Read Ateso Aimario 16 Bible Online

Aimario 16 - Ateso bible

Aimario 16

¹ Kosodete Kora, okoku loka Isekar, okoku loka Kokat, okoku loka Lebi, nepepe ka Datan ka Abiram, odwe luka Eliab, ka On, okoku loka Pelet, odwe luka Reuben, ayaŋaar ituŋa:

² Konyout kakonyen nuka Musa, nepepe kice kodwe luka Isirael, ikapolok akwat aarei ka akaisakany luka ekodet, luanyaraunitai aurianet, ituŋa luajenas;

³ Kotukonokinos aluikin Musa ka Aaron, kolimokis kes ebe, “Idakakina yes nuipu, kwabo elaunit ekodet kere, ŋinidiopet kakesi, ejai EJAKAIT kakes: kanukinyo do idakakinotor yesi ikulepek aitelekar atukot naka EJAKAIT?”

⁴ Kepupu Musa, kibiror ebuburia:

⁵ Kolimok Kora ka ipaupake kere ebe, “Moi tupuruc itoduni EJAKAIT lueraas luke, ka yenikalaunan, isudunyikini mamake: ŋol Loeseuni ŋesi isudunyikini mamake.

⁶Kiswamata kwanata; koyaŋaasi yesi aisupuruneta, Kora ka ipaupake kere;

⁷Kibwaikis akim toma, kibwaikis da lukisupurununo toma kakonyen nuka EJAKAIT moi: ejaun kwana ebe etuŋanan loeseuni EJAKAIT, elauni ŋol; idakakina yes nuipu, yes odwe luka Lebi.”

⁸Kotema Musa Kora atiar, “Kopupokisi do yes odwe luka Lebi:

⁹ Erai kereka akirot naedit kamakus, Edeke loka Isirael agitun yes kokodet loka Isirael, aisukunyikin yes mama ejai; aijaanakin toma owema lokalaunan loka EJAKAIT, ka abwoenen kakonyen nuka ekodet aijaanakin kes;

¹⁰Kisukuny ŋesi jo, ka iinacanakon kere odwe luka Lebi nepepe kajo? Imootos yesi da esasedotene?

¹¹ Kanuka ŋun ijo ka ipaupakon kere itukonokinos nepepe aluikin EJAKAIT: ka Aaron da, iŋai bo ŋesi loirurumakinitos yesi?”

¹²Kijuka Musa anyaraun Datan ka Abiram, odwe luka Eliab: kotemasi atiar, “Mam sio kibuni:

¹³ Erai kereka akirot naedit ijo aitonyoun sio kakwap naeleleete akile ka esik, aarakin sio amodiŋ, kwabo ituluoro bon ekapolon lokiyait sio?

¹⁴ Bobo da mam jo kitolomarit sio akwap naeleleete akile ka esik, karaida ainakin airum imanikoria ka amanat nuka imusabibun: mere imod ijo ituŋa lu? mam sio kibuni.”

¹⁵ Konyunyurikin Musa noi, kolimok EJAKAIT ebe, “Sirikicam ainakinetekec: mam eoŋ ayanaarit adiopesigiria kamakec, karaida aisirieb idiopet kakesi.”

¹⁶Kotema Musa Kora atiar, “Kojaun ijo moi ka ekodetekon kere, akonyen nuka EJAKAIT, ijo ka kes, ka Aaron:

¹⁷Koyaŋa ŋinituŋanan kayesi akeisupurunet kibwaik lukisupurununo toma, koyaŋaasi mama ejai EJAKAIT ŋinituŋanan akeisupurunet, aisupuruneta akwat aarei ka akaisakany; ijo da, ka Aaron, ŋinituŋanan akeisupurunet.”

¹⁸Koyaŋaasi ŋinituŋanan akeisupurunet, kibwaikis akimian toma, kibwaikis da lukisupurununo, kobwaata kokek loka ewema loka airiamunun nepepe ka Musa ka Aaron.

¹⁹ Kotukok Kora ekodet kere kiteos kakes kokek loka ewema loka airiamunun: kitakanikin aibuses naka EJAKAIT ekodet kere.

²⁰Kotema EJAKAIT Musa ka Aaron atiar,

²¹ “Kogitaros yesi ka ekodet kalo, kamudia kes katipet.”

²² Kibiroros ebuburia, kotemasi atiar, “Wu Edeke, Edeke loka imoyon luka lukajarak kere, inyunyurikini ijo ekodet kere kediaka ediopetuŋanan?”

²³Kotema EJAKAIT Musa atiar,

²⁴“Kolimok ekodet ebe, Konyoutu kowema loka Kora, ka Datan ka Abiram.”

²⁵Konyou Musa kolot mama ejai Datan ka Abiram; kotupito da ŋes imakio luka Isirael.

²⁶ Kiner kekodet atiar, “Konyoutu, keŋaiŋaito, koweman luka ituŋa lu lukaronok, ido sirikitina idioborekec, kinyeis amudiario kotoma adiakaretakec kere.”

²⁷ Konyout kowema loka Kora, ka Datan ka Abiram, kaŋoliwai: kolomut Datan ka Abiram, kobwaata kokekia luka iwemanakec, ka akeceŋor ka odwekec, ka ikecedwe ludidik.

²⁸ Kotema Musa atiar, “Ijenunete kanu ebe EJAKAIT kejukunit eoŋ aswam aswamisio nu kere; naarai mam eswamat kes kanukaŋ.

²⁹ Arai ketwaka ituŋa lu atwanare naka ituŋa kere, ido arai kedoikis kes nuedoonokinete ituŋa kere; ŋes atemar ebe mere EJAKAIT kejukunit eoŋ.

³⁰ Konye arai kiswamau EJAKAIT ibore yenikitetet, kooŋ akwap akeituk, kosodi ailikor kes, ka luejaatar kere, kolomasi aipany ejarete; ŋes do ijenuniata ebe amwaŋa ituŋa lu EJAKAIT.”

³¹ Kosodi kanen, enetakini ŋesi einer akiro ŋun kere, kocila akwap naabwoiata kesi:

³² Kooŋa akwap aitukuke, kiliko kes, ka ikaliakec ka ituŋa kere luaraas luka Kora, ka ikeceboro kere.

³³Kwaŋin kes, ka luajaatatar kere kolomasi aipany ejarete: kobunak akwap kes, kooliosi katukot.

³⁴Kokera luka Isirael kere luerimorito kes kepuput aimonyokec: naarai abakas ebe, “Kinyek akwap ailikor oni da.”

³⁵ Kobu akim kama ejai EJAKAIT, konyama ituŋa ŋul akwat aarei ka akaisakany luainakinete lukisupurununo.

³⁶Kotema EJAKAIT Musa atiar,

³⁷“Kolimok Eleasar okoku loka Aaron esasedoti kolema aisupuruneta kaneecweere, kiweliwel akim; naarai eraas nukalaunak;

³⁸ Aisupuruneta ŋun nuka ikadiakanarak nuegelito aijarakec, itatai kes aipadalikin arapia etem; naarai apotu koinakis kes mama ejai EJAKAIT, kanuka ŋun eraas nukalaunak: ido eraunos aanyunet mama ejaas idwe luka Isirael.”

³⁹Koyaŋa Eleasar esasedoti aisupuruneta nuka aisinit, nuainakinito luecweio; kotatata kes aitaraun arapetait naka etem:

⁴⁰ Araun aisiitunet mama ejaas idwe luka Isirael, ebe sirielonwait lomam erai loka aur naka Aaron, kikunyu aicwe lukisupurununo kakonyen nuka EJAKAIT; kinyek aiput Kora ka ipaupake: kwape kelimokinia ŋes EJAKAIT kama ka Musa.

⁴¹ Konye kapaaran naatupakini kirurumak ekodet kere loka idwe luka Isirael Musa ka Aaron, ebe, “Iarata yesi ituŋa luka EJAKAIT.”

⁴² Kosodi ketukokin atukot aluikin Musa ka Aaron, kiteoto owema loka airiamunun: ido koany, korapia edou, kotakanu da aibuses naka EJAKAIT.

⁴³Kopotu Musa ka Aaron kiŋaren kewema loka airiamunun.

⁴⁴Kotema EJAKAIT Musa atiar,

⁴⁵ “Konyou kokodet kalo, kamudia kes katipet.” Kibiroros ebuburia.

⁴⁶ Kotema Musa Aaron atiar, “Koyaŋa aisupurunetekon, kibwaik akim nakotem toma, kibwaik da lukisupurununo, koyaŋa katipet neejai ekodet, kolueo kes: naarai alomu anyunyura kama ejai EJAKAIT; ageu da atular.”

⁴⁷Koyaŋa Aaron kwape alimokinia Musa, koker kidiŋ kekodet; ido koany, ageuna atular kotuŋa: kibwaik lukisupurununo, koluc ituŋa.

⁴⁸ Kobwo ŋesi kokidiŋ kalukatwak ka lukajarak; kitanaŋai atular.

⁴⁹Ido luapotu kotwaka kanuka atular emwaasi ilukumin itomon ka luoŋon ka akwat akanykaarei, komam imarakinitai luatwakete kanuka akiro nuka Kora.

⁵⁰Koboŋo Aaron mama ejai Musa okek loka ewema loka airiamunun: kitanaŋai atular.