Read Ateso Aimario 10 Bible Online

Aimario 10 - Ateso bible

Aimario 10

¹Kotema EJAKAIT Musa atiar,

² “Kiswamau arupepen aarei nuka epuesa; kiswamau ka loerukuk: itwasamai kes kanuka anyaraununena ekodet, ido kanuka alosit anyoun kaneidukurete.

³ Ido naekutanakinere kes, etukokin ekodet kere mama ijai kokek loka ewema loka airiamunun.

⁴ Konye arai kekutakin adiopet, etukokinos ikapolok luepolokinito ilukumin luka Isirael mama ijai.

⁵ Ido naikutakiniata naka elulu, enyounete ituŋa lukoidukurun luka ari nakokide alosit.

⁶Naikutakiniata da naka elulu nakiareit, enyounete ituŋa lukoidukurun luka ari naka eŋalakimak alosit: ekutanakinete aikwenyar kanuka alositokec.

⁷ Konye naekotokinere arukokin ekodet nepepe, ikutanakinete, konye mam ikutakinete naka elulu.

⁸ Odwe luka Aaron, isasedotin, kes ekutanakinete arupepen; ido eraunos ŋun ekisil kamakus ikar kere anatar aturiokus kere.

⁹ Ido nailosioto aitiji lokasurup lokimwanit yes kakwapukus, ŋes ikutakiniata naka elulu karupepen; kiitunio yes kakonyen nuka EJAKAIT Ekusideke, kitajario da yes kakonyen nuka lukasurupokus.

¹⁰ Kapaaran da naka aiyalamakus, kopucinokus lueseunitai, kotoma ailamunun da naka ilapiokus, ikutaaakinete arupepen kainakinetakus nuicweio, kasuban da nuka ainakineta nuka ainapakin; eraunos da kamakus aisiitunet kakonyen nuka Edekekus: arai eoŋ EJAKAIT Ekusideke.”

¹¹ Kosodi kokaru lokiareit, kolap lokiareit, kapaaran naka akaisaarei, aponi kolemarai edou kokuju owema lokalaunan loka aitejenunet.

¹² Kobwota idwe luka Isirael kwape ajaatar alositokec anyoun kamodiŋ naka Sinai; kosipokin edou amodiŋ naka Paran.

¹³ Kogeut alositekec kwape ajaar aicorakinet naka EJAKAIT kama ka Musa.

¹⁴Kisiaununei emedera loka iidukurun luka idwe luka Yuda aitobwosio kwape ajaatar irioŋetakec: ido loapolokinit erioŋeteke ŋes Nason okoku loka Aminadab.

¹⁵Ido loapolokinit erioŋet loka ateker naka idwe luka Isakar ŋes Netanel okoku loka Suar.

¹⁶Loapolokinit erioŋet loka ateker naka idwe luka Sebulun ŋes Eliab okoku loka Kelon.

¹⁷ Koutoi iloin konunukai da ewema lokalaunan; kobwota odwe luka Gereson ka odwe luka Merari luadakenenete ewema lokalaunan.

¹⁸Kitobwotai emedera loka iidukurun luka Reuben kwape ajaatar irioŋetakec: loapolokinit da erioŋeteke ŋes Elisur okoku loka Sedeur.

¹⁹Loapolokinit erioŋet loka ateker naka idwe luka Simeon ŋes Selumiel okoku loka Surisadai.

²⁰Loapolokinit erioŋet loka ateker naka idwe luka Gad ŋes. Eliasap okoku loka Deuel.

²¹Kobwota Ikokatin, kibwokito da iboro luka aibois nakalaunan: ebubuonokinete kwi ewema lokalaunan eriŋa kes kedolo.

²²Kitobwotai emedera loka iidukurun luka idwe luka Epuraim kwape ajaatar irioŋetakec: loapolokinit da erioŋeteke ŋes Elisama okoku loka Amikud.

²³Loapolokinit erioŋet loka ateker naka idwe luka Manase ŋes Gamaliel okoku loka Pedasur.

²⁴Loapolokinit erioŋet loka ateker naka idwe luka Benyamin ŋes Abidan okoku loka Gideoni.

²⁵ Kitobwotai emedera loka iidukurun luka idwe luka Dan loewasie koidukurun kere, kwape ajaatar irioŋetakec: loapolokinit da erioŋeteke ŋes Akieser okoku loka Amisadai.

²⁶Loapolokinit erioŋet loka ateker naka idwe luka Aser ŋes Pagiel okoku loka Ocuran.

²⁷Loapolokinit erioŋet loka ateker naka idwe luka Naputali ŋes Akira okoku loka Enan.

²⁸ Ekonenenei nen alosit naka idwe luka Isirael kwape ajaatar irioŋetakec; kobwota.

²⁹ Kolimok Musa omuranike Kobab, okoku loka Reuel Emidianit ebe, “Kibei isio aibois naabu Edeke kobala ebe, ‘Kainakini yes’: kaupakinos, ka sio da kiswamakini jo ejok: naarai ener EJAKAIT nuejok nuka Isirael.”

³⁰Kotema ŋes atiar, “Mam alosi; konye aboŋori bukosi, mama ejai atekereka.”

³¹ Kotema atiar, “Sirikiinyei sio, keŋaiŋait; naarai ijeni kwape kilosio aidukur toma amodiŋ, kwaŋin iraun ijo akosikonye.

³²Ejaun kwanata, arai kiupakin oni, eebo ejaun kwanata ebe, niniiokis kere nakiswamakini sio EJAKAIT, ŋipeŋin kiswamakini isio da jo.”

³³ Kobwota anyoun komoru loka EJAKAIT alosit naka apaarasia auni; kiŋarenikinite kes asaduku naka aitutuket naka EJAKAIT kalosite naka apaarasia auni, amoikin kes aibois nakiyenunet.

³⁴ Korapiarite kes edou loka EJAKAIT paaran naabwosiata koidukurun.

³⁵ Kosodi naetobwosenenere asaduku kotemanari Musa atiar, “Konyou, wu EJAKAIT, kisiarisiar lukasurupokon; kokerata da lukilaito jo kakonyenekon.”

³⁶ Naeyenununa da kotemanari atiar, “Koboŋu, wu EJAKAIT, neejaas ilukumin itomon luka ilukumin luka Isirael.”