Read Ateso Aimario 11 Bible Online

Aimario 11 - Ateso bible

Aimario 11

¹ Kirurumata ituŋa, kineras nukaronok kaki nuka EJAKAIT: kepupu EJAKAIT, kinep anyunyurake; konok akim naka EJAKAIT kamakec, konyama da atutubeta nukokiŋa nuka iidukurun.

² Komonyata ituŋa mama ejai Musa; kilip Musa EJAKAIT, kodunei do akim.

³Komaikinai ekiror loka aibois ŋin Tabera: [6] naarai abu akim naka EJAKAIT konok kamakec.

⁴ Kikibelik ikatumunak luenyalakina tomakec: komonyata bobo idwe luka Isirael ebe, “Iŋai kitanyami sio akiriŋ?

⁵ Kiitu agaria nukinyamenenei atai kotoma Misiri; akolil, ka amonyon, ka edia, ka itugulun, ka lukinyalet.

⁶Konye kwana iriono ekositau; emamei idiobore da: emamei idiobore yenikitei dimarai emanu lo.”

⁷ Kosubite emanu bala ecokat loka ejad[7] ka aketakanu da koputosi bala atakanu naka ebedola.[8]

⁸Kiledokinos ituŋa atukonokin ŋes, kiriata kakanasia, korukoto kokisun, kipooto kamoti, kilunulunata imugatin: kosubite bala enyamete kesi edia loinyalakinitai akinyet.

⁹ Nakejaununotor akopyo oidukurun kuare, koiaunun emanu da.

¹⁰Kopup Musa ituŋa emonyete kokaliakec kere, ŋinituŋanan kokek loka ewemake: kinep noi anyunyura naka EJAKAIT; kokadak Musa.

¹¹ Kotema Musa EJAKAIT atiar, “Kanukinyo iswamakinia ijo ekonibulesit erono? Kanukinyo da mam eoŋ adumunitor asianut kakonyenekon, tape ijo kisibwoki eoŋ alaŋir naka ituŋa kalu kere?

¹² Eoŋ kapotuun kereka ituŋa lu kere? ido eoŋ kedouni kes? Tape ijo kitemar eoŋ ebe, ‘Kodakaa kes katorobukon kwape edakia ekasaan ikoku yenenaki, aitodol akwap naibu kisiyapoik lukapapaakec.’

¹³ Ai bo alemunia eoŋ akiriŋ naainakini ituŋa lu kere? naarai emonyete mamaka ebe, ‘Koinakinai sio akiriŋ, kanyama.’

¹⁴ Mam eoŋ apedori bon aibwok ituŋa lu kere, naarai kalanirikinito noi.

¹⁵ Arai kiswamanakini ijo eoŋ kwaŋin, keŋaiŋait koar katipet, arai adumunit asianut kakonyenekon; kenyek aanyun ican luetia nen.”

¹⁶ Kotema EJAKAIT Musa atiar, “Kotukokinai ituŋa akaisakanykaarei komakio luka Isirael, luijeni ijo ebe eraas imakio luka ituŋa, luepolokinito kes; koyau kes owema loka airiamunun, tetere ebwoete kaŋina nepepe kajo.

¹⁷ Eiesuni eoŋ da einer kajo kanen; alemari ece komoyo loijaatar ijo, kasodi aibwaikin mamakec; ibwokete nepepe kajo alaŋir naka ituŋa, tetere mam jo bon ibwoki.

¹⁸ Kolimok ituŋa ebe, ‘Kitalaunos eroko moi edoluno, inyamete da akiriŋ; naarai imonyata kaki nuka EJAKAIT ebe, “Iŋai kitanyami sio akiriŋ? naarai ajok kole isio aiboi koMisiri”: kanuka ŋun kiinaki EJAKAIT akiriŋ, inyamete.

¹⁹Mere adiopepaaran bon inyamiata, karaida apaarasia aarei karaida apaarasia akany, karaida apaarasia akaisaarei;

²⁰Konye elap kere, aitodol naelomunia kokumesikus, nekititirikinio cut: naarai iŋeroto EJAKAIT loejai mamakus, komonyete kakonyeneke ebe, “Kanukinyo kinyounio koMisiri?”’ ”

²¹Kotema Musa atiar, “Ituŋa luajai eoŋ mamakec imwaasi ikiliok ilukumin akwat akanykape; ido itema ijo atiar, ‘Ainakini kes akiriŋ, konyama adaun elap kere?’

²² Earakinio isipanin luka amerekekin ka luka aituk aisimonikinia kes? arai bo etukonokinio agaria kere nuka aŋolol aisimonikinia kes?”

²³ Kotema EJAKAIT Musa atiar, “Euriana kereka akan naka EJAKAIT? ianyuni do arai itodolikinio akakiro mama ijai arai bo mam.”

²⁴Koloma Musa, kolimok ituŋa akiro nuka EJAKAIT: kotukok imakio luka ituŋa akaisakanykaarei, kisibwo kes aisirimor Ewema.

²⁵ Kijesun EJAKAIT kotoma odou, kiner kaŋes, kolema da ece komoyo loaiaatar ŋesi, kibwaik omakio akaisakanykaarei: kosodi kiboikin emoyo mamakec, kodwarata, kitanaŋata nepenen.

²⁶ Konye asalito ituŋa iarei oidukurun, ekiror loka ediopet ŋes Eludad, ece da ŋes Medad: kiboikin emoyo mamakec; ido araas kesi luka ŋul kaluewadikatai, konye mam apotu koloto owema: kodwarata koidukurun.

²⁷Koker ekatumunan, kolimok Musa ebe, “Edwarete Eludad ka Medad koidukurun.”

²⁸ Koboŋok Yosua okoku loka Nun, ekejaanakinan loka Musa ameun koiditeuke ebe, “Ejakaitika Musa, kitikok kes.”

²⁹ Kotema Musa ŋes atiar, “Kikokotik ijo kanukaŋ? Tiejok ituŋa kere luka EJAKAIT koraunos inabin, tikibwaiki da EJAKAIT emoyoke mamakec!”

³⁰Koboŋosi Musa ka imakio luka Isirael oidukurun.

³¹ Kokut ekwam loebuni kama ejai EJAKAIT, koyaŋau alurueik kaŋolol, kitodo kes oidukurun, kwaka alosit naka adiopepaaran epuai, ka alosit naka adiopepaaran epuai da, airimor iidukurun, ikubitin [9] iarei kuju kakwap.

³² Konyout ituŋa apaaran ŋin kere, ka akuare da kere, ka apaaran kere naatupakini, kotukonokis alurueik: ŋin yenatukokinit nuikidioko atukokinit ikomerin[10] itomon: koloikis airimor iidukurun.

³³ Aroko akiriŋ ejai okelakec, aroko da enyakao, kinep anyunyura naka EJAKAIT aluikin ituŋa, kodany EJAKAIT ituŋa katular naepol noi.

³⁴ Komaikinai aibois ŋin ekiror Kiburot-kataaba:[11] naarai nen aponi kidaikinai ituŋa luikibelikinito.

³⁵ Kolototo ituŋa anyoun koKiburot-kataaba kodoloto Kaserot; kiboikinos Kaserot.