Read Ateso Amos 5 Bible Online

Amos 5 - Ateso bible

Amos 5

¹ Ijo ekek loka Isirael, kiira akirot na, Naenera eoŋ akuudian jo.

²“Ebiror abekot naka Isirael; Mam enyouni bobo: Alatakin alupoke; Emamei yenitonyouni.”

³Naarai ebala EJAKAIT Edeke kwanata ebe: “Ere loalomunia elukumit, Ideunos akwatat, Ŋol da loalomunia akwatat, Ideunos itomon, Lukokek loka Isirael.”

⁴ Naarai ebala EJAKAIT ekek loka Isirael kwanata ebe: “Komoata eoŋ, ijarete;

⁵ Konye sirikimoata Bet-el, Karaida alomar Giligal, Sirikitoroto Beer-seba: Naarai abeit elosi Giligal aijoreorio, Epalun Bet-el.”

⁶Komoata EJAKAIT, ijarete; Kinyek anokun kwape akim kokek loka Yosep, Idopori komameun yenitudeŋi kobet-el.

⁷Yes luibelokinete etube araun adwaris, Luicakakinete adolit kwap!

⁸ Komoata ŋes lokesubi aacer Piliades ka Orion, Loibelokini etolim loka atwanare araun atupuruc, Loitumutonori apaaran kakuare; Loenyarauni akipi nuka aŋolol, Ebukokini kes toma akwap; EJAKAIT ŋes ekekiror.

⁹Eŋesari ŋesi lukagogoŋok katular, Tetere ebunokini amudiar ere loegogoŋ.

¹⁰ Elaete ŋin yenitoroni korute, Esacete ŋin yeninera nuitenara.

¹¹ Aso do naarai ipudapudaete lokican, Itelemete ŋes akima, Ipotu kodukoto itogoi luka amor nuegerer, Konye mam iboiete kotoma; Ipotu kiraata amanat nuejok nuka emusabibu, Konye mam imasete ebinokec.

¹² Naarai ajeni kwape ipuatar aibucanaretakus, Kwape da eiliiliotor aronisiokus; Yes luiroikinete ikadolitok, Luitelemenenete ainakineta, Luiremosi luilwaritos awai korute.

¹³Kanuka ŋun ililiŋi locobe kapak kaŋin; Naarai erai apak naerono.

¹⁴ Komoata ajokis, konye mere aronis, Tetere ijarete: Tetere ejaenena EJAKAIT, Edeke loka ajoresio kayes, Kwape kibalatar.

¹⁵ Kolaata aronis, kominas ajokis, Kiticat etube korute: Motoko kosianak EJAKAIT, Edeke loka ajoresio, Aatoŋot naka Yosep,

¹⁶ Kanuka ŋun ebala EJAKAIT, Edeke loka ajoresie, EJAKAIT, kwanata ebe: “Ejaun aimony toma asisiarin kere nuelalak; Ebalasi kotoma orotin kere ebe, ‘Wu okwe! Wu okwe!’ Enyaraunete ekakorion aibworo, Ka ŋul da luepiriaka akuudian, aimony.”

¹⁷ Ebala EJAKAIT ebe, “Ejaun teni aimony amanat kere nuka emusabibu: Naarai etori eoŋ kidiŋikus.”

¹⁸ Itukwi yes luimielas apaaran naka EJAKAIT! Kanukinyo ikototor apaaran naka EJAKAIT? Erai kereka amuton, kwabo mere aica.

¹⁹Bala ekeri etuŋanan kama keŋatuny, Kiriamas kedubu; Arai elomari togo kogoŋakin akan arwatat, Kokonyi ŋes emun.

²⁰Mam kereka apaaran naka EJAKAIT eraun amuton, Kwabo mere aica? Amuton naejesi cucucuc, Naemamei amwekimwek kotoma?

²¹ “Alait, ameni ipucinokus, Kwabo mam esiyalamikinit atukonokinetakus nukaiyamakina.

²²Eebo, karaida iinakinete eoŋ ainakinetakus nuicweio ka ainakineta nuka akiria, Mam acamuni kes: Mam da etei ainakinetakus nuka ainapakin Nuka itiaŋikus luetarioko.

²³Kolema ca ijo eporoto loka ikososineikon; Naarai aŋeri apupun aruo naka adeudeunokon.

²⁴Konye kolelei etube kwape akipi, Ka adolit da kwape aguurut naelelei ikar kere.

²⁵ “Ijo ekek loka Isirael, ipotu kereka koinut eoŋ asuban ka ainakineta kamodiŋ ikar akaisaoŋon?

²⁶Eebo, ipotu kodakata Sikut ekabakakus ka Kaiwan aputosiakus, aacerit naka edekekus, loipotu kiswamaut.”

²⁷Ebala EJAKAIT, loerai ekekiror Edeke loka ajoresio ebe, “Kanuka ŋun, ainakini yes aijoreoreo juwai Damasiko.”