Read Ateso Amos 4 Bible Online

Amos 4 - Ateso bible

Amos 4

¹“Kopupokis akirot na, yes aituk nuka Basan, Nuejaas oronot loka Samaria, Nueroikinito lukican, nueeuete luilwaritos, Nuebalas ijakakec ebe, ‘Koyautu, kamata!’

²Abu EJAKAIT Edeke kiyapo kolimit alauniteke ebe, Koany, kibunokinete yes apaarasia, Kilemario kigolun, Ka nuedeunos kayesi kilemario kigolun luka ikalokak.”

³Ebala EJAKAIT ebe, “Ilomarete karorwaitin, Ŋinidiopet kakonyeneke, Kiremokinio Karumon.

⁴ “Kopotu Bet-el kodiakasi; Giligal da, kiyatanakis aidiak; Koyaununut asubanakus ŋinitupuruc, Ka idiopet kaŋulutomon ŋunupaarasia auni.

⁵ Kisupurikis asubanit naka aimal naka yenitubuunitoi, Kolimosi ainakineta nuka akote korama kes.” Ebala EJAKAIT Edeke ebe, “Naarai ŋun kitojokito yesi, wu yes idwe luka Isirael.”

⁶ Ebala EJAKAIT ebe, “Kainak eoŋ yes alaunit naka ikel koreriakus kere, Ka amamus da inyamat kaiboisiokus kere: Kwabo mam ipotu koboŋut neajai eoŋ.”

⁷“Etikok eoŋ da akiru kamakus, Koroko esalito ilapio iuni adolokin aisak: Esitepanakini ere ediopet, Mam esitepanakini ere ece; Kotepenenei akiru aibois adiopet, Koono da aibois namam etepenenei akiru.

⁸Kirimenenete ireria iarei arai iuni Mama ejai ere ediopet aimat akipi, Mam imonianakinos.” Ebala EJAKAIT ebe, “Konye mam ipotu koboŋut neajai eoŋ.

⁹ “Kenom yes ketapipirio ka airouroun: Anyam ogagul aipues naka imanikoriakus, Ka amanatakus nuka emusabibu, Ka ikitokus da luka itinin ka iseitunun.” Ebala EJAKAIT ebe: “Konye mam ipotu koboŋut neajai eoŋ.

¹⁰“Kejukak yes atular koipone loko Misiri: Aar ikusikatumunak kekileŋ, Ayaŋaa ikusibalasin; Ketodok aures naka iidukurunukus okumesikus.” Ebala EJAKAIT ebe, “Konye mam ipotu koboŋut neajai eoŋ.

¹¹ “Ebiro ice kayesi, Kwape ebiroria Edeke Sodom ka Gomora, Kosubito yesi bala akalas naalemuna kakim.” Ebala EJAKAIT ebe, “Konye mam ipotu koboŋut neajai eoŋ.

¹² “Kanuka ŋun keswamakini jo nuikote nen, ijo Isirael; Ido naarai keswamakini jo ŋun, ijo Isirael, Kitemokin aisiriama Ekonideke!”

¹³ Naarai koany, ŋol loiluŋuluŋi iroŋan, loesubi ekwam, Loelimokini ituŋanan aomisioke, Loituluori atupuruc amuton, Loicakacakai da aiboisio nukokuju nuka akwap; EJAKAIT, Edeke loka ajoresio, ŋes ekekiror.