaete lukokujukon, Etumutonori akonikwap.

⁹“Esiyalononoi itauon luka ituŋa luipu, naetodolio amudiariokon toma atekerin, akwapin numam lem ijeni.

¹⁰ Eebo, esitirirai ituŋa luipu kanukon, ekuriakaros noi ikabakanakec kanukon, naeiliilia ekakileŋ kakonyenekec; emaranete ŋinipak, ŋolituŋanan kanuka akeijar, kapaaran naka aibirorikon.

¹¹ Naarai inera kwanata Ejakait EDEKE ebe: Kidolokini jo ekileŋ loka ekabaka loko Babulon.

¹² Ebirori ekonikodet kikileŋa luka lukapedor; eraas kere lusogim luka atekerin. Eŋasete eitur loko Misiri, emudiario ekodeteke kere.

¹³ Amudiari da iketiaŋ kere Lueapias akipi nuipu; Ido mam bobo iticanete akeje nuka ituŋanan, Karaida imageger luka itiaŋ aitican kes.

¹⁴Ebala Ejakait EDEKE ebe, Kasodi aisiiriir akecekipi, Ka aitelel icorinikec kwape kakinyet.

¹⁵ Naetisilio akwap nako Misiri, Ka aitiswap akwap naetwaniarit ailelebake, Naadanyia kere luiboiete kotoma, Kosodete do ejenunete ebe arai eoŋ EJAKAIT.

¹⁶ Ebala Ejakait EDEKE ebe, Na ŋes akuudian naekuudianete; ekuudianete apesur nuka atekerin; ekuudianikinete Misiri ka ekekodet kere.”

¹⁷Kosodi kanen kokaru lokitomonet kaarei, kapaaran nakitomonet kakany naka elap, kobu akirot naka EJAKAIT mama ajai ebe:

¹⁸ “Okoku loka etuŋanan, komonyak ekodet loko Misiri, kibironok kwap, ŋes nepepe ka apesur nuka atekerin nuajenas, kiton atutubeta nukokwap nuka akwap, nepepe kaŋul kaluijesaros Aipany:

¹⁹ ‘Iŋai ca ideparit kajokis? Kijesar, kiperikin nepepe kalumam ekepitai.’

²⁰Ibirokinos kidiŋikec luearitai kekileŋ: ejaikin okileŋ: kiriasi ŋes ka ekekodet kere.

²¹ Ineras kaŋes lukagogoŋ lukotoma lukapedor kokidiŋ Okatwak nepepe kaŋul kalukeganitok ebe: ‘Ejesaros, aperoto aŋatata, lumam ekepitai, luearitai kekileŋ.’

²²“Ejai nen Asur ka aketukot kere; irimorito akeilin: kes kere earitai, ebirokin ekileŋ.

²³ Ejaas akeceilin toma atutubeta nukokwap nuka Aipany, irimorit aketukot akeilit: kes kere earitai, ebirokin ekileŋ, luayaunete etasuro akwap naka ikajarak.

²⁴ “Ejai nen Elam ka ekekodet kere irimorit akeilit: kes kere earitai, ebirokin ekileŋ, luejesaros mam ekepitai toma atutubeta nukokwap nuka akwap, luayaunete etasuro akwap naka ikajarak, ibwokito ikeceleic nepepe kaŋul kaluijesaros Aipany.

²⁵Apesikis ŋes aperis kokidiŋ kaluearitai nepepe kekekodet kere; irimorito ŋes akeilin: kes kere lumam ekepitai, lueari ekileŋ; naarai eyaunio etasurokec akwap naka ikajarak, ibwokito ikeceleic nepepe kaŋul kaluijesaros Aipany; ibwaikinitai kidiŋikec kaluearitai.

²⁶ “Ejai nen Mesee, ka Tubal, ka ekecekodet kere; irimorito kes akeceilin: kes kere lumam ekepitai lueari ekileŋ: naarai ayaunete etasurokec akwap naka ikajarak.

²⁷ Ido mam eperete nepepe kalukapedor luebiroros lumam ekepitai luejesaros Okatwak ekapito lujiisikec, ibwaikinito ikileŋakec aicoloŋ kakwesikec, ejaas numam adolitekec akojokec; naarai kejai etasuro loka lukapedor kakwap naka ikajarak.

²⁸Konye kibilakinio kidiŋ kalumam ekepitai, iperi nepepe kaŋul kalueari ekileŋ.

²⁹ “Ejai nen Edom, ikekabakan ka ikekapolok kere, luibwaikinitai kakecepedor nepepe kaŋul kalueari ekileŋ: eperete nepepe kalumam ekepitai, ido nepepe kaŋul kaluijesaros Aipany.

³⁰ “Ejaas nen ikapolok luka agolitomei, kes kere, ka Isidonin kere, luejesaros nepepe kaluearitai; karaida keyaunete etasuro kanuka agogoŋukec, irumete ileic; eperete mam ekepitai nepepe kaŋul kalueari ekileŋ; ibwokito ikeceleic nepepe kaŋul kaluijesaros Aipany.

³¹ “Ebala Ejakait EDEKE ebe, Eanyuni kes Parao, elakar kanuka ekekodet kere: Parao ka akejore kere lueari ekileŋ.

³²Ebala Ejakait EDEKE ebe, Naarai ebwaik eketasuro akwap naka ikajatak: iperikinio Parao ka ekekodet kere kidiŋ kalumam ekepitai, nepepe kaŋul kalueari ekileŋ.”