Read Ateso Esekiel 45 Bible Online

Esekiel 45 - Ateso bible

Esekiel 45

¹ “Bobo da, naikorokoraata akwap araun airumet koroet, iinanakinete EJAKAIT ainakinet, atutubet nakalaunan naka akwap: aojauke ikubitin ilukumin akaisaarei ka lukany, alalauke da ikubitin iluktunin itomon: eraun nakalaunan kowaitinike kere airimor.

² Ejaun nen aibois nakalaunan, aojauke ikubitin akwat akany, alalauke da ikubitin akwat akany, ariakanara; ka ikubitin akaisakany kanuka ironyia airimor.

³Kaitemisioit na itemi aojau naka ikubitin ilukumin akaisaarei ka lukany, ka alalau naka ilukumin itomon: tomake ejaun aibois nakalaunan, naerai nakalaunan noi.

⁴ Erai atutubet nakalaunan naka akwap; eraun naka isasedotin, ikejaanakinak luka aibois nakalaunan, luikunyakinete aijaanakin EJAKAIT: eraun aibois naka itogoikec, ka aibois nakalaunan kanuka aibois nakalaunan.

⁵ Ido Ilebin, ikejaanakinak lukotogo, ejaunos ka ikubitin ilukumin akaisaarei ka lukany aojau, ka ikubitin ilukumin itomon alalau, araut alupokec, kanuka ireriakec luiboienenoto.

⁶“Igitarete alup nuka ere ikubitin ilukumin ikany alalau, ka ikubitin akaisaarei ka lukany aojau, kidunyakina kainakinet naka atutubet nakalaunan: eraunos nuka ekek kere loka Isirael.

⁷ “Ido nuka ekapolon ejaunete epuwai ka epuwai kainakinet nakalaunan, ka alup nuka ere; kowaitin luka ainakinet nakalaunan, kowaitin da luka alup nuka ere, kariino nukokide ka nukoto: eriakanara aojau atutubet adiopet, anyoun kari nakoto kiton ari nakokide.

⁸ Eraunos alupoke kotoma akwap naka Isirael. Kwabo mam bobo ikapolokoka emwaŋete ikatuŋa; konye einakinete ekek loka Isirael akwap kwape ejaatar atekerinikec.

⁹ “Inera kwanata Ejakait EDEKE ebe: Kodaut, yes ikapolok luka Isirael! Kolemasi akaje ka aiŋat, kitodoloto etube ka adolit: ebala Ejakait EDEKE ebe, Kinyeis aireŋear ikatuŋa.

¹⁰ “Kojaenenas kaitemisio nuedolito, epa[9] loedolit, ka akaalakany naedolit.

¹¹Koraas epa ka akaalakany nuka aitemisioit adiopet, edoli akaalakany yenikitomonet yenika ekomer[10] epa da yenikitomonet yenika ekomer: aitemisioitike kojaun kwape ejaar ekomer.

¹² Esekel[11] da eriakas igeran akaisaarei: isekelin ikany eraunos isekelin ikany, isekelin itomon eraunos isekelin itomon, ka emanekus kes isekelin akaisakany.

¹³“Na ŋes ainakinet naiinanakinete; idiopet kokanykape yenika epa yenelemunio kaŋolikomer loka eŋano, iinanakinete da idiopet kokanykape yenika epa yenelemunio kaŋolikomer loka esairi:

¹⁴ka ainakinet naicorakinitai naka akinyet, naka akaalakany naka akinyet, eraun idiopet kotomon yenika akaalakany yenelemunio kokor, kes akaalakanya atomon, kes ekomer; naarai akaalakanya atomon kes ekomer:

¹⁵ ka imerekek idiopet yenikosipan yenelemunio kakwat aarei, koronyia lukecoa luka Isirael. Ebala Ejakait EDEKE ebe, ŋin ŋes ainakinet naka akiria, ka ainakinet naicweio, ka ainakineta nuka ainapakin, alucio kes.

¹⁶Einanakinete ituŋa kere luka akwap ainakinet ŋin kanuka ekapolon loka Isirael.

¹⁷ Eraun aswam naka ekapolon ainakin ainakineta nuicweio, ka ainakineta nuka akiria, ka ainakineta numatan, kopucin, ka nailamununia elap, kasabaton, kopucin kere lueseunitai luka ekek loka Isirael: ŋes itemonokini ainakinet naka adiakaret, ka ainakinet naka akiria, ka ainakinet naicweio, ka ainakineta nuka ainapakin, alucio ekek loka Isirael.

¹⁸ “Inera kwanata Ejakait EDEKE ebe: Kolap losodit, kapaaran nasodit naka elap, iyaŋaari emoŋ lotobait lomam eŋwalit; kitesegia aibois nakalaunan.

¹⁹ Elemuni esasedoti aokot nuka ainakinet naka adiakar, ejuki ategerio nuka etogo, ka agoria aoŋon nuka amurut naka etem, ka ategerio nuka erute loka alaro nakotoma.

²⁰ Ido iswamaenenei kwaŋin kapaaran nakikanyetekaarei naka elap, kanuka ŋinituŋanan yenepaari, kaŋin da yenijimat: kwaŋin ilucenenoto etogo.

²¹ “Kolap losodit, kapaaran nakitomonet kaoŋon naka elap, kojaununos kAleleŋio, epucit loka apaarasia akanykaarei; kes enyamere imugatin lumam itubuunitoi.

²² Kapaaran kaŋin itemonokini ekapolon emoŋ lotobait araun ainakinet naka adiakaret kanukeŋ, kanuka ituŋa da kere luka akwap.

²³ Itemonokini ŋesi ainakinet naicweio mama ejai EJAKAIT apaarasia akanykaarei nuka epucit, imoŋin lutoba ikanykaarei, ka imerekekin ikanykaarei lumam eŋwalito ŋinipaaran adaun apaarasia akanykaarei; ka ekoroi da ŋinipaaran araut ainakinet naka adiakaret.

²⁴ Ido itemonokini ainakinet naka akiria, epa ediopet kaŋolimoŋ lotobait, ka epa ediopet kaŋolimerekek, ka ekin[12] loka akinyet kaŋoli epa.

²⁵ Kolap lokikanyetekaarei, kapaaran nakitomonet kakany naka elap, kopucit, kiswamaenenei kwape kwaŋin adaun apaarasia akanykaarei: kwape ejaar ainakinet naka adiakaret, ka ainakinet naicweio ka ainakinet naka akiria, ka naka akinyet, kwape ejaatar.