Read Ateso Esekiel 43 Bible Online

Esekiel 43 - Ateso bible

Esekiel 43

¹ Kosodi kokau kayau orute, ŋes erute loeseseni kide.

² Ido koany, kobu aibuses naka Edeke loka Isirael korot lokokide: eporotoke da kwape eporoto loka akipi nuipu; kiliyau akwap kanuka akeibuses.

³ Kosubite bala atakanu naka aitapoet naanyunit, bala aitapoet naabu kaany naabunio ŋesi amudiar ere: ekote aitapoeta bala aitapoet naabu kaany kocor Kebar; kebiror ebuburia.

⁴ Koloma aibuses naka EJAKAIT oyekalu korot loka erute loeseseni kide.

⁵ Kadaka Emoyo eoŋ, kayaŋa kiton alaro nakotoma; ido koany, kileleba aibuses naka EJAKAIT togo.

⁶ Kobwoi etuŋanan kosiepika, keira eporoto loenera keoŋ kotogo.

⁷ Katema eoŋ atiar, “Okoku loka etuŋanan, na ŋes aibois naka eicoloŋoka, ka aibois naka aicaketa nuka akejeka, naeboio kidiŋ ka idwe luka Isirael ikar kere. Kwabo mam bobo idwe luka Isirael emunaarete ekakiror lokalaunan, karaida kes, karaida ikabakanakec, kanuka eporokec, ido kanuka atesin nuka ikabakanakec kotoma aiboisiokec nuiceleleete;

⁸ Kanuka aiduk aririkec naka ekek eiduny karirika, ategerioitikec eiduny kategerioitika, ajai arwatat bon kidiŋ eoŋ ka kes. Amunaasi ekakiror lokalaunan, kanuka italesiakec lueswamaete: kanuka ŋun etanana kes kanuka akanyunyura.

⁹Kwana kolemasi ca kesi eporokec, ka atesina nuka ikabakanakec neelwana kamakaŋ, aso eboienenei kokidiŋikec ikar kere.

¹⁰ “Ijo da okoku loka etuŋanan, kitodik ekek loka Isirael etogo lo, tetere irumete ileic kanuka numam adolitekec: kitemoto aputoke.

¹¹ Ido arai irumete ileic kanuka ŋun kere nueswamata, kitejenik kes asubunet naka etogo, ka aputoke, ka alomaretake, ka alomunetake, ka asubunetake kere, ka aicorakinetake, ka asubunetake kere, ka ikisilake kere, kiwadik kakonyenekec: tetere ericete asubuneteke kere, ka aicorakinetake kere, ka aswam da.

¹² Lo ŋes ekisil loka etogo: kuju aidi naka eroŋat kiton osaŋeke kere airimor eraun nakalaunan noi. Koany, ŋol ŋes ekisil loka etogo.

¹³ “Nu kes aitemisio nuka etem kokubitin: (ekubit ŋes ekubit ka alalau naka etau loka akan:) kwapuke amukurur ekubit, alalauke ekubit, ka atokitoitike airimor aituk atutubet naka ekubit: nen ŋes kwap naka etem.

¹⁴Ageun kokwap naejai kwap kiton amurut nakokwap ikubitin iarei, alalauke ekubit; ido ageun kamurut naedit kiton amurut naepol, ikubitin iwoŋon, alalau da ekubit.

¹⁵Ido etem lokokuju ikubitin iwoŋon, ido ageun kokiala loka etem kiton kuju ejaunos amumwar aoŋon.

¹⁶Aojau naka ekiala loka etem eraun ikubitin itomon kaarei, alalau da ikubitin itomon kaarei, koriakas iwaitinike kere iwoŋon.

¹⁷ Amurut da koriana alalau ka aojau ikubitin itomon ka luoŋon; atokitoitike eraun atutubet naka ekubit, kokwapuke ekubit airimor: esesenete akedoketa kide.”

¹⁸ Katema eoŋ atiar, “Okoku loka etuŋanan, inera kwanata Ejakait EDEKE ebe: Nu kes aicorakineta nuka etem: kapaaran naiswamaata, ainakinia ainakineta nuicweio, ka abwatanakin aokot.

¹⁹ Ebala Ejakait EDEKE ebe, Iinakini isasedotin Ilebin lukaur naka Sadok, lueapiete keoŋ aijaanakin eoŋ, emoŋ lotobait araun ainakinet naka adiakaret.

²⁰Ilemuni aokotoke, ibwaikini amumwarake aoŋon, ka agoria aoŋon nuka amurut, ka atokitoit airimor: kwaŋin itesegia ŋes, iluci da.

²¹ Ilemuni da emoŋ lotobait loka ainakinet naka adiakaret, icweio ŋes kaibois naeseunitai naka etogo, kokiŋa kaibois nakalaunan.

²²Kosodi kapaaran nakiareit iinakini ekoroi lomam eŋwalit araut ainakinet naka adiakaret; itesegete etem, kwape etesegitotor komoŋ lotobait.

²³Naidaunia aiteseg, iinakini emoŋ lotobait lomam eŋwalit, ka emerekek lomam eŋwalit loelemunio kosipan.

²⁴ Isukunyikini kes akonyen nuka EJAKAIT, ecakanakinete isasedotin abalaŋ, einakinete kes araut ainakinet naicweio mama ejai EJAKAIT.

²⁵ Kapaarasia akanykaarei itemonokinene ŋinipaaran akinei araut ainakinet naka adiakaret: ido itemonokinete emoŋ lotobait, ka emerekek lomam eŋwalit loelemunio kosipan.

²⁶Apaarasia akanykaarei ilucete kanuka etem, itesegarete; kwaŋin ŋes etiakariata.

²⁷ Kosodi kedautu apaarasia ŋun, edoli apaaran nakikanyetekauni, ka aiyatanakin da, einanakinete isasedotin ainakinetakus nuicweio, ka ainakinetakus nuka ainapakin kotem. Ebala Ejakait EDEKE ebe, Kacamuni do yes.”