Read Ateso Kosea 2 Bible Online

Kosea 2 - Ateso bible

Kosea 2

¹Kolimokisi ikusiinacan ebe, “Ami”; [3] ka akusiinaean ebe, “Rukama.”[4]

² Kiŋaiŋaata totokus, kiŋaiŋaata; Naarai mam erai akaberu, Eoŋ da mam arai okilenike: Kosac ŋesi adoteuke kakonyeneke, Ka eporoke kokisinake;

³ Kenyek aitumujalal ŋes, aibwaikin kwape kapaaran naauriere, Ketuput ŋes kwape amodiŋ, Kebwaik ŋes kwape akwap naeonit, Kaar ŋes kakure.

⁴Eebo, mam etimi ikedwe; Naarai eraas idwe luka adoteu.

⁵ Naarai adotear totokec: Eswama ŋin naapotuunit kes nukileic: Naarai abala ebe, “Alosi mama ejaas ipaelonoka, Lueinakinete eoŋ atapaka, ka akipika, Ajuloka ka abiraika, akinyeteka ka numatanaka.”

⁶ Aso do koany, abwai ekonirot kikukwa, Aduki arwatat kaneejai ŋesi, Tetere mam edumuni ikerotin.

⁷ Etupari ŋesi ipaelonoke, Konye mam edolokini kes: Emoi kes, konye mam edumuni: Kosodi do ebala ebe, “Alosi Aboŋori mama ejai okilenika losodit Naarai ajai ejok kolo adepar kwana.”

⁸Naarai mam ŋes ajeni ebe Eoŋ ŋes ainakinit ŋes Akima ka ebino ka akinyet, Keyatak mama ejai epuesa ka esabu Luejaanakiniata Baal.

⁹Ŋes enyakunia akimaka kapakike, Ka ebinoka kokaruke, Alemari da ajuloka ka abiraika Nutikerapiata amujalalake.

¹⁰Kwana da etoduuni ikeleic Kakonyen nuka ipaelonoke, Emameun yeneyuuni ŋes kakanika.

¹¹ Etanaŋi da aiyalamake kere, Ipucinoke, ailamunun naka ilapioke, asabatonoke, Ka atukokinetake kere nukaiyamakina.

¹² Etiswapi imusabibunuke ka itininike, Luabu ŋesi kotema ebe, “Lu kes eropitika, Loapotu ipaelonoka kainakis eoŋ”; Etuluori kes amagoro, Enyamete da kes itiaŋ luka ais.

¹³ Ebala EJAKAIT ebe, “Eticani ŋes Kanuka apaarasia nuka Ibaalim, Luabu ŋesi kisupurik lukisupurununo, Kisiri kitetio ka itibineke, Kibwapa ipaelonoke, kimurwok eoŋ.

¹⁴ “Aso do koany, emaimai ŋes, Ayauni ŋes amodiŋ, Enerakin ŋes nuitalakarete.

¹⁵ Ainakini ŋes kaŋina amanatake nuka emusabibu, Aditot naka Akor araun ekek loka amun: Eboŋokini ŋesi kaŋina, kwape kapaarasia nuka eiditeuke, Kwape kapaaran naanyounio kakwap nako Misiri.”

¹⁶Ebala EJAKAIT ebe, “Kosodi kapaaran kaŋin, kimaikini eoŋ, ‘Okilenika’ mam bobo kimaikinit eoŋ ‘Baalika’.[5]

¹⁷ Naarai alemari ikiroria luka Ibaalim kaitukuke, mam bobo elimitoi ikiroriakec.

¹⁸ Kapaaran kaŋin etutukikini kes aitutuket kitiaŋ luka ais, ka akweny nuka apak, ka lueliatos kakwap: abili akabwa ka ekileŋ ka ejie anyoun kakwap, esiperikini kes inapakina.

¹⁹Kesineri jo ikar kere; eebo, kesineri jo kadolit, kotube, kasianut-nakamin, ka aitimio da.

²⁰ Kesineri teni jo kamunonut: ijenuni do EJAKAIT.”

²¹ Ebala EJAKAIT ebe, Kosodi kanen kapaaran kaŋin, Aboŋokini, aboŋokini akuj, Ŋes da eboŋokini akwap;

²²Eboŋokini akwap akima, ka ebino, ka akinyet; Eboŋokinete kesi da Yesereel.

²³ Ayeikini ŋes akwap kanukaŋ; Etimi ŋin namam lem itimitoi: Alimokini ŋul lumam araas ikatuŋa ebe, “Iraas yesi ikatuŋa; Kes da inerasi ebe, ‘Ijoŋo Ekadeke.’ ”