Read Ateso Aimario 13 Bible Online

Aimario 13 - Ateso bible

Aimario 13

¹Kotema EJAKAIT Musa atiar,

² “Kijuka ituŋa, korota akwap naka Kanaan, naainakini idwe luka Isirael: ijukari etuŋanan loka ninireker naka lukapapaakec, ŋolidiopet loepol kamakec.”

³Kijuka Musa kes anyoun kamodiŋ naka Paran kwape ajaar aicorakinet naka EJAKAIT: kes kere ituŋa luapolokinito idwe luka Isirael.

⁴Ikecekiroria da lu: loka ateker naka Reuben ŋes Samua okoku loka Sacur,

⁵loka ateker naka Simeon, Sapat okoku loka Kori.

⁶ Loka ateker naka Yuda, Kaleb okoku loka Yepune.

⁷Loka ateker naka Isakar, Igal okoku loka Yosep.

⁸Loka ateker naka Epuraim, Kosea okoku loka Nun.

⁹Loka ateker naka Benyamin, Paluti okoku loka Rapu.

¹⁰Loka ateker naka Sebulun, Gadiel okoku loka Sodi.

¹¹Loka ateker naka Yosep, ŋes leka ateker naka Manase, Gadi okoku loka Susi.

¹²Loka ateker naka Dan, Amiel okoku loka Gemali.

¹³Loka ateker naka Aser, Setur okoku loka Mikael.

¹⁴Loka ateker naka Naputali, Nabi okoku loka Bopasi.

¹⁵Loka ateker naka Gad, Geuel okoku loka Maki.

¹⁶ Ŋul kes ikiroria luka ituŋa luejukari Musa airot akwap. Komaik Musa Kosea okoku loka Nun Yosua.

¹⁷ Kijuka Musa kes airot akwap naka Kanaan, kotema kes atiar, “Kodokasi korot loka ari naka Eŋalakimak, kodokasi oroŋan:

¹⁸Koanyut akwap, kwape eputor; ka ituŋa luiboiete kotoma, arai eraas luegogoŋ arai enonok, arai ikidioko arai ipu;

¹⁹Ido kwape ejaar akwap naiboioto kesi kotoma, arai ejok arai erono; kwape ejaatar da ireria luiboioto kesi kotoma, arai ludukurun, arai luebwaunitai kabwas;

²⁰ Kwape ejaar akwap, arai naapusuk arai naakurae, arai ejaas amagoron, arai emameete, Kotitiŋikis yesi, koyauniata da adioraito nuka akwap.” Kerai na apak naka imusabibun luageenenete atiokore.

²¹Kosodete kodokasi korota akwap anyoun kamodiŋ naka Sin aitodol Rekob kiton alomaret Kamat.

²² Kodokasi kari naka Eŋalakimak, kodoloto Keburon; ajaas nen Akiman, Sesai ka Talimai, idwe luka Anak. (Adukitai Keburon ikar ikanykaarei eroko Soan kotoma Misiri.)

²³Kodolut aditot naka Esukot, kojeput kanen atenut naajai aibuŋet adiopet naka emusabibu, kidielata iarei kakitoi; koyautu da araito nuka ekamamaga, ka nuka etini.

²⁴Komaikinai aibois ŋin aditot naka Esukol,[12] kanuka aibuŋet naajeparete idwe luka Isirael kanen.

²⁵Koboŋosi kairot akwap kedaunos apaarasia akaisaoŋon.

²⁶Kolototo kopotu neejai Musa ka Aaron, ka ekodet kere loka idwe luka Isirael, kamodiŋ naka Paran, koKades; koinut kes ka ekodet kere akirot, kitodikis da kes araito nuka akwap.

²⁷ Kolimokis ŋes ebe, “Kidol akwap naibu ijo kijuka sio, abeit erai naeleleete akile ka esik; ido nu kes araitoke.

²⁸ Konye ituŋa luiboiete kakwap eraas luegogoŋ, ireriakec da ebwaitai, epolok noi: bobo da kipou kaanyutu kaŋina idwe luka Anak.

²⁹ Iboie Amalek kakwap naka ari naka Eŋalakimak; iboie da Ekitit ka Eyebusit ka Emorait koroŋan: iboie da Ekanaanit kariri naka aŋolol, ka ariri naka Yorodan da.”

³⁰ Kisililiŋ Kaleb ituŋa kakonyen nuka Musa, kotema atiar, “Kadokasi katipet, keruma ŋes; naarai kipedori cut aipikor.”

³¹Konye ituŋa luaupara kaŋes kotemasi atiar, “Mam kipedori asurokin ituŋa; naarai egogoŋ kesi adepar oni,”

³² Koinut idwe luka Isirael akiro nueroko nuka akwap naapotu korota, ebe, “Akwap nakitoro kirosi, erai akwap naenyamanari luiboiete kotoma; ituŋa da lukipou kaanyutu kotoma eraas ituŋa luikososoete.

³³ Kipou kaanyutu kaŋina da Inepilin, [13] odwe luka Anak, luelomunete koInepilin: kirai kakonyenekosi bala ibeerei, ido kirai kwaŋin kakonyenekec da.”