Read Ateso Esekiel 40 Bible Online

Esekiel 40 - Ateso bible

Esekiel 40

¹ Kokaru loka akaisaarei ka lukany loka aijoreoriokosi, kageunet naka ekaru, kapaaran nakitomonet naka elap, kokaru lokitomonet kaoŋon akaulo kaipikorio naka ere, kapaaran kaŋipe kaŋin, kojau akan naka EJAKAIT keoŋ, kayaŋau ne.

² Kaitapoeta nuka Edeke kayau akwap naka Isirael, kebwaik eoŋ oroŋat loeoj noi, kujuke kojai ibore yenesubit bala ere kari naka Eŋalakimak.

³ Kayaŋau eoŋ nen, ido koany, kojai etuŋanan, kosubite atakanuke bala atakanu naka aisinit, loetiŋit auno naka abirai kakanike, ka agada nakitemis; kobwo korute.

⁴ Kalimok eoŋ etuŋanan ŋol ebe, “Okoku loka etuŋanan, koany kakonikonye, kiira da kakoniki, kibwaik ekonitau kere nuketodikini; naarai kiyaunio ne tetere ketodikini jo kes; nuianyuni kere kitejenik ekek loka Isirael.”

⁵ Ido koany, kojai arwatat kiŋa naka etogo kowaitin kere, ido kitiŋite etuŋanan egada nakitemis naaoj ikubitin ikanykape, ŋolikubit [8] aoj ekubit ka alalau naka etau loka akan: kitem ŋesi abures naka arwatat, agada adiopet; ka amukururuke, agada adiopet.

⁶Kosodi kobu orute loeseseni kide, kodoka kadoketake; kitem okek loka erute, aburesuke agada adiopet: ka ekek ece aburesuke agada adiopet.

⁷ Aoj ŋinigola nakidaret agada adiopet, alal agada adiopet; apak da kokidiŋ kagolai nukidaret ikubitin ikany; ido ekek loka erute aapie kagola nalomaret orute atereikina ketogo, agada adiopet.

⁸Kitem da agola nalomaret orute atereikina ketogo, agada adiopet.

⁹Kosodi kitem agola nalomaret orute, ikubitin ikanykauni; ka ategerioke ikubitin iarei; kojai agola nalomaret orute atereikina ketogo.

¹⁰ Emwaasi agolai nuka erute kari nakokide auni epuwai, ka auni da epuwai; kwa auni araas nuka aitemis adiopet: ategerio da nuka aitemis adiopet epuwai, ka epuwai da.

¹¹Kitem alalau neeŋaario erute, ikubitin itomon; aojau da naka erute, ikubitin itomon ka luuni;

¹²ajai apak koiŋaren naka agolai, ekubit ediopet epuwai, ka apak ekubit ediopet epuwai da; emwaasi agolai ikubitin ikanykape epuwai, ka ikubitin ikanykape epuwai da.

¹³Kitem erute anyoun katunuru naka agola adiopet, kiton atunuru naka ace, alalau naka ikubitin akaisaarei ka lukany; kiteosi ekek ka ekek.

¹⁴ Kitem neelomarere da, ikubitin akaisaarei, ido kirimorite alaro neelomarere orute.

¹⁵Anyoun koiŋaren naka erute kiton to naka agola nalomaret nakotoma, emwaasi ikubitin akaisakany.

¹⁶Ajaas agolai apedon nuagolokino, kejaas da toma ategerio toma orute airimor, kwape kwaŋin acuneta: kojaas apedon toma ammor: kojaas da idukudukun ategerio.

¹⁷ Kosodi kayau eoŋ alaro nakokiŋa, ido koany, ajaas agolai ka neitutuitoi naeswamakinitai alaro airimor: kojaas agolai akaisauni neitutuitoi.

¹⁸Kojai neitutuitoi kawai naka irutei kosesenas aojau naka irutei, neitutuitoi nakokwap.

¹⁹Kosodi kitem alalau anyoun koiŋaren kerute lokokwap kiton kiŋaren naka alaro nakotoma kokiŋa ikubitin akwatat, kide ka agolitomei da.

²⁰Ka erute loka alaro nakokiŋa loeseseni agolitomei kitem aojauke ka alalauke.

²¹Emwaasi agolaike auni epuwai, ka auni da epuwai, ategerioke ka acunetake koriakasi kaitemis naka erute losodit: aojauke ikubitin akaisakany, alalauke ikubitin akaisaarei ka lukany.

²²Apedonoke, ka acunetake, ka idukudukunuke, koriakasi aitemis naka erute loeseseni kide: kojaas adoketa akanykaarei adokaria; kojaas da acunetake kiŋarenikec.

²³Kojai erute alaro nakotoma kosesenas erute ece, kari naka agolitomei, kari da nakokide; kitem ageun korute kiton orute, ikubitin akwatat.

²⁴Keŋarenik eoŋ abear eŋalakimak, ido koany, erute loka eŋalakimak: kitem ategerioke ka acunetake kwape ajaatar aitemisio kwa.

²⁵ Kojaas apedon tomake, ido toma acunetake airimor, kwape apedon kwa: aojauke ikubitin akaisakany, ka alalauke da ikubitin akaisaarei ka lukany.

²⁶Kojaas adoketa akanykaarei adokaria, kojaas acunetake kiŋarenikec; kojaas idukudukun, ediopet epuwai, ediopet da epuwai, kotoma ategerioke.

²⁷Kojai erute alaro nakotoma kari naka eŋalakimak: kitem ageun korute kiton orute kari naka eŋalakimak, ikubitin akwatat.

²⁸Kosodi kayau alaro nakotoma korute loka eŋalakimak: kitem erute loka eŋalakimak kwape ajaatar aitemisio kwa.

²⁹ Ka agolaike, ka ategerioke, ka acunetake, kwape ajaatar aitemisio kwa: kojaas apedon tomake ka toma acunetake da airimor: aojauke ikubitin akaisakany, alalauke da ikubitin akaisaarei ka lukany.

³⁰Kojaas acuneta airimor, aojaukec ikubitin akaisaarei kalukany, alalaukec da ikubitin ikany.

³¹ Atereikina acunetake kalaro nakokiŋa; kojaas idukudukun kategerioke: needokarere kojaas adoketa akanykauni.

³²Kayau alaro nakotoma naeseseni kide: kitem erute kwape ajaatar aitemisio kwa:

³³agolaike, ka ategerioke, ka acunetake, kwape ajaatar aitemisio kwa: ido ajaas apedon tomake, toma acunetake da airimor: aojauke ikubitin akaisakany, alalauke ikubitin akaisaarei ka lukany.

³⁴Atereikina acunetake kalaro nakokiŋa: kojaas idukudukun kategerioke, epuwai, ka epuwai da: needokarere kojaas adoketa akanykauni.

³⁵Kayau orute loka agolitomei: kitem ŋes kwape ajaatar aitemisio kwa.

³⁶Agolaike, ka ategerioke, ka acunetake; kojaas apedon tomake airimor: aojauke ikubitin akaisakany, alalauke ikubitin akaisaarei ka lukany.

³⁷Atereikina acunetake kalaro nakokiŋa; kojaas idukudukun kategerioke, epuwai, ka epuwai da; needokarere kojaas adoketa akanykauni.

³⁸ Kojai agola nepepe kekekike eapie ategerio korutei; nen kilosenenata ainakinet naicweio.

³⁹ Agola nalomaret naka erute ajaas imesan iarei epuwai, ka imesan da iarei epuwai, aarenena ainakinet naicweio, ka ainakinet naka adiakaret, ka ainakinet da naka aronis.

⁴⁰Ajaas imesan iarei epuwai kokiŋa, needokarere kalomaret naka erute loka agolitomei; ajaas da imesan iarei epuwai neebeit agola nalomaret orute.

⁴¹Ajaas imesan iwoŋon epuwai, ka imesan da iwoŋon epuwai eapias kerute; imesan ikanykauni luearanakinio asuban.

⁴²Ajaas imesan iwoŋon luka ainakinet naicweio, luka amoru nuikec, aojaukec ekubit ediopet ka atutubet, alalaukec ekubit ediopet ka atutubet, amukururukec ekubit ediopet; luebwaanakinete iboro luaaris ainakinet naicweio ka asubanit.

⁴³Itemokinitoi igolun lueojak alalau naka etau loka akan kotoma airimor: kojai akiriŋ naka ainakinet omesan.

⁴⁴ Ido kiŋa kerute lokotoma ajaas agolai kanuka ikayook toma alaro nakotoma, naajai osiep loka erute loka agolitomei; kosesenete eŋalakimak: adiopet osiep loka erute lokokide koseseni agolitomei.

⁴⁵ Kosodi ŋesi atemar eoŋ atiar, “Agola na, naeseseni eŋalakimak, erai naka isasedotin, ikedarak luidarete etogo.

⁴⁶ Agola naeseseni agolitomei erai naka isasedotin, ikedarak luidarete etem: kes idwe luka Sadok, lukotoma odwe luka Lebi luikunyakinete aijaanakin EJAKAIT.”

⁴⁷Kitem alaro, aojauke ikubitin akwatat, alalauke ikubitin akwatat, koriana kowaitin kere; kojai etem kiŋaren ketogo.

⁴⁸Kosodi kayau agola nalomaret togo, kitem ŋinitegerioit naka agola nalomaret, ikubitin ikany epuwai, ka ikubitin ikany da epuwai: alalau naka erute ikubitin iuni epuwai, ka ikubitin iuni da epuwai.

⁴⁹ Aojau naka agola nalomaret ikubitin akaisaarei, alalauke ikubitin itomon kadiopet; eapie kadoketa nuedokanarere: ajaas ipirin eapias kategerio, ediopet epuwai, ka ece da epuwai.