Read Ateso Amos 3 Bible Online

Amos 3 - Ateso bible

Amos 3

¹Kiirasi akirot na nakinerak yes EJAKAIT, wu idwe luka Isirael, ka ajen kere naetonyouni alemun kakwap nako Misiri kabala ebe:

² “Yes bonik abu kajen kajenasinei kere nuka akwap: ŋes keticania yes kanuka numam adolitekus kere.

³“Epedorete kereka iarei aup, Arai mam imorikikina?

⁴Egat kereka eŋatuny kamagoro, Komam emejaunit? Ikuna kereka iŋatuny kotoma abuake, Arai mam ikamunit ibore?

⁵Epedori kereka akweny aipok kokwap, Komam elokitai elabwata? Ejetakin kereka aloket kokwap, Arai mam ipokit ibore?

⁶ Ekutakinio kereka arupepe kore, Komam ituŋa ekuriakaros? Edoikin kereka aronis ore, Arai mam EJAKAIT eyaŋaunit?

⁷ Abeit emameete nuiswamai EJAKAIT Edeke, Dimarai epukokinit ikebulesin inabin akeiyeiyea.

⁸ Agatu eŋatuny; Iŋai bo mam ekurianar? Ener EJAKAIT Edeke, Iŋai bo ekurwokini aidwar?”

⁹Kolimonosi kotogoi luka Asudod, Kotogoi da kakwap nako Misiri, Kineras atiar, “Kotukonokinos koroŋan luka Samaria, Koanyut iceleta luetia nen luejaas toma, Ka imwaŋito da kwape ejaatar kidiŋ nen.”

¹⁰Ebala EJAKAIT ebe, “Naarai mam ejenete aswam naejok, ŋul luiŋadaete epali ka aiŋat kotogoikec.”

¹¹ Ŋes inerar EJAKAIT Edeke kwanata ebe: “Ejaun lokasurup, airiamar akwap iwaitin kere: Itojoni akonigogoŋ, Eŋasio da ikonitogoi lukapolou.”

¹²Inera kwanata EJAKAIT ebe: “Kwape edemunia ekecokon akeje aarei arai itutubet yenikakit kaituk naka eŋatuny; eyuunio kwaŋin idwe luka Isirael luiboiete koSamaria kotoma agor naka aperis, ka aicoloŋisio nuka aliiri nukotut.”

¹³Inera EJAKAIT Edeke, Edeke loka ajoresio ebe: “Kiirasi, koraut ikajenak kokek loka Yakob.

¹⁴ Naarai kapaaran naeticania Isirael adiakanaretake, Eticani da itemwan luka Bet-el, Ejepio da amumwar nuka etem, Kibirokinos kwap.”

¹⁵Ebala EJAKAIT ebe, “Atiyakini etogo loka aiporo, ka etogo da loka akamu; Eoliorete itogoi luka ikel luka etom, Enaŋete da itogoi lukapolou.”