Read Ateso Esekiel 47 Bible Online

Esekiel 47 - Ateso bible

Esekiel 47

¹ Kenyaka okek loka etogo; ido koany, koleleut akip alomun kokwap kariri ketogo kari nakokide, naarai koseseni etogo kide; koleleas akip alomun kokwap, kowai lokoteten loka etogo, kari naka eŋalakimak naka etem.

²Kosodi ketolom korot lokorute loka agolitomei, kayaŋa kesirimo orot lokokiŋa kiton orute lo kokiŋa, korot lokorute loeseseni kide; ido koany koleleete akip kowai lokoteten.

³ Koloma etuŋanan kobei kide kitiŋite auno kakanike, kitem ikubitin elukumit, ketotor akipi, akipi nuasaŋito okuurunya.

⁴Kitem bobo elukumit, ketotor akipi, akipi nuasaŋito akuŋin. Kitem bobo elukumit, ketotor akipi, akipi nuasaŋito aŋabet.

⁵Kosodi kitem elukumit; korau ecor lomam apedori aitor: naarai amukururas akipi, akipi nukiduis, ecor lomam epedorio aitor.

⁶Katema eoŋ atiar, “Okoku loka etuŋanan, iany nu?” Kosodi kayau ketoboŋ koitolima loka ecor.

⁷ Kosodi naaboŋoria, koany, kojaas ikito luipu noi koitolima loka ecor epuwai ka epuwai.

⁸ Kosodi katema eoŋ atiar, “Elelearete akip nu owai lokokide, ijesaros toma Araba; elosete aŋolol; aŋolol ŋes elosete akip nukitolomunio; ido itaŋaleunio akipi.

⁹ Kosodi kanen ejari ŋinibore yenikajaran yenilweki, kaŋiniibois naedolete icorin; idilaros lukecor noi; naarai adolut akip nu, itaŋaleunio akipi nuka aŋolol, ido ejari ŋinibore kere kaneedolenenei ecor kere.

¹⁰ Kosodi kanen ebwoete ikalokak koitolimake: anyoun ko En-gedi kiton En-egilaim eraun aibois naeakanakinet iboyan; ejaunete lukecor lukiponesio luipu noi, kwape lukecor luka Aŋolol Nakapolon.

¹¹Konye aiboisio nukerit, ka isamake da mam itaŋaleunio; inyeinio eraas nukabalaŋ.

¹² Ido koitoliman luka ecor, epuwai ka epuwai, ebwaŋunete ikito lukiponesio kere luenyamio, lumam erinyorete akuikec, ido mam araitokec iŋoŋooros. Eraenenete araito nukitetiak ŋolilap, naarai apote akecekipi kaibois nakalaunan. Eraunete akeceraito inyamat, akecekui da eraunete ekia lokitaŋaleunet.”

¹³ Inera kwanata Ejakait EDEKE ebe: “Lo ŋes eraun eikor loitiakiata akwap araun airumet kwape ejaatar atekerin atomon kaarei nuka Isirael. Edumuni Yosep akorakineta aarei.

¹⁴ Itiakatiakaete ŋes korianas; naarai abu kekeu akakan ainakin lukapapaakus: ibeata yesi da akwap na airum.

¹⁵ “Lo ŋes eraun eikor loka akwap: kari naka agolitomei ageun kAŋolol Nakapolon, korot loka Ketulon, kiton neelomarere Sedad:

¹⁶ Kamat, Berota, Siburaim, loejai kidiŋ keikor loka Damasiko, ka eikor loka Kamat; kiton Kaseratikon, loejai oikor loka Kauran.

¹⁷ Eikor da anyoun kaŋolol eraun Kasar-enon koikor loka Damasiko, kari naka agolitomei ejai eikor loka Kamat. Ŋol ŋes ewai loka agolitomei.

¹⁸Kowai lokokide da, kidiŋ Kauran ka Damasiko ka Gilead, ka akwap naka Isirael, eraun Yorodan; itemete ageun koikor loka agolitomei kiton aŋolol nakokide. Ŋol ŋes ewai lokokide.

¹⁹“Kowai loka eŋalakimak ebei anyoun koTamar aitodol akipi nuka Meribot-kades, kiton aguurut nako Misiri, kiton Aŋolol Nakapolon. Ŋol ŋes ewai lokeŋalakimak.

²⁰“Kowai lokoto eraun Aŋolol Nakapolon eikor, ageun koikor lokeŋalakimak kiton neesesenas kaneelomarere Kamat. Ŋol ŋes ewai lokoto.

²¹“Kwaŋin ikorokoraata akwap na kwape ejaatar atekerin nuka Isirael.

²² Kosodi kanen, ikorete keroet araut airumetekus, ka naka imo luiboiete kamakus, luewuriete idwe kokidiŋikus; eraunos kamakus kwape iwurian luka idwe luka Isirael; irumete kesi da nepepe kayes kotoma atekerin nuka Isirael.

²³Ebala Ejakait EDEKE ebe, Kosodi kanen, ŋiniteker naiboieneno imoit, ŋina ŋes iinakiniata airumeteke.