Read Ateso Kosea 9 Bible Online

Kosea 9 - Ateso bible

Kosea 9

¹Sirikibwoŋ kailel, ijo Isirael! Kwape atekerin; Naarai iporo ijo ainyein Ekonideke, Imina aropio kaŋolipejal.

²Mam epejal ka acuet nakebino itanyamete kes, Emamikini ŋes ebino lokitetet.

³ Mam iboienenete kakwap naka EJAKAIT; Konye eboŋori Epuraim Misiri, Enyamete inyamat lumam elaete koAsuria.

⁴ Mam ebukonokinete ainakineta nuka ebino mama ejai EJAKAIT, Mam akecesuban isiyalamikinete ŋes; Eraun atapakec kwape atap naka aibworo; Luenyamete ŋes kere emunaunos: Naarai atapakec erai kanuka eteŋei bon: Mam itolomario togo loka EJAKAIT.

⁵Anyoika bo nuiswamaete yesi kapaaran naka atukokinet nakaiyamakina, Kapaaran da naka epucit loka EJAKAIT?

⁶Naarai koany, aekasi kamudiario, Etukokini Misiri kes, idai Memipis kes: Irumete iduanin ikeceboro luisiyalamikinete luka epuesa: Elomunete ikukwa owemanakec.

⁷ Adolut apaarasia nuka aiticanio, Adolut apaarasia nuka aitepesenio; Ejenuni Isirael: Ebaŋaana enabi, ekerepiki da ituŋanan yenejai emoyo, Kanu ipuatar numam adolitekon, Naarai epol asurup.

⁸Enabi ŋes ekedaran loka Epuraim, Ituŋa luka Ekadeke, Konye ejai atacit naka ekalokan-akweny orotinike kere, Asurup da togo loka Ekedeke.

⁹ Amunaunos noi, kwape kapaarasia nuka Gibea: Iituni ŋesi numam adolitekec, Iticani kanuka aronisiokec.

¹⁰ Abu kadum Isirael kwape imusabibun kamodiŋ; Kaany lukapapaakus kwape nugeet nuka etini kokaruke losodit: Konye apotu kopotu Baal-peor, Kotiakakinos mama ejaas ileic, Koraut luketale kwape Ŋin yenikeminas.

¹¹Eporori aibuses naka Epuraim kwape kakweny; Emameun aur, ka nuejaas kakoikes, ka nuepotuunete da.

¹² Karaida itanete idwekec alemari eoŋ kes, Komam ituŋanan ideun; Eeba, itukwi kes naanyounio kamakec!

¹³Kwape kaanyunia, elosikinito odwe luka Epuraim araun lumejauna: Ibusakinit Epuraim aitolomun odweke aario.

¹⁴ Koinaki kes, wu EJAKAIT: Anyoika nuiinakini? Koinak kes akoik naelomuni kiŋa, ka ikisin lucokito.

¹⁵Ejai aronisikec kere Giligal; Kaŋina ber kalai kes: Kanuka aronis naka aswamisiokec Ereŋeari kes kotogoka: Mam bobo amina kes; Ipalioko ikapolokokec kere.

¹⁶Inomio Epuraim, erinyor aliasitikec, Mam eraete araito; Eebo, karaida euriete, Aari eoŋ idwekec luminan.

¹⁷ Ecakari kes Ekadeke, Naarai mam apotu kopuputu ŋes: Eraunos ikejobirak kotoma atekerin.