Read Ateso Esekiel 6 Bible Online

Esekiel 6 - Ateso bible

Esekiel 6

¹Kobu akirot naka EJAKAIT mama ajai ebe:

² “Okoku loka etuŋanan, kite iroŋan luka Isirael, kodwarak kes.

³ Kiner atiar, Yes iroŋan luka Isirael, kiiras akirot naka Ejakait EDEKE! Inera kwanata Ejakait EDEKE iroŋan ka iukon, isama ka aditon da ebe: Koany, eoŋ, eoŋ obe, kainuni yes ekileŋ, amudiari aiboisiokus nuiceleleete.

⁴ Itisilio itemwanakus, ebilibilio aputosiakus nuka akoloŋ: acakakini ituŋakus lueario akonyen nuka aputosiakus.

⁵Ido eperikini atesin nuka idwe luka Isirael akonyen nuka aputosiakec; esiarisiari da akojokus airimor itemwanakus.

⁶Iswapete ireriakus kotoma aiboisiokus kere, itisilio aiboisio nuiceleleete; tetere iswapete itemwanakus, itisilio, ebilibilio aputosiakus edaunos, ejepejepeo aputosiakus nuka akoloŋ, emwatario da akusiswamisio.

⁷Ibirokinos lueario kidiŋikus, ijenunete da ebe arai eoŋ EJAKAIT.

⁸“Konye do etasali aatoŋot, Naarai ijaunete kice luekuete ekileŋ kotoma atekerin, nakisiarakinere akwapin.

⁹ Keitunete ŋul luekuete kayes kotoma atekerin kama ijoreoritai, kadau aibil itauonokec ludotea luanyoutu kamakaŋ, ka aitumudak akonyenekec nuelosete eporo kaputosiakec; ekadakinete kesi kanuka aronisio nueswamata, ka italesiakec kere.

¹⁰Ejenunete ebe arai eoŋ EJAKAIT: mam ener atai ebe eswamakini kes aronis ŋin.”

¹¹ Inera kwanata Ejakait EDEKE ebe: “Kodip kakanikon, kopet kakejekon, kinera ebe, Wu okwe! Kanuka italesia kere lueroko luka ekek loka Isirael: naarai ibiroros kekileŋ, ka eteŋei, ka atular da.

¹²Yenelwana etwani atular; yeneapie eari ekileŋ; ka yenesali irigaunitai etwani eteŋei. Kwaŋin etodolikini akadedeŋ mamakec.

¹³ Ijenunete yesi ebe arai eoŋ EJAKAIT, naejauniata ikecetuŋa luearitai toma aputosiakec airimor itemwanakec, kaŋoliukot loimukurur, aidiasia kere nuka iroŋan, kokwap kaŋolikitoi loepesit, kokwap da kanolilua loiswapit, aiboisio nuainanakiniata lueuru saa aputosiakec kere.

¹⁴ Ariikini kes akakan, aitisil akwap kiswap, anyoun kamodiŋ naka Dibila, airiamar ireriakec kere; ejenunete do ebe arai eoŋ EJAKAIT.”