Read Ateso Esekiel 33 Bible Online

Esekiel 33 - Ateso bible

Esekiel 33

¹Kobu akirot naka EJAKAIT mama ajai ebe:

² “Okoku loka etuŋanan, kiner kidwe luka ikonituŋa, kolimok kes ebe, Naayaunia ekileŋ akwap, arai kelemut ituŋa luka akwap kaŋin ituŋanan idiopet kotomakec, kodakakis ŋes araun ekedaranikec:

³arai kekutaki arupepe naeanyunia ekileŋ ebunokini akwap, ka aikwenyar ituŋa;

⁴ kosodi ŋin yeniirari eporoto loka arupepe, komam ecamuni aikwenyario, arai kebu ekileŋ alemar ŋes, ejaunete aokotoke akouke kilopet.

⁵Abu kiira eporoto loka arupepe, komam ecamunit aikwenyario; ejaunete aokotoke kamakeŋ. Konye arai kecamunit aikwenyario tikituku akeijar.

⁶ Konye arai keanyu ekedaran ekileŋ ebuni, komam ekutakini arupepe, komam ituŋa ikwenyario, kobu do ekileŋ, kolema ituŋanan kamakec; elemario kanumam adoliteke, konye etepeseni akeokot kama kekedaran.

⁷ “Aso do jo, okoku loka etuŋanan, kadakak jo araun ekedaran loka ekek loka Isirael; aso kiira akirot naka aitukuka, kikwenya kes kanukaŋ.

⁸ Arai kalimok ikaronon ebe, Ijo ikaronon, abeit itwani, komam jo inera aikwenyar ikaronon ii korotoke; etwanikini ikaronon ii numam adoliteke, konye etepeseni akeokot kamakon.

⁹ Konye arai kikwenya ijo ikaronon aibelokin korotoke, komam ŋes ibelokini korotoke; etwanikini numam adoliteke, konye iyuuni ijo akoniijar.

¹⁰ “Ka jo da, okoku loka etuŋanan, kolimok ekek loka Isirael ebe: Inerasi kwanata ebe, ‘Ejaas adiakanaretakosi ka aronisiokosi kasio, kiin kakes; kikwaikini do ai kijari?’

¹¹ Kolimok kes ebe, Ebala Ejakait EDEKE ebe, Kwape ajaria, Mam esiyalamikinit atwanare naka ikaronon; konye kibelokin ikaronon korotoke kojar: kibelokinos, kibelokinos kotoma orotinikus lueroko; kanukinyo itwakiata, ijo ekek loka Isirael?

¹² Ijo da, okoku loka etuŋanan, kolimok idwe luka ikonituŋa ebe, Adolit naka ikadoliton mam eyuuni ŋes kapaaran naka adiakarike; ido da aronis naka ikaronon mam isibirori kapaaran naibelokinor anyoun karonisike: kwabo mam epedori ikadoliton aijar kanuka adoliteke kapaaran naediakaria.

¹³ Arai kalimok ikadoliton ebe abeit ejari; arai kemunokin akedolit, kiswama numam adolit, mam iitunio adio kaswamisioke nuadolito; konye etwanikini numam adoliteke nueswamat.

¹⁴Ido bobo, arai kalimok ikaronon ebe, ‘Abeit itwani’; arai kibelokin ainyein akeronis, ka aswam da nuibusakinito ka nuedolito;

¹⁵ Arai kinyakaki aititiŋet, kotac lukekokwarit, kolosenene kokisila luka aijar, komam iswamai numam adolit; abeit ejari, mam etwani.

¹⁶ Mam iitunio adio karonisioke nueswamat: eswamat nuibusakinito nuedolito; abeit ejari.

¹⁷“Konye ebalas idwe luka ikonituŋa ebe, ‘Mam eriana erot loka EJAKAIT’: kwabo ikecerotin kes mam erianas.

¹⁸Naibelokinor ikadoliton ainyein akedolit, kiswama numam adolit, etwanikini ŋun.

¹⁹Naibelokinor ikaronon ainyein akeronis, kiswama nuibusakinito nuedolito, ejarakini ŋun.

²⁰ Konye ibalas yesi ebe, ‘Mam eriana erot loka EJAKAIT.’ Wu jo ekek loka Isirael, katubokini yes, ŋinituŋanan kwape ejaatar ikerotin.”

²¹ Kosodi kanen, kokaru lokitomonet kaarei loka aijoreoriokosi, kolap lokitomonet, kapaaran nakikanyet naka elap, kobu etuŋanan mama ajai lokekui koYerusaletn, ebala ebe, “Ebiror ere.”

²² Kabunok akan naka EJAKAIT eboŋ, eroko lokekui ebuno; kesiwooŋa akaituk, kiton nekadolokinio ŋol tupuruc; kooŋar akaituk kwabo mam bobo abaŋaana.

²³Kobu akirot naka EJAKAIT mama ajai ebe:

²⁴ “Okoku loka etuŋanan, luejaas aiboisio nu nuiswapito nuka akwap naka Isirael inerenenasi ebe, ‘Arai Aburaam ediopet, kirum akwap; konye oni kirai luipu; kiinakinitai akwap araut alrumet.’

²⁵ Aso kolimok kes ebe, Inera kwanata Ejakait EDEKE ebe: Inyamete luejaas aokot, iteluorete akusikonye mama ejaas aputosiakus, ibukorete da aokot; irumete tope yesi akwap?

²⁶Icatunito kokileŋakus, iswamaete nuketal, komunaaros ŋolituŋanan kaberu naka eidunyeteke: irumete tope yesi akwap?

²⁷ Ilimokini kes kwanata ebe, Inera kwanata Ejakait EDEKE ebe: Kwape ajaria, abeit etwakete ŋul kere luejaas aiboisio nuiswapito kekileŋ, ka ŋin da yenejai kiŋa ais akorakini ŋes konyama itiaŋ; ka ŋul da luejaas abwasin nuegogoŋ ka abuai da etwakete atular.

²⁸ Etarauni akwap asilio ka aumokinet, enaŋi eitur loka akepedor; esilioros iroŋan luka Isirael, komam ituŋanan yenitori nen.

²⁹Kosodete do ejenunete ebe arai eoŋ EJAKAIT, naetuluoria akwap asilio ka aumokinet, kanuka italesiakec kere lueswamata.

³⁰ “Ka jo da, okoku loka etuŋanan, kinerasi jo idwe luka ikonituŋa karwatatin, kokekia da luka itogoi, kineranakinos, ŋinituŋanan konaceke, ebe, ‘Kaloto, keŋaiŋait, kapuputu akirot naelomunit kama ejai EJAKAIT.’

³¹ Epote neijai kwape eponiata ituŋa, iboikinos kakonyenekon kwape ikatuŋa, epupunete akakiro, konye mam iswamaete: naarai itodikinete amin naepol kaŋajepakec, konye ekecetau etupari aimakirakec.

³² Ido koany, irai kamakec ekosio loejok noi loka ekayoot loitalakarit noi, loejeni airam jokan; naarai epupunete akonikiro, konye mam iswamaete.

³³Naitodolikinere ŋun, (koany itodolikinio), kosodete do ejenunete ebe ajai enabi kidiŋikec.”