Read Ateso Aimario 20 Bible Online

Aimario 20 - Ateso bible

Aimario 20

¹ Kodoloto idwe luka Isirael, ekodet kere, amodiŋ naka Sin kolap losodit: kiboikinos ituŋa Kades; kotwanik Miriam nen, kidaikinai da nen.

² Komamikis ekodet akip: kotukonokinos nepepe aluikin Musa ka Aaron.

³ Kitoŋolopata ituŋa Musa, kobalas ebe, “Tiejok arai katwakito naatwakiata iinacanakosi kakonyen nuka EJAKAIT!

⁴ Kanukinyo iyauniata atukot naka EJAKAIT amodiŋ na, atwanikin ne, isio ka ibarenekosi da?

⁵Kanukinyo kitolomuniata sio koMisiri, ayaun sio aibois na nakaronon? emameete aibois na ikinyom, karaida itinin, karaida imusabibun, karaida akamamagan; emameete da adisikip numatan.”

⁶ Konyoutu Musa ka Aaron kakonyen nuka ekodet kolototo okek loka ewema loka airiamunun, kibiroros ebuburia: kitaanyikin kes aibuses naka EJAKAIT.

⁷Kotema EJAKAIT Musa atiar,

⁸ “Kolem ebela, kotukok ekodet, ijo ka Aaron onacekon, kinerata yesi katiiba kakonyenekec, ebe koinak akekipi; iinuni do kes akipi nuelomunete katiiba: kwaŋin iinakini ekodet ka ibarenekec aimat.”

⁹ Kolem Musa ebela kakonyen nuka EJAKAIT, kwape kicorakinia.

¹⁰ Kotukokis Musa ka Aaron ekodet kakonyen nuka atiiba, kotema kes atiar, “Aso kopuputu, yes lukepali; kitolomuni isio akipi kati iba kana kanukus?”

¹¹ Kikeu Musa akekan, kinom atiiba kekebela irwan aarei; kolomut akipi nuipu, komat ekodet ka ikecebaren.

¹² Kobala EJAKAIT Musa ka Aaron ebe, “Naarai mam ipotu kiyuut eoŋ, aitalaun eoŋ kakonyen nuka idwe luka Isirael, kanuka ŋun mam yes itolomarete ekodet lo toma akwap naainak kes.”

¹³ Ŋun kes akipi nuka Meriba;[18] naarai apotu idwe luka Isirael Kitoŋolopata EJAKAIT, kitodik akelaunit kotomakec.

¹⁴ Kijuka Musa ikiyakia anyoun koKades alosit mama ejai ekabaka loka Edom atiar, “Ebala kwanata onacekon Isirael ebe, Ijeni aitaaritoi kere naapotu kajaunotor:

¹⁵Kwape ejesarotor lukapapaakosi toma Misiri, keboioto kotoma Misiri ikar luipu; kiticanata da Imisirian sio ka lukapapaakosi;

¹⁶ Ido nakimonyia mama ejai EJAKAIT, abu kopup ekosiporoto, kijuk emalaika, kitolom sio koMisiri: ido koany, kijai toma Kades, ere loejai osaŋe loka eikorukon:

¹⁷ Keŋaiŋait, kocamak ketoroto toma akwapukon: mam sio kitori toma omanikoria karaida omanikoria luka emusabibu, ido mam kimasi akipi nuka atanin: kideri erot loka ekabaka, mam kipaari akan nakoteten karaida akan nakokediany, aitodol nekituboror koikorukon.”

¹⁸Kotema Edom ŋes atiar, “Mam itori tomaka, kenye asurokin jo kekileŋ.”

¹⁹ Kotemasi idwe luka Isirael atiar, “Kideri isio erot lokapolon: arai kiimat isio akonikipi, eoŋ ka ibareneka, katacakini jo etiaiakec: kocamakinai eoŋ ketor kakejeneka, komam eswamai icebore kere.”

²⁰ Kotema atiar, “Mam itori.” Kolom Edom ka ituŋa luipu asurokin ŋes kakan nakagogoŋ.

²¹ Kimik kwaŋin Edom Isirael aitor oikoruke: kanuka ŋun kibelokin Isirael anyoun kaneajai ŋesi.

²² Kolototo anyoun koKades: kodoloto idwe luka Isirael, ekodet kere, moru Kor.

²³Kotema EJAKAIT Musa ka Aaron komoru Kor, kariri naka eikor loka akwap naka Edom atiar,

²⁴ “Eyaŋaario Aaron mama ejaas iketuŋa: naarai mam elomari toma akwap naainak idwe luka Isirael, naarai ipotu kipaliikis akakirot kakipi nuka Meriba.

²⁵ Aso koyaŋa Aaron ka Eleasar okokuke, kitodoka kes moru Kor:

²⁶Kolac inapen luka Aaron, kitanap kes Eleasar okokuke: eyaŋaario Aaron mama ejaas iketuŋa, etwanikini ŋina.”

²⁷Kiswama Musa kwape kicorakinia ŋes EJAKAIT: kodokasi moru Kor kakonyen nuka ekodet kere.

²⁸ Kolaca Musa inapen luka Aaron, kitanap Eleasar okokuke; kotwanik Aaron nen kuju moru: kodokut Musa ka Eleasar komoru.

²⁹ Keanyu ekodet kere ebe atwana Aaron, kibworoto lukokek loka Isirael Aaron apaarasia akaisauni.