Read Ateso Esekiel 37 Bible Online

Esekiel 37 - Ateso bible

Esekiel 37

¹ Kojau akan naka EJAKAIT kaeoŋ, kayaŋa kina komoyo loka EJAKAIT, kebwaik aditot naeleleba akojo.

²Ketotor airimor kes: ido koany, epu noi kaditot; ido koany, kookito de.

³ Kalimok eoŋ ebe, “Okoku loka etuŋanan, epedorete tope akojo nu aijar?” Kaboŋok ebe, “Wu Ejakait EDEKE, jo ijeni.”

⁴ Kalimok eoŋ bobo ebe, “Kodwarak akojo nu, kolimok ebe, Yes akojo nuiwokito, kiirasi akirot naka EJAKAIT.

⁵ Inera kwanata Ejakait EDEKE akojo nu ebe: Koany, ketolomikini yes eiyeŋane, ido ijarete.

⁶ Ebwaikini aputio mamakus, ayauni akiriŋ mamakus, karapakinete amuny, akutakini eiyaŋane, ido ijarete; ijenunete do ebe arai eoŋ EJAKAIT.”

⁷Aso kadwara kwape kecorakinitere: napadwaria kojai airuruma, ido koany, komaran akwap, kiriamanakinos akojo, akoit mama ejai akoit naceke.

⁸Kaany, ido koany, kejaas aputio mamakec, kolom akiriŋ, korapak amuny kokuju: konye kemamei eiyeŋane kotomakec.

⁹Kosodi kalimok eoŋ ebe, “Kodwarak eiyeŋane, kodwar, okoku loka etuŋanan, kolimok eiyeŋane ebe, Inera kwanata Ejakait EDEKE ebe: Kobia, ijo eiyeŋane, kokwamin iwoŋon, kiyeŋak lu luearitai, kojarata.”

¹⁰ Aso kadwara kwape kecorakinia, koloma eiyeŋane tomakec, kojarata, kobwaata kakecekeje, ajore naailiili noi.

¹¹ Kosodi kaIimok eoŋ ebe, “Okoku loka etuŋanan, eraas akojo nu ekek kere loka Isirael. Koany, ebalas ebe, ‘Aokoto akojowok, aolio amunowok: kipiari cut.’

¹² Kanuka ŋun kodwar, kolimok kes ebe, Inera kwanata Ejakait EDEKE ebe: Koany, apukori ailinakus, ketolomunete kailinakus, yes ikatuŋa; kayaunete kiton akwap naka Isirael.

¹³Ido ijenunete ebe arai eoŋ EJAKAIT, kadau apukor ailinakus, ka aitolomun kailinakus, yes ikatuŋa.

¹⁴ Kepikakinete yes ekamoyo, ijarete, kebwaikinete akwapukus. Ebala Ejakait EDEKE ebe, Ijenunete do ebe Eoŋ EJAKAIT ener, eswama da.”

¹⁵Kobu bobo akirot naka EJAKAIT mama ajai ebe,

¹⁶ “Ka jo da, okoku loka etuŋanan, kolem ebela ediopet, kiwadik toma obela ebe, ‘Loka Yuda ka idwe luka Isirael ipaupake’; kosodi kolem ecebela, kiwadik toma obela, ‘Loka Yosep, ebela loka Epuraim, loka ekek kere loka Isirael ipaupake.’

¹⁷Aso kimorikik nepepe araun ediopebela, korau ediopet kakanikon.

¹⁸ Kosodete naineratar idwe luka ikonituŋa kajo, ebe, ‘Kitejenikinai apolou naka ŋun?’

¹⁹ Kolimok kes ebe, Inera kwanata Ejakait EDEKE ebe: Koany, alemuni ebela loka Yosep, loejai akan naka Epuraim, ka atekerin nuka Isirael ipaupake; ebwaikini kes ebela loka Yuda, etarauni kes ebela ediopet, eraunete kesi ediopet kakanika.

²⁰ Ibelai da luiwadikat ejaunete akanikon kakonyenekec.

²¹ Kolimok kes ebe, Inera kwanata Ejakait EDEKE ebe: Koany, alemuni idwe luka Isirael kokidiŋ atekerin nualosito, katukonok kowaitin kere, kayau kes toma akwapukec.

²² Ido etuluori ateker adiopet kakwap, koroŋan luka Isirael; ekabaka ediopet eraun ekecekabaka kere: mam bobo eraunos atekerin aarei, kwabo mam etiakio cut bobo araun ajakanuto aarei.

²³ Ido mam emunaaros bobo kanuka aputosiakec, karaida italesiakec, karaida adiakanaretakec kere: konye etajari kes kotoma aijerukanutukec kere, naeswamaeneniata nukaronok, etesegi kes: aso eraunete do ikatuŋa, eoŋ da araun Ekecedeke.

²⁴ “Daudi ekabulesit ŋes erauni ekabakakec; edumunete ekecokon ediopet. Ido elosenenete kotubesiaka, ka airic ikakisila, iswamaenenete da.

²⁵ Ido iboikinos akwap nakolo ainakini Yakob ekabulesit, naeboienenoto lukapapaakus; aso iboikinos nen, kes ka ikecedwe, ka idwe luka idwekec, ikar kere: Daudi da ekabulesit ŋes eraenena ekapolonikec ikar kere.

²⁶ Ido bobo etutuki kakes aitutuket naka ainapakin: eraun aitutuket namam enaŋi kamakec: esirereŋi kes, etupui kes, ebwaikini akaibois nakalaunan kidiŋikec ikar kere.

²⁷ Ejaenena da ekawema kakes: eoŋ da araun Ekecedeke, kes da eraunos ikatuŋa.

²⁸Ejenunete do atekerin ebe arai eoŋ EJAKAIT loetalaunit Isirael, naejaenenar akaibois nakalaunan kidiŋikec ikar kere.”