Read Ateso Kosea 13 Bible Online

Kosea 13 - Ateso bible

Kosea 13

¹ Nakeneria Epuraim, kojai amaran; Kitopoloor koIsirael; Konye nakegwaunia akirot kanuka Baal, kotwana.

²Kwana da iyatanakinos adiakanar, Eswamaut aputosia nuecalara nuka epuesakec, Kes aputosia kwape ejaar aijenikec, Kes kete aswam naka luepiriaka: Enerasi nukec ebe, Konuata ca ituŋa lueinakinete asuban itak.

³Kanuka ŋun eraunos kwape elisina loka atupuruc Kwape akopyo nuisunyito ailicar, Kwape agugu nuekutari etapipirio kopejal, Kwape apuru da naelomuni kapedot.

⁴Konye arai eoŋ EJAKAIT Ekonideke Anyoun kakwap nako Misiri; Mam ijeni ecedeke dimarai eoŋ, Emamei da ecetjaemar eoŋ ekal

⁵ Abu kajen jo kamodiŋ Kakwap naka akure naepol.

⁶Kwape kedakananatar kimonianakinos; Kimonikinos kitopoloor ekecetau: Tape imurwokinete eoŋ.

⁷Kanuka ŋun araun eoŋ kwape eŋatuny kamakec: Edari korot kwape eris:

⁸Kiriamakin kakes kwape adubu naademaritai idweke, Apoopooi atorobukec: Kaŋina da anyami kes kwape eŋatuny; Epoopooi kes etiaŋ loka ais.

⁹Kamudiari jo, Isirael; Iŋai bo kiŋarakini?

¹⁰ Ali bo ekabakakon, tetere kitajari jo koreriakon kere? Ka ikatubokokon da luibala ijo ebe, “Koinakinai eoŋ ekabaka ka ikapolok?”

¹¹ Abu kainanak jo ikabakan kanyunyuraka, Abu kalema kes kaisiopoka.

¹² Eenitai numam adolit nuka Epuraim; Iŋadakinitai akeronis.

¹³Ebunokini ŋes ariebo naka aberu naidouni; Erai okoku loemamei acoa; Naarai kwana iyapi airukum okek loka akoik.

¹⁴ Ageli kereka eoŋ kes kapedor naka ates? Alakuni kereka kes katwanare? Wu jo atwanare, ai bo ejai atularikon? Wu jo ates ai bo ejai amudiarikon? Ibwaitai aitoronikin kakonyeneka.

¹⁵Karaida euriara ŋesi koinacanake, Ebuni ekwam lokokide, Ekwam loka EJAKAIT loebuni kamodiŋ, Eonikini atanike, eonikini da ecoake: Eŋatari ŋesi aiŋadisia nuka iboro kere luisiyalamikinito.

¹⁶ Ibwoki Samaria akeronis; Naarai ipaliikinit Ekedeke: Etwakete kekileŋ; Ipicipicio imukerunukec, Eŋerereo aŋorokec nuepotiet