Read Ateso Aimario 12 Bible Online

Aimario 12 - Ateso bible

Aimario 12

¹ Koluikis Miriam ka Aaron Musa koinerekec kanuka aberu naKusit naamanyit ŋesi: naarai abu komany aberu naKusit.

² Kotemasi atiar, “Enerata kereka EJAKAIT ka Musa bon? Mam ŋes kinerit kasio da?” Kopup EJAKAIT ŋun.

³ Kiyapeperana Musa noi adepar ituŋa kere luajaas akwapin.

⁴ Atipet kotema EJAKAIT Musa ka Aaron ka Miriam da, atiar, “Kopotu yes iuni owema loka airiamunun.” Kolomasi kesi iuni.

⁵ Kijesun EJAKAIT kotoma opir loka edou, kobwo kokek loka Ewema, konyara Aaron ka Miriam: kikunyakis kesi.

⁶ Kotema atiar, “Kiirasi kwana akakiro: arai ejai enabi kotomakus, eoŋ EJAKAIT etejenun mamake kotoma otapo eneri kaŋes kotoma airuj.

⁷ Mam ekakejaanakinan Musa ikoni nen; erai lomunot kotoma togoka kere:

⁸ Kinera kaŋes kaituke, kaitebeikin, mere kakiro nuimunonoro; ido eanyuni ŋesi asima naka EJAKAIT: aso kanukinyo mam ipotu kokuriakarotor aluikin ekakejaanakinan Musa koinerekus?”

⁹Kinep anyunyura naka EJAKAIT aluikin ŋes; konyou.

¹⁰ Konyou da edou kokuju owema; ido koany, ebokoror akuan naka Miriam atapon: kite Aaron Miriam, ido koany, korai nakatapon.

¹¹ Kotema Aaron Musa atiar, “Wu okwe ekajakait, keŋaiŋait, sirikisibwok sio aronis, naarai kiswama nukabaŋaanut, kidiaka da.

¹² Keŋaiŋait, kinyeik ŋesi aisub bala yenikatwan, yenemunauna atutubet naka akuanake elomuni kakoik naka totoke.”

¹³ Kiworo Musa mama ejai EJAKAIT atiar, “Kitaŋaleu ŋes, wu Edeke, keŋaiŋait.”

¹⁴ Kotema EJAKAIT Musa atiar, “Arai kimuikinit papake ŋes aimul oreeteke, ti kereka mam ŋes kiruma ileic apaarasia akanykaarei? Ibus kogolokinai ŋes kiŋa kiidukurun apaarasia akanykaarei, akaulo kaŋun inyakunio ŋes toma bobo.”

¹⁵ Kogoloroi Miriam kiŋa kiidukurun apaarasia akanykaarei: mam ituŋa da apotu koloto aitodol naenyakunere bobo Miriam toma.

¹⁶Ido akaulo kaŋun, konyout ituŋa koKaserot, kidukuroto amodiŋ naka Paran.