Read Ateso Amos 6 Bible Online

Amos 6 - Ateso bible

Amos 6

¹“Itukwi kes luebwalara koSion, Ka kes da luijamamaete koroŋat loka Samaria, Luejenas luka nakapolon naka atekerin, Luepote lukokek loka Isirael mamakec!

² Kobeata yesi Kalune, koanyutu; Koloto anyoun kanen kiton Kamat lokapolon: Kosodete koloto Gat loka Ipilisitian: Ejokuka kereka kesi aitelekarit ajakanuto nu? Arai ca epol eikorukec aitelekarit eikorukus.

³ Yes luitwalanete apaaran naerono, Luisukunyunete eicoloŋ loka akaje?

⁴Itukwi lueperete oitadan luka ikel luka etom, Luerioros kotutiokec, Luenyamete imerekekin ludidik lulemuna kosipan, Ka itak lulemuna kauj;

⁵Lueyeete ikososinei luutai koramete adeudeu; Luepwakunete bonik iboro lueruos kwape Daudi;

⁶Luemasete ebino kotoma atanya, Luinyonyoanakinos akinyet naejok aitelekar kere; Konye mam ekadakinete aiticanio naka Yosep!

⁷Aso kanuka ŋun ijoreorio kotoma lusodit kaluijoreorio, Eoliori eibwoŋ loka ŋul kaluapotu korioros.”

⁸Eyapo EJAKAIT Edeke elimit elopet, Ebala EJAKAIT Edeke loka ajoresio ebe: “Asaci apolou naka Yakob, Alait itogoike lukapolou: Kanuka ŋun ejaikini ere ka luejaas toma kere.”

⁹Kosodi kanen, arai edeunos ituŋa itomon togo ediopet, etwakete.

¹⁰Nakedakaria papake lodidi, ŋol loiewei ŋes, aitolomun akojo kina ketogo etemari ŋesi ŋol loejai to ketogo atiar, “Eroko idio ejai kajo?” Ebala ŋesi ebe, “Mam,” Kosodi ŋesi atemar atiar, “Kililiŋ: naarai mam kibusakinit oni alimor ekiror loka EJAKAIT.”

¹¹Naarai koany, icorakini EJAKAIT, etiyakin etogo lokapolon emunyumunyuun, ka etogo lodidi da, ebilibiluun.

¹²Ekerete kereka ibalasin katiiba? Ekoriei kereka ituŋanan nen kimoŋin? Konye ipotu yesi kijulakis etube araun epiu, Ka araito nuka adolit da araun adwaris.

¹³Yes luisiyalamikinete aamameak, Luibalas ebe, “Mam kereka kipou kademutu amumwara kagogoŋukosi?”

¹⁴ Naarai koany, ebala EJAKAIT, Edeke loka ajoresio ebe, “Ijo ekek loka Isirael, adakakini ateker asurokin yes: Iroikinete kesi yes anyoun kaneelomarere Kamat, Kiton Aguurut naka Araba.”