Read Ateso Esekiel 39 Bible Online

Esekiel 39 - Ateso bible

Esekiel 39

¹ “Ka jo da, okoku loka etuŋanan, kodwarak Gog, kiner atiar, Inera kwanata Ejakait EDEKE ebe: Koany, arai lokasurupikon, ijo Gog, ekapolon loka Ros, ka Mesek, ka Tubal.

²Kebelokini, kameari, aitodokar anyoun kowaitin lukosaŋe loka agolitomei; kayauni oroŋan luka Isirael.

³Enomari akonikabwa kotoma akanikon nakokediany, etodoi da imaliakon kakanikon nakoteten.

⁴ Ibirokini oroŋan luka Isirael, ijo ka ikonikodeta kere, ka ituŋa da luejaas kajo: kakorakini jo anyamio mama ejaas akweny, nuikibelito nuka iponesio kere, ido kaneejaas itiaŋ luka ais.

⁵Ibirokini ais; naarai ebala Ejakait EDEKE ebe, Eoŋ ener.

⁶ Ido ejukari akim Magog, ka ŋul da kere luiboiete kapujana iyamakina: ejenunete do ebe arai eoŋ EJAKAIT.

⁷ “Etejenari ekakiror lokalaunan kokidiŋ kikatuŋa Isirael; kwabo mam acamakini ekakiror lokalaunan amoromoroo bobo: ejenunete da atekerin ebe arai eoŋ EJAKAIT, Lokalaunan loka Isirael.

⁸ Ebala Ejakait EDEKE ebe, Koany, ebunit, ido iswamao; ŋin ŋes apaaran naabu kener.

⁹“Elomunete ŋul luiboiete koreria luka Isirael, inokokinete akimian kalujiis, icweikinete kes, ibukwi ka iupalin, akabwai ka imalia, ibelai luka akanin ka akwaras, inokokinete akimian ikar ikanykaarei.

¹⁰ Mam eraraete akito okitui, kwabo mam ejepete kamagoron; naarai inokokinete akimian kalujiis. Ebala Ejakait EDEKE ebe, Enaŋete kesi luaŋasito kes, iruruete da lueruruete kes.

¹¹“Kosodi kanen kapaaran kaŋin, ainakini Gog aibois nakidaanakina kotoma Isirael, aditot naka ŋul kaluitorete kari nakokide naka aŋolol: ido itikokini ŋul luitorere: idaanakinete nen Gog ka iketuŋa kere: emaikinete Aditot naka Kamon-gog. [7]

¹² Edauni ekek loka Isirael ilapio ikanykaare idaete kes tetere itesegarete akwap.

¹³ Ebala Ejakait EDEKE ebe, Eebo idaete ituŋa luka akwap; eraun aitopoloor kamakec, apaaran naetopolooror.

¹⁴Etiakarete ituŋa luitorenenete akwap aida ŋul luesalito kakwap, tetere itesegarete akwap: ketuboros ilapio ikanykaarei emoete.

¹⁵Naitorioto toma akwap, naeanyunia ituŋanan akoit naka ituŋanan, esipokini nen aanyunet, aitodol neidaikiniata ikedaak Aditot naka Kamon-gog.

¹⁶Eraun Kamona da ekiror loka ere. Kwaŋin itesegariata akwap.

¹⁷ “Ka jo, da, okoku loka etuŋanan, inera kwanata Ejakait EDEKE ebe: Kolimok akweny nuka iponesio kere, ka ŋolitiaŋ loka ais ebe, ‘Kotukunos, kopotu; kotukokinos owaitin kere neejai akasubanit naetemonokinit yes, asubanit naepol koroŋan luka Isirael, iŋinyete akiriŋ, idiŋaete da aokot.

¹⁸ Iŋinyete awat nuka ikagogoŋok, idiŋaete da aokot nuka ikapolok luka akwap, nuka imerekekin, ka imerekekin ludidik, ka nuka akinei, ka imoŋin lutoba, kes kere luetarioko luko Basan.

¹⁹Iŋinyete atarion kimonikinos, idiŋaete da aokot komerikinos, kasubanit naetemokinit yes.

²⁰ Ebala Ejakait EDEKE ebe, Imonikinos komesaka ibalasin ka ikebwanenok, ka lukirigin, ka ituŋa da kere lukajiok.’

²¹ “Ido ebwaikini akaibuses toma atekerin; eanyunete atekerin kere ekatube loetodolik, ka akakan naedokok kes.

²²Aso ejenuni ekek loka Isirael ebe arai eoŋ EJAKAIT Ekecedeke, agear kapaaran kaŋin ka aiyatanakin da.

²³ Ejenunete atekerin ebe ejoreorio ekek loka Isirael kanumam adolitekec; naarai apotu kodiakasi kamakaŋ, kebwa akakonyen kamakec: aso kainak kes akan naka lukasurupokec, kibiroros kesi kere kekileŋ.

²⁴ Kwape ajaatar amamus ailakec, ido kwape ajaar adiakarikec, kwape kwaŋin abu keswamak kes; kebwa akakonyen kamakec.

²⁵ “Kanuka ŋun inera kwanata Ejakait EDEKE ebe: Enyakuni kwana aijoreorio naka Yakob, etimi ekek kere loka Isirael; ido kerumi ekokote kanuka ekakiror lokalaunan.

²⁶ Imurwokinete ileicikec, ka adiakanaretakec kere nuadiakasi kamakaŋ, naiboikinotor akwapukec iyamakina, kwabo emamuunete luitukurianete kes,

²⁷ naadaunia ainyakun kes kotoma atekerin, ka atukonokin kotoma akwapin nuka lukasurupokec, naetalaunor kotomakec kakonyen nuka atekerin nuipu.

²⁸ Ejenunete do ebe arai eoŋ EJAKAIT Ekecedeke, naarai abu kainak kes aijoreorio atekerin, ido atukokinit kes kiton akwapukec, Kwabo mam bobo enyeini idio kakesi kere kaŋina.

²⁹ Ebala Ejakait EDEKE ebe, Mam bobo ebwai akakonyen kamakec: naabukokinia ekek loka Isirael Ekamoyo.”