Read Ateso Amos 8 Bible Online

Amos 8 - Ateso bible

Amos 8

¹Abu Ejakait EDEKE ketodik kwanata: ido koany, edita loka araito nuka akamu.

² Kotema atiar, “Amos, iany inyo?” Katema atiar, “Edita loka araito nuka akamu.” Kosodi EJAKAIT atemar eoŋ atiar, “Abunok esaŋe ikatuŋa Isirael; Mam bobo enaeenenei kes.

³Ebala EJAKAIT EDEKE ebe, Eraunos ikososinei luka eyekalu aibwolol kapaaran kaŋin; Ipu awat nukatwak; Kaŋiniibois kere ecakanarete kes kiŋa kililiŋete.”

⁴Kiirasi nu, yes luipudapudaete luilwaritos, Luitananete lukican luka akwap.

⁵ Luibalas ebe, “Wori bo edaunor ailamun naka elap, Tetere kigwelari akima? Ka apaaran da nakasabato, Tetere kijaikini akima? Kitidisiari epa, [1] kitopoloori esekel, [2] Kimoda kainineta nukaiŋal.

⁶Tetere kigweli yenikican kepuesa, Ka yenilwaritoi kamuk, Kigwelari da agugu nuka akima.”

⁷ Eyapo EJAKAIT elimit apolou naka Yakob ebe, “Abeit mam kemurwokin adiopet kaswamisiokec.

⁸ Mam kereka akwap emarani kanuka ŋun, Ka ŋinituŋanan da yeniboie kotoma aibworo? Eebo, enyouni cut kwape Ecor; Ilapanari kosodi aboŋori bobo kwape Ecor loko Misiri.”

⁹ Ebala Ejakait EDEKE ebe, “Kosodi kanen, kapaaran kaŋin, Ecolomari akoloŋ kidiŋ paaran, Etumutoni akwap toma aica naka apaaran.

¹⁰ Etuluori ipucinokus aibworo, Ikososineikus kere akuudian; Ayauni ipukoi toma aŋabes kere, Ka epata toma ŋinikou; Etuluori bala aibworo okoku loteluna, Esaŋeke bala apaaran naedwar.”

¹¹ Koany, ebala Ejakait EDEKE ebe, “Epote apaarasia nuejukaria eoŋ ebeli kakwap, Mere ebeli loka inyamat, karaida akure naka akipi, Konye loka akiirar akiro nuka EJAKAIT.

¹²Irimete anyoun kaŋolol kiton aŋolol, Anyoun kagolitomei kiton kide; Ekerete lailo ka laije amoot akirot naka EJAKAIT, Komam edumunete.

¹³“Kapaaran kaŋin iiloros abekon nutemel Ka ikatumunak da kanuka akure.

¹⁴ “Ŋul luiyapoete elimito aronis naka Samaria, Ebalas ebe, ‘Kwape ejaria ekonideke, ijo Dan,’ Ido ebe, ‘Kwape ejaria epone loka Beer-seba,’ Ibiroros kesi, mam bobo enyounete.”