Read Ateso Yona 1 Bible Online

Yona 1 - Ateso bible

Yona 1

¹ Kobu akirot naka EJAKAIT mama ejai Yona okoku loka Amitai ebe,

² “Konyou, kolot Ninebe, ore ŋol loepol, kiworo aikwenyar ŋes; naarai adolu aronisikec mamakaŋ.”

³ Konye konyou Yona akerear Tarusis anyoun kakonyen nuka EJAKAIT. Kolot Yopa, kodum ameeri naalosi Tarusis: kotac etiai loka erotoke, kikwaŋar, alosit kakes Tarusis, anyoun kakonyen nuka EJAKAIT.

⁴Konye kijuka EJAKAIT ekwam loepol aŋolol, kojaun ekwam loepol noi aŋolol, koapikinite ameeri abilibilun.

⁵Kosodete ikekwaŋak akurianar, kiwone ŋinituŋanan ekedeke; kocakanakisi iboro luajaas ameeri aŋolol, tetere ebeneniar. Konye alomarit Yona atutubet nakotoma naka ameeri; koperi kojotoi.

⁶ Kobu ekapolon loka ameeri neejai ŋesi, kotema ŋes atiar, “Biai bo, ijo loijotoi? Konyou, kiwone Ekonideke! Elemuni eomoomoi Edeke nuwok, kenyeis atwakare.”

⁷ Kotemanaros, ŋinituŋanan aupake atiar, “Bia, kelamilamata eroet, tetere kijenuni akirot kaŋai kidoikinio oni aronis na.” Kilamilamata, kobe Yona eroet.

⁸ Kosodete atemar ŋes atiar, “Kiŋaiŋait jo, kolimokinai sio, akirot kaŋai kidoikinio sio aronis na? Anyoin akoniswam? Laali bo kibunio? Ai bo obukus? Loka lukaŋai bo jo?”

⁹Kotema kes atiar, “Arai eoŋ Eburaniat; ido ayoŋit EJAKAIT, Edeke loka akuj, loasubi aŋolol ka akwap naeonit.”

¹⁰Kosodete ituŋa akurianar noi noi, kotemasi ŋes atiar, “Anyoika ŋun nuisub?” Naarai apotu ituŋa kojenut ebe ekerit ŋesi anyoun kakonyen nuka EJAKAIT, naarai abu kolimok kes.

¹¹Kosodete atemar ŋes atiar, “Anyoika kiswamakini isio jo, tetere aŋolol iyamakin?” Naarai eyata ekwam noi noi kaŋolol.

¹² Kotema kes atiar, “Kodakarai eoŋ, kocakakis aŋolol; kwaŋin iyamakinor aŋolol: naarai ajeni ebe kanukaŋ ŋes kibunokinia yes ekwam lo loepol.”

¹³ Konye kikwanata ituŋa kagogoŋ aboŋor neeonit; konye mam kepedoro; naarai eyata ekwam noi noi kaŋolol aluikinite kes.

¹⁴ Kanuka ŋun kiwoneoto EJAKAIT ebe, “Kiŋaiŋait jo, wu EJAKAIT, kiŋaiŋait, kenyeis isio atwakare kanuka aijar naka etuŋanan kalo, sirikibwaik mamakosi aokot numam aronis: naarai ijo, wu EJAKAIT, iswama kwape itojokitor.”

¹⁵Kodakutu Yona, kocakakis aŋolol: kiyamakin aŋolol.

¹⁶Kosodete ituŋa aiyoŋ EJAKAIT noi noi; koinakis EJAKAIT asubanit, kiyapoto.

¹⁷ Kitemokinite EJAKAIT ibore yenikecor yenepol ailikor Yona; kojaun Yona akoik naka ibore yenikecor apaarasia auni ka akuaresia auni.