Read Ateso Daniel 9 Bible Online

Daniel 9 - Ateso bible

Daniel 9

¹ Kokaru losodit loka Dario okoku loka Akasuero, loka aur naka Imedin, loaraun ekabaka loka ajakanut naka Ikaludean;

² kokaru losodit loka airumiteke abu eoŋ Daniel kajenu kanuka iitabon etiai loka ikar luibusakinit atubor aitodolikin aimejeikin naka Yerusalem kwape ejaar akirot naka EJAKAIT mama ejai enabi Yeremia, kes ikar akaisakanykaarei.

³Kagipa mama ejai EJAKAIT Edeke, amoot ailip, ka aiŋaiŋa, kekanyi eteŋei, kanapite epuko ka ekurwon.

⁴Kelip EJAKAIT Ekadeke, kalimo, kenera ebe, “Wu EJAKAIT Edeke lopeti, loketasuro, loitodoli aitutuket ka aitim mama kaŋul lueminas ŋes koricito da akeicorakineta;

⁵ Kidiaka isio, kiswama nukepali, kikwaik erono, kipaliiki isio apaar ainyein aituutooretakon, ka itubesiakon.

⁶ Mam kipou keirasi ikonibulesin inabin, luapotu kinerasi kokirorikon mama ejaas ikabakanakosi, ka ikapolokokosi, ka lukapapaakosi, ido mama ejaas ituŋa kere luka akwap.

⁷Wu EJAKAIT, adolit ŋes nakon, konye do kirumito sio ileic, kwape lolo; ituŋa luka Yuda, ka luiboiete koYerusalem, ka Isirael kere, lueapiete ka luelwaka, anatar akwapin kere nukireŋeari ijo kes, kanuka adiakaret naadiakasi mama ijai ijo.

⁸Wu EJAKAIT, kirumito sio ileic, ikosikabakan, ka ikosikapolok, ka lukapapaakosi, naarai kipou kadiakasi kamakon.

⁹ Aitim ka aisioni eraas nuka EJAKAIT Ekosideke; karaida kipou kepaliikis ŋes:

¹⁰kwabo mam kirimarit eporoto loka EJAKAIT Ekosideke alosenen okisilake, lukibwaikin kakonyenekosi kobulesinike inabin.

¹¹ Eebo, ebuca Isirael kere ikonikisila, apaasi, kinyeis arimar ekoniporoto: ŋes kibukokinere ekenit ka aiyaposit naewadikatai okisila luka Musa ekejaanakinan loka Edeke; naarai kidiaka kamake.

¹² Kitogogoŋ ŋesi akekiro, nuenera aluikin sio, ka ikatubokokosi lukitubonokinete sio; nakiinunia sio aronis naepol: naarai kwap kakuj kere mam apeŋo iswamakinitai kwape eswamakinere Yerusalem.

¹³Kibunok sio aronis na kere, kwape iwadikatere okisila luka Musa: kwabo mam kipou keŋaiŋaata asianut naka EJAKAIT Ekosideke, kajalata numam adolitekos, kamisiikis akonibeit.

¹⁴Kanuka ŋun kirerei EJAKAIT aronis, koinu mamakos: naarai edolit EJAKAIT Ekosideke kakeswamisio kere nuiswamai, mam da kipou karimasi ekeporoto.

¹⁵Kwana da, wu EJAKAIT Ekosideke, lokitolom ikonituŋa kakwap nako Misiri kakan nakagogoŋ, ido ibu kodumunia ekiror, kwape lolo; kidiaka isio, kiswama nueroko.

¹⁶Wu EJAKAIT, kwape ejaar adolitekon kere, keŋaiŋait, kibelok anyunyurakon ka aisiopokon anyoun korekon Yerusalem, eroŋatakon lokalaunan: naarai kanuka aronisiokosi ka numam adolit nuka lukapapaakosi, aluor Yerusalem ka ikonituŋa amorosit mama ejaas ŋul kere lukirimorito.

¹⁷Aso do, wu EJAKAIT Ekosideke, kiira ailip naka ebulesitikon, ka aiŋaiŋake, kitacaik akonikonyen aiboisikon nakalaunan naesil, kanuka EJAKAIT.

¹⁸Wu Ekadeke, kitoik akonikit, kopup; kokweny, kosesen amejeikosi, ka ere loemaikinitai ekonikiror: naarai mam kiyauni aiŋaiŋakosi akonyenekon kanuka adolitekosi, konye kanuka akoniitim naepol.

¹⁹Wu EJAKAIT, kiira; wu EJAKAIT, kisioni: wu EJAKAIT, kopup, kiswama; sirikiyap; kanukon, wu Ekadeke, naarai emaikinitai erekon ka ituŋakon ekonikiror.”

²⁰Kosodi napenerar, elipi, alimori da akaronis ka aronis naka ikatuŋa Isirael, ayait da aiŋaiŋaka akonyen nuka EJAKAIT, Ekadeke kanuka eroŋat lokalaunan loka Ekadeke;

²¹ Eebo, eriŋa enera kailip, aponi kitoporounoi katipet etuŋanan Gaburiel, loabu kaany kaitapoet kageunet, kikuny kapak naka ainakinet naka atiboŋ.

²²Ketejenik, kiner keoŋ, kotema atiar, “Ijo Daniel, alom eoŋ kwana aitedesiar jo toma aijen.

²³Ageunet naka aiŋaiŋakon kolom aicorakinet, abunit eoŋ da alimokin jo: naarai kiminai noi: aso koomoom akirot, kojen aitapoet.

²⁴“Ecorakin asabaton akaisakanykaarei otuŋakon korekon da lokalaunan, aitanaŋ adiakar, adaun da aronisio aituluc numam adolit, ainun adolit namam enaŋi, aipuc da aitapoet ka enabi, ainyonyoikin da aibois nakalaunan noi akinyet.

²⁵Aso do kojen komisiik, ageun naalomunia aicorakinet ainyakar ka aiduk Yerusalem kiton ekapolon loinyonyoikinio akinyet, ejaunos asabaton akanykaarei: asabaton da akaisakanykape ka nuarei, kodukoi bobo, irotin ka arwatatin, konye kapakio nuka ican.

²⁶ Ketuboros asabaton ŋun akaisakanykape ka nuarei, emudiario loinyonyoikinio akinyet, mam ejaun kibore: emudiarete ituŋa luka ekapolon loebuni ere ka aibois nakalaunan; ejaun esaŋeke kakalele, ejaunos da ijiisio kiton osaŋe; epeleikinitai aisimejeikin.

²⁷ Itogogoŋi ŋesi aitutuket kaluipu adaun asabato adiopet: itanaŋi asubanit ka ainakinet atutubet naka asabato; ebuni da ŋol loisimejeikini kabebenok naka italesio; aitodol neebukokinere esaŋe loepeleikinitai mama ejai loisimejeikini.”