Read Ateso Amos 9 Bible Online

Amos 9 - Ateso bible

Amos 9

¹Abu kaany EJAKAIT ebwoi eiduny ketem: kotema ŋesi atiar, “Kinom acuneta, tetere ilokulokunos apeteta: Kobilibil kes kakwesikec kere; Aari yenegoli kakesi kekileŋ; Emameun idiokakesi yenekeri, Emameun da idiokakesi yenekui.

² “Karaida ebokete adolor Okatwak, Elemuni akakan kes kaŋina; Karaida edokarete kiton akuj, Etodokuni kes kaŋina da.

³ Karaida eŋopete kaidi naka Karumel, Amoi alemun kes kaŋina da; Karaida ibwaio kes kakonyeneka kwap toma aŋolol, Ecorakini emun kaŋina, ekonyi kes.

⁴ Karaida ijoreorio kakonyen nuka lukasurupokec, Ecorakini ekileŋ kaŋina, eari kes; Aseseni kes kakakonye ayaun aronis kwabo mere ajokis.”

⁵ Naarai EJAKAIT, Edeke loka ajoresio, Ŋes ŋol loetirori akwap ecalari, Ibworosi ŋul kere luiboiete kocoma; Enyouni cut kwape Ecor; Eboŋori bobo, kwape Ecor loko Misiri.

⁶Ŋes ŋol loedukokini agolaike akuj, Eticat apetetake kakwap; Ŋol loenyarauni akipi nuka aŋolol, Ebukokini kes akwap, EJAKAIT ŋes ekekiror.

⁷ Ebala EJAKAIT ebe, “Yes idwe luka Isirael, Mam iraas kamakaŋ kwape Itiopian? Mam kereka ketolomuni Isirael kakwap nako Misiri, Ka Ipilisitian anyoun koKaputor, Ka Isurian da koKir?

⁸ Koany, esesenete akonye nuka Ejakait EDEKE ajakanut naerono, Amudiari eoŋ ŋes kakwap. Konye ebala EJAKAIT ebe, Dimarai mam amudiari cut ekek loka Yakob.”

⁹“Naarai koany, ecorakini, Ido ekekei ekek loka Isirael kotoma atekerin kere, Kwape ekekeia akima kotoma aikekeet, Konye mam idiokimait edoi kwap.

¹⁰Etwakete ikadiakanarak kere luka ikatuŋa kekileŋ, Luebalas ebe, ‘Mam aronis kidolikini, karaida airiamakin kaoni.’

¹¹ “Kapaaran kaŋin etonyouni ewema loka Daudi loebiroro, Epuci aciletake; Etonyouni da aapoŋoruke, Eteteuni kwape kapaarasia nukoloŋo.

¹² Tetere irumete kesi aatoŋot naka Edom, Ka atekerin kere nuemaikinio ekakiror.” Ebala kwaŋin EJAKAIT loiswamai ŋun.

¹³ Ebala EJAKAIT ebe, “Koany, epote apaarasia Nuedolokinio ekakorion ekasakan, Ka ŋol loipudapudai emusabibu ŋol loeyei ikinyom; Idonete iroŋan ebino loewiny, Eleleete iukon kere.

¹⁴ Enyakuni bobo aijoreorio naka ikatuŋa Isirael, Edukete ireria lueswapito, iboikinos toma; Iraete kesi amanat nuka emusabibu, Emasete da ebinoke; Ekoriete imanikoria, enyamete da araitokec.”

¹⁵ Ebala EJAKAIT Ekonideke ebe, “Eraikini eoŋ kes akwapukec, Mam bobo erutunio kakwapukec naainakinit kes.”