Read Ateso Aimario 19 Bible Online

Aimario 19 - Ateso bible

Aimario 19

¹Kotema EJAKAIT Musa ka Aaron atiar,

² “Na ŋes aicorakinet naka ekisil naecoraki EJAKAIT ebe, Kinera kidwe luka Isirael, koinut jo ataok nakareŋan naemamei akemer, komam eŋwalit, namam cut edakit ajookot:

³ Iinakinete ŋes Eleasar esasedoti, itolomari ŋes kiŋa kiidukurun, koarai kakonyeneke:

⁴ Idomakini Eleasar esasedoti ekebokorit toma aokotoke, ebwatanakini aokotoke kiŋaren kewema loka airiamunun irwan akanykaarei:

⁵ Icweikinio ataok kakonyeneke; emukuleke, akiriŋike, aokotoke, ka ikijitike da, icweikinio:

⁶ Elemuni esasedoti akitoi naka eres, ka esop, [17] ka eusi loereŋ, kosodi acakakin akim naicweere ataok.

⁷ Kosodi do esasedoti ailot ikenapen, ka ailoŋ akekuan kakip, akaulo kaŋun eboŋuni oidukurun, ido esali esasedoti erai lomam elai aitodol eboŋ.

⁸Ido ŋol loecwei ataok ilosi ikenapen kakip, ka ailoŋ da akekuan kakip, esali erai lomam elai aitodol eboŋ.

⁹ Etukonokini etuŋanan loelai ekurwon loka ataok, kosodi abukokin aibois naelai kokiŋa kiidukurun, idario ŋes kanuka atukot naka idwe luka Isirael araun akipi nuitesegaarete: erai ainakinet naka adiakaret.

¹⁰Ilosi ŋol loetukonokini ekurwon loka ataok inapeneke, esali da erai lomam elai aitodol eboŋ: eraun ekisil mama ejaas idwe luka Isirael ka imoit yeniboienenei kamakec ikar kere.

¹¹ “Yenetirori akuan naka yenikatwan kere eraun yenimam elai adaun apaarasia akanykaarei:

¹² Italaun ŋipeŋin kanen kapaaran nakiwuniet, ido kapaaran nakikanyetekaarei eraun yenelai: konye arai mam italauna kapaaran nakiwuniet, ŋes atemar mam eraun yenelai kapaaran nakikanyetekaarei.

¹³ Ŋinituŋanan yenetirori akuan nakatwan naka ituŋanan yenetwanit, komam italauni akekuan, etisilian ŋin ewema lokalaunan loka EJAKAIT; ido egelario ituŋanan ŋin koIsirael: naarai mam ŋes aponi kobwatakinai akipi nuitesegaarete, eraun yenimam elai; esalakini amamus ailake mamake.

¹⁴Lo ŋes ekisil arai ketwana ituŋanan kotoma owema; nlnidiopet yenelomari owema ŋol, ka ŋinidiopet yenejai toma owema eraun yenimam elai apaarasia akanykaarei.

¹⁵ Ŋinimot da namam erapap, naemamei arapetait kaitukuke, erai namam elai.

¹⁶Ido ŋinituŋanan yenejai ais yenetirori ituŋanan yenearitai kekileŋ, arai akuan nakatwan, arai akoit naka ituŋanan arai ates, eraun yenimam elai apaarasia akanykaarei.

¹⁷Ŋul lumam elaete elemunete ekurwon loicweere ainakinet naka adiakaret, ka akipi nueleleete ibwaikinio kere toma amot:

¹⁸ Elemuni ituŋanan yenelai esop, idomakini toma akipi ŋun, kosodi abwatakin owema, ka amoti kere, ka ituŋa luajaas nen: ebwatakini da ŋin yenatirorit akoit, arai yenearitai, arai yenikatwan, arai ates:

¹⁹ Ebwatakini yenelai yenimam elai kapaaran nakiwuniet, kapaaran da nakikanyetekaarei: kapaaran da nakikanyetekaarei italauni ŋes; ilosi ikenapen, iloŋi ilopet kakip, eraun yenelai eboŋ.

²⁰ “Konye ituŋanan yenimam elai, komam italauni akekuan, egelario ituŋanan ŋin kokidiŋ kekodet, naarai etisilian ŋin aibois nakalaunan naka EJAKAIT: naarai mam ŋes ebwatakinitai akipi nuitesegaarete; erai yenimam elai.

²¹Eraun ekisil lomam edaun kamakec. Ŋin yenikabwatan akipi nuitesegaarete ilosi ikenapen; ŋin yenetirori akipi nuitesegaarete eraun yenimam elai aitodol eboŋ.

²² Ŋinibore yenetirori yenimam elai eraun ŋin da yenimam elai; ŋinituŋanan yenetirori ŋin eraun yenimam elai aitodol eboŋ.”