Read Ateso Daniel 4 Bible Online

Daniel 4 - Ateso bible

Daniel 4

¹ Nebukadenesar ekabaka, mama ejaas ituŋa, ka atekerin, ka aŋajepa kere luiboiete kakwap kere; kiyatanakin ainapakin mama ijaas.

² Etojok aitodiar aanyuneta ka nukaumokin nuabu Edeke Loejai kuju kakuj keswamak eoŋ.

³ Epolok ca ma aanyunetake! Egogoŋ da nukaumokinike! Akejakanut ŋes ajakanut namam enaŋi, Airumiteke da ageun katurio kiton aturio.

⁴Ajai eoŋ, Nebukadenesar, kaijamam kotogoka, egananai da kotogoka lokapolou.

⁵ Abu kaany airujasit naketukuriani; kesiyaloŋoŋoto aomisio kaperitika ka aitapoeta da nuka akouka.

⁶Ŋes esilakinia ekisil lukacoa kere luko Pabulon ayaunio mamaka, tetere ketejenikinete eoŋ apolou naka airujasit.

⁷ Kosodete imurwok, ka ikasupok, ka Ikaludean, ka ikadwarak alomun: kalimok kes airujasit; konye mam apotu ketejenikis eoŋ apolouke.

⁸ Konye kokau kolom Daniel mamaka, ekekiror Beletesasar, kwape ejaar ekiror loka ekadeke, ejai kotomake emoyo loka idekesio lukalaunak; kalimok ŋes airujasit ebe,

⁹ “Wu Beletesasar, ekapolon loka imurwok, naarai ajeni ebe ejai emoyo loka idekesio lukalaunak kotomakon, ido emamei nakaiyeiyea nakisiyaloŋoŋoi jo, kolimokinai aitapoeta nuka airujasitika naabu kaany, ka apolouke da.

¹⁰ Aitapoeta nuka akouka kaperitika kes nuta: abu kaany, ido koany, ekitoi kokidiŋ kakwap, epol da aojauke.

¹¹Kopoloor ekitoi, kogogoŋor, kodol aidike toma akuj, kotakanu da kosaŋe loka akwap kere.

¹² Kojokuka akuike, kipu da araitoke, kojaas kotomake inyamat luedaunito kere: kojaas itiaŋ luka ais otolimike, kiboiete akweny nuka akuj katenunake, konyamenenete kere luejaas awat.

¹³ Abu kaany kaitapoeta nuka akouka kaperitika, ido koany, kodoku ekedaran, ekalaunan, kokuju.

¹⁴ Kikeseu ŋesi ekeporoto kobala kwanata ebe, ‘Kojep ekitoi, Kojep da aketenun, kilakilaka akuike, kisiarisiar araitoke; konyoutu itiaŋ kokwapuke, ka akweny da katenunake.

¹⁵Konye do kinyek ekomio loka aliasike kalup, koenite kasuat ka aisinit kotoma anya nuka ais; kitapapal kakopyo nuka akuj, komora kitiaŋ ainyam inya luka akwap.

¹⁶ Kilocokinoi etauke loka etuŋanan, koinakinai ŋes etau loka etiaŋ: kotuboros apakio akanykaarei mamakeŋ.

¹⁷ Erai akirot kokisil loka ikedarak, aicorakinet da kakirot naka ikalaunak: tetere ejenunete lukajarak ebe irumit ŋol loejai kuju kakuj ajakanut naka ituŋa, einakini ŋin yenekoto, edakakini yenitasono kotuŋa.’

¹⁸ Abu eoŋ, ekabaka Nebukadenesar, kaany airujasit ŋin: ka jo da, wu Beletesasar, kolim apolouke, naarai mam epedorete lukacoa kere luka ajakanutuka aitejenikin eoŋ apolouke; konye ipedori ijo, naarai ejai emoyo loka idekesio lukalaunak kotomakon.”

¹⁹ Kosodi Daniel, ekekiror Beletesasar, aumokin nediokasilon, kisiyaloŋoŋoto ŋes akeomisio. Koboŋok ekabaka ebe, “Beletesasar, kinye airujasit, karaida apolouke, aisiyaloŋoŋ jo.” Koboŋok Beletesasar ebe, “Ekajakait, korai airujasit naka ŋul kalukilaito jo, apolouke da naka lukasurupokon.

²⁰Ekitoi loibu ijo koany, loapoloor, loagogoŋ, loadolit aidike toma akuj, loatakani mama ejaas kere luka akwap;

²¹loajokuka akuike, loapol araitoke, loajaas kotomake inyamat luedaunito kere; loeboiete itiaŋ luka ais kokwapuke, loeboiete akweny nuka akuj katenunake:

²² ŋes ijo, wu ekabaka, loipoloor, loigogoŋ: naarai apoloor apoloukon, adol toma akuj, airumitekon da kiton osaŋe loka akwap.

²³ Ido kwape keanyunia ekabaka ekedaran, ekalaunan edokuni kokuju ebala ebe, ‘Kojep ekitoi, komudia ŋes; konye kinyek ekomio loka aliasike kalup, koenite kasuat ka aisinit, kotoma anya nuka ais; kopalal kakopyo nuka akuj, komora kitiaŋ luka ais, aitodol neatuborotor apakio akanykaarei mamakeŋ:

²⁴ Na ŋes apolouke, wu ekabaka, erai ekisil loka ŋol loejai kuju kakuj, loabunok ekajakait ekabaka:

²⁵ ebe, kireŋeario jo anyoun kotuŋa, iboienenete ijo kitiaŋ luka ais, inyami anya kwape imoŋin, ipalalar kakopyo nuka akuj, etuboros apakio akanykaarei kamakon; aitodol naijenunia ijo ebe irumit ŋol loejai kuju kakuj ajakanut naka ituŋa, einakini da ŋin yenekoto ŋesi.

²⁶ Ido naarai ecorakin ainyein ekomio loka alias nuka ekitoi; icasi akonijakanut kamakon, kidau ajenun ebe eyait Akuj.

²⁷ Aso do, wu ekabaka, kocam ainerunika, kosac akonironisio kanuka aswam adolit, numam adolitekon da kaitim lukican; motoko ejaun aitoojaar aijamamakon.’ ”

²⁸Apotu ŋun kere kodoikis ekabaka Nebukadenesar.

²⁹Ketuboros ilapio itomon ka luarei, kojai ŋesi irimi kotogo lokekabakane ko Babulon.

³⁰ Kiner ekabaka, kobala ebe, “Mere kereka lo Babulon lokapolon loabu kaduk araun aibois nakekabakane, kanuka agogoŋ naka apedorika, ka aibuses da naka apolouka?”

³¹ Eriŋa akirot ejai aituk naka ekabaka, kodou eporoto ebuni kokuju ebe, “Wu ekabaka Nebukadenesar, inerai mamakon: anyou ajakanut kamakon.

³²Kireŋear kotuŋa, iboienenete ijo kitiaŋ luka ais; inyami anya kwape imoŋin, etuboros apakio akanykaarei kamakon; aitodol naijenunia ijo ebe irumit ŋol loejai kuju kakuj ajakanut naka ituŋa, einakini da ŋin yenekoto ŋesi.”

³³ Kosawa kaŋol kitodolikinitai akirot mama ejai Nebukadenesar, aponi kireŋearai kotuŋa, konyam anya kwape imoŋin, kopalal akekuan kakopyo nuka akuj, aitodol naepoloorotor iketima kwape ajulo nuka imorukaalen, akebelekeka da kwape kabelekeka nuka akweny.

³⁴ Ketuboros apaarasia, abu eoŋ Nebukadenesar keteluo akakonye akui, koboŋu aijeneka mamaka, kemal ŋol loejai kuju kakuj, keturite ŋes, ketopoloo da ŋol loebusi ikar kere: Naarai airumiteke ŋes airum namam enaŋi, Akejakanut da ageun katurio kiton aturio.

³⁵ Luiboiete kakwap da kere mam imarakinitai araut ibore: Iswamai ŋesi kwape ekotor kajore naka akuj, Ido mama ejaas luiboiete kakwap: Emamei da yenepedori aitikokin akekan, Karaida atemar ŋes atiar, “Anyoika bo nuiswamai?”

³⁶ Kapak kaŋin da koboŋ aijeneka mamaka; ido kanuka aibuses naka ajakanutuka, koboŋ akapolou ka akamwekimwek da; komoata ikakenerunak ka ijakaka neajai; keticasi kajakanutuka, kiyatakinai mamaka apolou naedeparit.

³⁷Kwana do eoŋ Nebukadenesar eturit, etopoloorit, etubusikinit da Ekabaka loka akuj; naarai eraas akeswamisio kere abeit, ikerotin da etube; ŋul da luelosete kaiturokina epedori ŋesi aitisil.