Read Ateso Aimario 14 Bible Online

Aimario 14 - Ateso bible

Aimario 14

¹Kodelo ekodet kere; komonya ituŋa akuare ŋin.

² Kirurumata idwe luka Isirael kere aluikin Musa ka Aaron da: kobala ekodet kere kes ebe, “Tiejok arai katwakikinito akwap nako Misiri! Tiejok da arai katwakikinito amodiŋ na!

³Kanukinyo kiyaunia EJAKAIT sio akwap na, adanyio kekileŋ? Anorokosi ka ikosidwe ludidik da araun lumejan: mam tiejok sio aboŋor Misiri?”

⁴ Kotemanaros bonik atiar, “Kaseutu ekeŋarenon, kaboŋosi Misiri.”

⁵Kosodi Musa ka Aaron aibirokin kwap ebuburia, kakonyen nuka ekodet kere loka idwe luka Isirael.

⁶Apotu Yosua okoku loka Nun ka Kaleb okoku loka Yepune luaraas iarei kaŋul kaluarosito akwap, koeilieilata ikecenapen:

⁷Kolimokis ekodet kere loka idwe luka Isirael ebe, “Akwap, nakitor kirosi, erai akwap naitelekarit kajokis.

⁸ Arai kisiyalamikinit oni EJAKAIT, kiyai ŋesi oni akwap ŋin, kainakini oni da; akwap naeleleete akile ka esik.

⁹ Konye sirikipaliikis EJAKAIT, karaida aiyoŋ ituŋa luka akwap; naarai eraas atapawok; alemar etorubekec kamakec, ejai EJAKAIT nepepe kaoni: sirikiyoŋa kes.”

¹⁰ Konye akoto ekodet kere aibiribir kes kamor. Kosodi aibuses naka EJAKAIT aitakanikin idwe kere luka Isirael kowema loka airiamunun.

¹¹ Kotema EJAKAIT Musa atiar, “Itodolete ai ituŋa lu kamwanitos eoŋ? Itodolete da ai mam keyuunitos, kanuka aanyuneta kere nueswamak kes?

¹² Adanyi kes katular, ademari kes airumet, etuluori jo ateker naepol naegogoŋ adepar kes.”

¹³ Kotema Musa EJAKAIT atiar, “Aso epupunete Imisirian ŋun: naarai ijo iyauni ituŋa lu kotoma apedorikon kamakec;

¹⁴ Elimokinete da luiboiete kakwap kaŋin: apuput ebe ijai ijo EJAKAIT kidiŋ kituŋa kalu: naarai kianyununo jo EJAKAIT kakonyen, ebwoi da ekonidou kamakec, iŋarenikinit kes, kepir loka edou paaran, ka epir loka akim kuare.

¹⁵Aso arai kiara ijo ituŋa lu adaun cut, etemarete atekerin nuapuputu eemutukon atiar.

¹⁶ ‘Kanu naarai mam EJAKAIT abu kopedo ayaun ituŋa ŋul toma akwap naabu kiyapoik kes, ŋes aarakinia kes amodiŋ.’

¹⁷Aso keŋaiŋait, kopoloor apedor naka EJAKAIT kwape ejaatar nuibu ijo kiner ebe,

¹⁸ ‘Iyapi EJAKAIT anyunyurikin, ileleba aitim, isioniei numam adolit ka aibucareta, lomam imarakini luegwaunito akirot araun ikadolitok; idopei kodwe numam adolit nuka lukapapakec, aitodol atur nakiwuniet ka nakiwoŋonet.’

¹⁹Keŋaiŋait, kisioni numam adolit nuka ituŋa kalu kwape ejaar akoniitim naepol, kwape ibu kisionio ituŋa lu, anyoun koMisiri aitodol kwana.”

²⁰ Kotema EJAKAIT atiar, “Esioni kwape ejaar akonikirot:

²¹ Konye abeit, kwape ajaria, ido kwape ilelebunor akwap kere aibuses naka EJAKAIT;

²² Naarai ituŋa ŋul kere luaanyutu akaibuses, ka aanyunetaka da, nuabu keswama koMisiri, kamodiŋ da, konye kakodokodata eoŋ irwan nu atomon, komam epupete ekaporoto;

²³ Abeit mam eanyunete cut akwap naabu keyapoik lukapapaakec, karaida yenabu kamwan eoŋ kere mam eanyuni.

²⁴ Konye Kaleb ekakejaanakinan, naarai ajaas kemoyo ece, ido karima eoŋ cut, ayai eoŋ ŋes akwap naabu ŋesi kolosite; aurike da irumi ŋes.

²⁵Iboiete Emalekait ka Ekanaanit kaditot: kibelokinos moi, koloto amodiŋ korot loebei Aŋolol Nakareŋan.”

²⁶Kotema EJAKAIT Musa ka Aaron atiar,

²⁷ “Etodoli ai atitiŋikinit ekodet lo lokaronon, lokerurumakinit eoŋ? Apup airuruma naka idwe luka Isirael, nakerurumakinitotor eoŋ.

²⁸ Kolimok kes ebe, Inera EJAKAIT atiar, Kwape ajaria, abeit kwape kilimokiniata akika, kwape kwaŋin da keswamakiniata:

²⁹ Edoenenete atesinakus amodiŋ na; kere da luaponi kimarai kayesi, kwape ajaar etiaikus kere, ageun kaluka ikar akaisaarei ka luedeparito, lukerurumakis eoŋ.

³⁰ Abeit mam ilomarete akwap, naabu eoŋ kario akakan ebe kesiboikini yes toma, dimarai Kaleb okoku loka Yepune ka Yosua okoku loka Nun.

³¹ Konye idwekus ludidik luibalasi yesi ebe eraunos lumejan, kes etolomari eoŋ, ido kes ejenunete akwap nainero yesi.

³² Konye yes, edoenenete akusitesin amodiŋ na.

³³ Idwekus da eraunos ikerimok kotoma amodiŋ ikar akaisaoŋon, ibwokete eporokus, aitodol naedaikinotor atesinakus amodiŋ.

³⁴ Kwape ejaar etiai loka apaarasia nuirosiata yes akwap, kes apaarasia akaisaoŋon, kanuka ŋinipaaran ekaru, ibwokiata numam adolitekus, kes ikar akaisaon on, ijenunete da apalunika.

³⁵ Ener eoŋ EJAKAIT, abeit eswamakini eoŋ ŋun ekodet lo kere lokaronon, loetukokina nepepe asurokin eoŋ: amodiŋ na ŋes edaikinos, ido nen etwakikinete.”

³⁶ Ka ituŋa da, luejukarit Musa airot akwap, luaboŋunete, kosodete aisirurumakin ŋes ekodet kere, kanuka ainun akiro nueroko aitoronia akwap.

³⁷ Ituŋa ŋupeŋul luayaunete akiro nueroko aitoronia akwap, kotwaka atular kakonyen nuka EJAKAIT.

³⁸ Konye Yosua okoku loka Nun, ka Kaleb okoku loka Yepune, kes apotu kojarata kotuŋa lualosito airot akwap.

³⁹ Kolimok Musa idwe kere luka Isirael akiro ŋun: kibworoto ituŋa noi.

⁴⁰ Kodilokis anyoun tupuruc, kodokasi kuju oroŋat, kobalas ebe, “Koany, isio lu, kidokari do aibois nakisumunit EJAKAIT: naarai kidiaka.”

⁴¹ Kotema Musa atiar, “Kanukinyo ipaariata kaicorakinet naka EJAKAIT, naarai emamuun asuliany?

⁴² Sirikidokasi, naarai mam EJAKAIT ejai kidiŋikus; kinyeis adanyio kakonyen nuka lukasurupokus.

⁴³ Naarai ejaas ŋina kiŋarenikus Emalekait ka Ekanaanit, kidanyio kekileŋ: naarai iboŋut katupit EJAKAIT, kanuka ŋun mam EJAKAIT ejaun kayes.”

⁴⁴Konye koŋasikinos adokar kuju oroŋat: kwabo mam asaduku naka aitutuket naka EJAKAIT, ka Musa, apotu konyout koidukurun.

⁴⁵Kosodete Emalekait ka Ekanaanit lueboienenete koroŋat kaŋol aijesun, kodanya kes, kibirut kes, aitodol Koruma.