Read Ateso Daniel 2 Bible Online

Daniel 2 - Ateso bible

Daniel 2

¹ Kokaru lokiareit loka airumit naka Nebukadenesar kiruja ŋesi airujasia; kiyaloŋoŋ kotauke, kikoleroto akekonyen.

² Kosodi ekabaka aicorakin anyaraun imurwok, ka ikasupok, ka ikaroak, ka Ikaludean alimokin ekabaka airujasiake, Kolomasi do kobwaata kakonyen nuka ekabaka.

³Kotema ekabaka kes atiar, “Erujat eoŋ airujasit, kiyaloŋoŋ da ekatau ajenun airujasit.”

⁴Kosodete Ikaludean atemar ekabaka kaŋajep naka. Asurian ebe, “Wu ekabaka, kobusi ikar kere: kolimok ikonikejaanakinak airujasit, ka sio da kitoduuni apolouke.”

⁵Koboŋok ekabaka kotema Ikaludean atiar, “Alom akirot kamaka: arai mam yes itejenunete eoŋ airujasit ka apolouke da, kijepejepeo yes, ikusitogoi da eraunos amejei.

⁶Konye do arai kitodutu airujasit ka apolouke, idumunete ainakineta ka iropito ka aibuses naepol da; aso kitodikinai eoŋ airujasit ka apolouke da.”

⁷Kirucakis aboŋokin ebe, “Kolimok do ekabaka ikekejaanakinak airujasit, kasodete isio aitodiar apolouke.”

⁸Koboŋok ekabaka ebe, “Ajeni cut ebe ikotosi yesi aitumor naarai ianyut ebe alom akirot kamakaŋ.

⁹ Konye arai mam kitejenikinete eoŋ airujasit, ejai ekisil ediopet kanukus: naarai ipotu kitemokis akiro nukaisab ka nukaronok einer kakonyeneka, aitodol nailocokinotor apakio: aso do kolimokinai eoŋ airujasit, kasodi eoŋ ajenun ebe ipedorete aitodiar apolouke.”

¹⁰Koboŋokis Ikaludean kakonyen nuka ekabaka ebe, “Emamei da ituŋanan kakwap yenepedori aitodiar akirot naka ekabaka: naarai emamei ekabaka loepol ido lokapedor lolem iŋisit emurwon, arai ekasupon, arai Ekaludeat akirot naikoni nen.

¹¹ Epagal akirot naitiŋaikinit ekabaka, kwabo emamei yenepedori aitodikin ekabaka, dimikito idekesio lumam iboiete kaluejaas awat.”

¹² Kanuka ŋun kodedeŋiar ekabaka konyunyurikin noi, kicorak amudiar lukacoa kere luko Babulon.

¹³Aso kolimoroi ekisil loka aiar lukacoa; aponi komoai Daniel ka lukaupake da aiar.

¹⁴Kosodi Daniel aboŋokin kacoa kaiyapepera Ariok ekapolon loka ikedarak luka ekabaka, loalomarit aiar lukacoa luko Babulon;

¹⁵Koboŋok kotema Ariok ekapolon loka ekabaka ebe, “Kanukinyo kisuburikinia ekisil loebunit kama ejai ekabaka?” Kosodi Ariok aitejenun Daniel akirot.

¹⁶Koloma Daniel, kilip ekabaka aseikin ŋes apak, tetere itodikini ekabaka apolou.

¹⁷Kosodi Daniel alosit togoke, kitejenik ikepaup Kanania, ka Misael, ka Asaria akirot.

¹⁸Tetere ilipete aitim naka Edeke loka akuj kanuka aiyeiyea kaŋin; kinyeis Daniel ka ikepaup amudiario nepepe ka lukacoa ice luko Babulon.

¹⁹ Kosodi kopukokinai Daniel aiyeiyea kaitapoet naka akuar. Kosodi Daniel aimal Edeke loka akuj.

²⁰ Koboŋok Daniel, kotema atiar, “Kituritete ekiror loka Edeke ikar ka ikar: Naarai acoa ka apedor eraas nuke.

²¹ Ŋes da iloci apakio ka ikar: Elemari ŋesi ikabakan, edakakini da ikabakan: Einakini lukacoa acoa, Aijen da mama ejaas lueberiaŋ ajenun;

²² Epukori ŋesi akiro nuidulok ka nukaiyeiyea: Ejeni ŋesi nuejaas toma amuton, Iboie aica kaŋes.

²³ Emalai jo, eturit jo, wu jo Edeke loka lukapapaaka, Lokiinak eoŋ acoa ka apedor, Kwana da kitejenik eoŋ nukipou kelipito jo: Naarai kitejenik sio akirot naka ekabaka.”

²⁴Aso koloma Daniel mama ejai Ariok, loabu ekabaka koseu amudiar lukacoa luko Babulon: abu kolot kotema ŋes kwanata atiar, “Sirikimudia lukacoa luko Babulon: kitolomarai eoŋ mama ejai ekabaka, eoŋ da etodikini ekabaka apolou.”

²⁵Kosodi kisunya Ariok aitolomar Daniel mama ejai ekabaka, kotema ŋes kwanata ebe, “Adum eoŋ etuŋanan lokodwe luejoreunitai luka Yuda, itejenikini ŋesi ekabaka apolou.”

²⁶Koboŋok ekabaka kotema Daniel, ekekiror Beletesasar, atiar, “Ipedori tope ijo aitejenikin eoŋ airujasit naabu kaany, ka apolouke da?”

²⁷Koboŋok Daniel kakonyen nuka ekabaka ebe, “Mam epedorete lukacoa, ka ikasupok, ka imurwok, karaida ikadwarak aitodikin ekabaka nukaiyeiyea nuabu ekabaka kicorak:

²⁸ konye ejai Edeke toma akuj, loepukori nukaiyeiyea, ido kitejenik ŋesi ekabaka Nebukadenesar nuejaunete kapaarasia nukoiŋaren, Akoniirujasit, ka aitapoeta nuka akoukon kaperitikon, kes nuta:

²⁹Wu ekabaka, apotu aomisio kopotu mama ijai ijo kaperitikon, nuka nuekotosi ajakut; ŋol da loepukori nukaiyeiyea kitejenik ijo nuekotosi ajakut.

³⁰ Konye mam kapukokinitai eoŋ aiyeiyea na kanuka adiocoa nakijaar eoŋ adepar yenikajaran kere, konye tetere itejenikinio ekabaka apolouke, ido tetere ijenuni aomisio nukotaukon.

³¹“Wu ekabaka, ibu kosesen, ido koany, aput nakos. Abu aput ŋin nakapedor, naimwekimwek aitelekar, kobwo kakonyenekon; eiponeke da loketasuro.

³²Aput ŋin korai akouke nakesabu loejok, aketorobu da ka akaninike nukepuesa, akekoik ka amurwosike nukaisinit,

³³akejeke nukasua, ka aicaketake da atutubet nakasuat ka atutubet nakelupe.

³⁴Ibu kosesen aitodol neatiakar amoru, komam akan etirorit, kocam aput aicaketake nukasua ka elupe, kobilibil kes.

³⁵ Kobilibilunos da asuat, ka elupe, ka aisinit, ka epuesa, ka esabu da, koluoros kwape agugu nukopejal kamu; kokutar ekwam pit, komam kes edumunitos aibois: koluor amoru naabu kocam aput eroŋat lokos, kilelebun akwap kere.

³⁶“Ŋin ŋes airujasit; kilimori kwana do apolouke kakonyen nuka ekabaka.

³⁷ Ijo, wu ekabaka, irai ekabaka loka ikabakan, loabu Edeke loka akuj koinak ajakanut, ka apedor, ka agogoŋ, ka aibuses.

³⁸ Kama iboioto da idwe luka ituŋa kere, abu kokorak akanikon itiaŋ luka ais ka ikweny luka akuj, koinak ijo ayait kes kere: irai ijo akou naka esabu.

³⁹ Akaulokon kitupakin acejakanut namam eriakas kajo; ka ajakanut ace nakiwuniet naka aisinit naeyai rwaru akwap kere.

⁴⁰ Egogoŋ ajakanut nakiwoŋonet kwape kasuat: naarai ebilibilei asuat iboro kere, idecideci da: ido kwape kipicipicia asuat ŋul kere, ebilibilei ipicipici ŋin da.

⁴¹Ido kwape kianyunia aicaketa ka ibokoro, atutubet naka elupe loka ekajean, atutubet da naka asuat, eraun ajakanut naetiakak; konye ejaun kotomake agogoŋ naka asuat, naarai ibu koany asuat inyalakina elupe lokenyadu.

⁴²Ido kwape keraatar ibokor luka akejen atutubet nakasuat, atutubet da nakelupe, ikwaikin nen ajakanut, atutubet naegogoŋ, ka atutubet da naebilil.

⁴³Ido kwape kianyunia asuat inyalakina kelupe lokenyadu, inyalakin kwape kwaŋin aur naka ituŋa; konye mam imorianakinos, kwape mam inyalakinotor asuat kelupe.

⁴⁴ Ido kapaarasia nuka ikabakan ŋul edakakini Edeke loka akui ajakanut namam emudiario ikar kere, karaida airumuke ajalakinio ituŋa ice; konye ebilibilei emudiari da ajakanuto ŋun kere, ido kojaenena ikar kere.

⁴⁵ Ido naarai ibu koany amoru etiakun koroŋat komam akan etirorit, kobilibil asuat, ka aisinit, ka elupe, ka epuesa, ka esabu da; etejenu Edeke lokapolon ekabaka nuekotosi ajakut: erai airujasit nakabeit, etogogoŋi da apolouke.”

⁴⁶ Kosodi ekabaka Nebukadenesar aibiror ebuburia, koma Daniel, kicorak ainakin asubanit ka lueur maa.

⁴⁷Koboŋok ekabaka kotema Daniel atiar, “Abeit Ekonideke ŋes erai Edeke loka idekesio, ka EJAKAIT loka ikabakan, ka ekapukoron nukaiyeiyea, naarai ipedo ijo apukor aiyeiyea ŋin.”

⁴⁸ Kitopoloo do ekabaka Daniel, koinak ŋes ainakineta nuipu nuepolok, koinak ŋes ayait ebuku kere loko Babulon, kitarau da ŋes ekayaiton lokapolon loka lukacoa kere luko Babulon.

⁴⁹ Kilip Daniel ekabaka, kitopol ŋesi Sadurak, ka Mesak, ka Abed-nego kotoma akiro nuka ebuku loko Babulon: konye kojaenena Daniel orute loka ekabaka.