Read Ateso Aimario 17 Bible Online

Aimario 17 - Ateso bible

Aimario 17

¹Kotema EJAKAIT Musa atiar,

²“Kinera kidwe luka Isirael, kolema kamakec ibelai, ediopet kanuka ŋiniteker naka lukapapaakec, loka ikapolokokec kere kwape ejaatar atekerin nuka lukapapaakec, ibelai itomon ka luarei; kiwadik ekiror loka ŋolituŋanan obelake.

³Iwadikai da ekiror loka Aaron obela loka Lebi: naarai ejaun ebela ediopet kanuka ŋolikapolon loka ateker naka lukapapaakec.

⁴ Iperikini kes toma owema loka airiamunun kiŋaren kasaduku naka aitejenunet, nekiriamunun kajo.

⁵ Kosodi ejaun kwanata ebe, etuŋanan loaseuni eoŋ, elibi ebelake: etanaŋi da airuruma naka idwe luka Isirael, nakirurumakinitotor jo.”

⁶Kiner Musa kidwe luka Isirael, koinakis ikapolokokec kere ŋes ibelai, ediopet kanuka ŋolikapolon, kwape ejaatar atekerin nuka lukapapaakec, ibelai itomon ka luarei: ajai ebela loka Aaron da obelaikec.

⁷ Kiperik Musa ibelai kakonyen nuka EJAKAIT kowema loka aitejenunet.

⁸ Kosodi kapaaran naatupakini, koloma Musa toma owema loka aitejenunet; ido koany, eburukunyit ebela loka Aaron kanuka ateker naka Lebi, alibunit da, kiturote atur, koraite da araito nukakokok.

⁹Koyau Musa ibelai kere kakonyen nuka EJAKAIT mama ejaas idwe kere luka Isirael: kosesenata, koyaŋa da ŋolituŋanan ekebela.

¹⁰ Kotema EJAKAIT Musa atiar, “Kinyaka ebela loka Aaron kiŋaren kaitejenunet, ainadio araun aanyunet mama ejaas idwe lukepali: tetere itanaŋi airurumakinitekec eoŋ, kinyeis atwakare.”

¹¹Kiswama Musa kwaŋin: kwape kicorakinia EJAKAIT ŋes, kiswama kwaŋin.

¹²Kotemasi idwe luka Isirael Musa atiar, “Koany, kiolio, kitwaka, kitwaka isio kere.

¹³ Ituŋanan kere yenikunyakini, yenikunyakini owema lokalaunan loka EJAKAIT etwani: kioliori ca isio kere?”