Read Ateso Aimario 21 Bible Online

Aimario 21 - Ateso bible

Aimario 21

¹ Kiira Ekanaanit, ekabaka loka Arad, loeboienenei kari naka eŋalakimak, ebe ebunit Isirael korot loka Atarim; kitiji Isirael, koŋata ice kakesi.

² Kiyapo Isirael aiyaposit mama ejai EJAKAIT, kobala ebe, “Arai kiijaik ituŋa lu akanika, amudiari cut ireriakec.”

³Kopup EJAKAIT eporoto loka Isirael, kijaik Ikanaanin; komudiasi kes cut ka ireriakec: komaikinai aibois Koruma.

⁴ Konyout komoru Kor koloto korot loka Aŋolol Nakareŋan aiririar akwap naka Edom: kosorianata itauon luka ituŋa kanuka erot.

⁵ Kinerata ituŋa erono mama ejai Edeke ka Musa, ebe, “Kanuk inyo kitonyounio sio koMisiri atwanikin amodiŋ? naarai emameete inyamat, emameete da akip: apas akosiijar ainyam luebenen.”

⁶ Kijukak EJAKAIT imunwo luka akim otuŋa, kotodotodoto ituŋa: kotwaka ituŋa luipu luka Isirael.

⁷ Kopotu ituŋa mama ejai Musa, kobalas ebe, “Kidiaka isio, naarai kipou kenera erono mama ejai EJAKAIT ka jo da; kilip EJAKAIT, kolema imunwo kamakosi.” Kilipak Musa ituŋa.

⁸Kotema EJAKAIT Musa atiar, “Kosub emun loka akim, kibwaik kuju okitoi: kosodi kanen ŋin yenetodio, naeanyunia, ejari.”

⁹ Kosub Musa emun loka aisinit, kibwaik kuju okitoi: kosodi kanen, arai etodit emun ituŋanan kere, naesesenia emun loka aisinit, kojari.

¹⁰Kolototo idwe luka Isirael, kidukuroto Obot.

¹¹Kolototo anyoun koObot, kidukuroto Iyeabarim, amodiŋ naitei Moab, kari nakokide.

¹²Kolototo anyoun kanen, kidukuroto aditot naka Sered.

¹³ Kolototo anyoun kanen, kidukuroto juwai naka Arunon, naejai amodiŋ, naelomunit koikor loka Imorain: naarai Arunon ŋes eikor loka Moab, kidiŋ Moab ka Imorain.

¹⁴Ŋes ebakare kotoma oitabo loka Ijiisio luka EJAKAIT ebe, “Bakeb kotoma Supa, Ka aditon nuka Arunon.

¹⁵Aijulul naka aditon Naijululuor aibois naka Ar, Egoŋakina da oikor loka Moab.”

¹⁶ Konyout kanen, kolototo Beer: [19] ŋin ŋes atan naabala EJAKAIT Musa ebe, “Kotukok ituŋa, kainak kes akipi.”

¹⁷ Kosodi koyeik Isirael ekosio lo: “Kibulubul, wu atan; koyeikis yesi ŋes:

¹⁸ Atan naabokete ikapolok, Naawadete ikasianak luka ituŋa, Kebela loka ajakanut, ka amorokinikec.” Konyout kamodiŋ kolototo Matana:

¹⁹Konyout koMatana kodoloto Nakaliel: konyout koNakaliel kodoloto Bamot:

²⁰ Konyout koBamot kodoloto aditot naejai omanikor loka Moab, kiton kuju naka Pisiga, naitei amodiŋ.

²¹ Kijuka Isirael ikiyakia mama ejai Sikon ekabaka loka Imorain, kobala ebe,

²² “Kocamakinai ketor akwapukon: mam kipaari omanikoria karaida omanikoria luka emusabibu; mam kimasi akipi nuka atanin: kideri erot loka ekabaka, aitodol nekituboror koikorukon.”

²³ Mam Sikon abu kisiik Isirael aitor toma oikorunoke: konye kotukok Sikon ituŋake kere, koloma asurokin Isirael toma amodiŋ, kodol Yakas; kitiji Isirael.

²⁴ Kodany Isirael ŋes kakwanis naka ekileŋ, kirum akekwap anyoun koArunon aitodol Yabok, aitodol odwe luka Amon: naarai agogoŋ eikor loka idwe luka Amon.

²⁵Kirum Isirael ireria ŋul kere: kiboikin Isirael oreria kere luka Imorain, toma Kesibon, ka ireriake kere.

²⁶Naarai arai Kesibon ere loka Sikon ekabaka loka Imorain, loabu kitiji ekabaka loka Moab losek, kodema kotoma akanike akekwap kere, kiton Arunon.

²⁷Ŋes ineratatar luineras kawaragasia ebe, “Koporu yes Kesibon, Kodukoi ere loka Sikon, kiticatai da;

²⁸ Naarai alom akim koKesibon, Aŋajepa nuka akim kotoma ore loka Sikon: Anyam Ar loka Moab, Ijaka luka aiboisio nuieelelete nuka Arunon.

²⁹ Wu okwe, ijo Moab! Iolio, wu ituŋa luka Cemos: akoraki odweke araut lukakerak, ka adweke da araut nunatan, Mama ejai Sikon ekabaka loka Imorain.

³⁰ Kigum kes; Aolio Kesibon aitodol Dibon, Kitisil kiton Nopa, Naedoli Medeba.”

³¹Kwaŋin kiboikin Isirael toma akwap naka Imorain.

³² Kiyakia Musa airot Yaser, kosodete airum ireriakec, kireŋeasi Imorain luajaas nen.

³³ Kibelokinos kodokasi korot loka Basan: kolom Og ekabaka loka Basan asurokin kes, ŋes ka iketuŋa kere, ejie kakes kolsderei.

³⁴ Kotema EJAKAIT Musa atiar, “Sirikiyoŋ ŋes: naarai akorak ŋes toma akanikon, ka iketuŋa kere, ka akekwap da; iswamakini ŋes kwape ibu kiswamakinia Sikon ekabaka loka Imorain, lueboienenete koKesibon.”

³⁵ Kwaŋin kodanyata ŋes, ka odweke, ka iketuŋa kere, mam apotu kitasalata karaida idiopet: kirumata akekwap.