Read Ateso Aimario 23 Bible Online

Aimario 23 - Ateso bible

Aimario 23

¹Kotema Balaam Balak atiar, “Kodukokinai ne itemwan ikanykaarei, kitemonokinai da ne imoŋin ikanykaarei, ka imerekekin ikany kaarei.”

²Kiswama Balak da kwape abalar Balaam; koinakis Balak ka Balaam kaŋolitem emoŋ ka emerekek.

³Kotema Balaam Balak atiar, “Kobwo ijo eiduny kainakinetekon naicweio, eoŋ da alosi; elemuni ebuni EJAKAIT airiamun keoŋ; nuketodikin eoŋ kere, kalimokini jo.” Kodoka ŋesi kuju neelapat.

⁴Kiriamunos Edeke ka Balaam: kotema ŋesi atiar, “Etemonok itemwan ikanykaarei, ainak kaŋolitem emoŋ ka emerekek.”

⁵ Kibwaik EJAKAIT akirot toma aituk naka Balaam, kotema atiar, “Koboŋo neejai Balak, kiner kwaŋin.”

⁶Koboŋo neejai, ido koany, abwoi eiduny kainakineteke naicweio, ŋes ka ikapolok kere luka Moab.

⁷ Kiner akewaraga ebe, “Kayau eoŋ Balak anyoun koAram, Ekabaka loka Moab anyoun koroŋan lukokide: Bia, kikenokinai Yakob, Bia, koluik Isirael.

⁸ Ekeni eoŋ biai lomam Edeke ikenit? Ido aluikini eoŋ biai lomam Edeke eluikinit?

⁹ Naarai aanyuni ŋes kaidi naka atiiban, Ido eteluori ŋes koukon: Koany, kes ituŋa luiboiete bonik, Mam imarakinio toma atekerin.

¹⁰ Iŋai epedori aimar apua naka Yakob, Atai aimar atutubet nakiwoŋonet naka Isirael? Mere katwana kwape ekadoliton, Awasiaka do koputokinos kanake!”

¹¹ Kotema Balak Balaam atiar, “Anyoika nu nukiswamak? Abu kayau jo aiken lukasurupoka, ido koany, ilipak cut kes arereŋ.”

¹²Koboŋok ebe, “Mam tikebusakinit acoit einer ŋun nuibwaikini EJAKAIT aitukuka?”

¹³Kotema Balak ŋes atiar, “Keŋaiŋait, kauparos aibois ace, naipedoria aanyun kes; ianyuni esaŋekec bon, komam ianyuni kes kere; kikenok eoŋ kes kaŋina.”

¹⁴ Koyaŋa ŋes omanikor loka Sopim, aidi naka Pisiga, koduk itemwan ikanykaarei, koinak kaŋolitem emoŋ ka emerekek.

¹⁵Kotema ŋesi Balak atiar, “Kobwo kane eiduny kainakinetekon naicweio, keriamunos ber eoŋ ka EJAKAIT kalaije.”

¹⁶Kiriamunos EJAKAIT ka Balaam, kibwaik akirot toma aitukuke, kotema atiar, “Koboŋo neejai Balak, kiner kwaŋin.”

¹⁷ Kobu mama ejai, ido koany, abwoi eiduny kainakineteke naicweio, ka ikapolok luka Moab nepepe kaŋes, Kotema Balak ŋes atiar, “Atema bo EJAKAIT ai?”

¹⁸ Kiner akewaraga ebe, “Konyou, Balak, kiira, Kopupunoi, ijo okoku loka Sipor:

¹⁹ Mam Edeke erai etuŋanan, loiŋalai; Mam da erai okoku loka etuŋanan loitoronikin: Alimu ŋesi, komam kereka iswamai? Arai ener ŋesi, komam kereka itodoli?

²⁰ Koany, kecorakin ailipakin arereŋ; Esireren, mam eoŋ apedori aijulakin.

²¹ Mam ŋes eanyunit numam adolit kotoma Yakob, Karaida aanyunit apaarit kotoma Isirael: Ejai EJAKAIT Ekedeke kaŋes, Ka ekare loka ekabaka ejai mamakec.

²² Kitolom kes Edeke koMisiri; Ejaas kagogoŋ kwape naka ekosobwan.

²³ Abeit emamei ecudet kaneejai Yakob, Karaida adwaranut kaneejai Isirael: Kwana inereneneo nuka Yakob ka nuka Isirael da, ebe, ‘Eswama ca ma Edeke!’

²⁴Koany, enyounete ituŋa bala aŋatuny, Edakun bon bala eŋatuny: Mam eperi aitodol neenyamia imejaunake, Ka aimat aokot nuka luearitai.”

²⁵Kotema Balak Balaam atiar, “Sirikiken kes nepetai da, karaida ailipakini kes adioreren.”

²⁶Konye Koboŋok Balaam Balak ebe, “Mam abu kalimok jo ebe, ‘Kere nuinera EJAKAIT, ŋupeŋun kebusakinit aswam?’ ”

²⁷Kotema Balak Balaam atiar, “Aso bia, kayaŋa jo aibois ace; elemuni kitojok Edeke jo aikenokin eoŋ kes kaŋina.”

²⁸Koyaŋa Balak Balaam aidi naka Peor, neitei amodiŋ.

²⁹ Kotema Balaam Balak atiar, “Kodukokinai itemwan ikanykaarei, kitemonok kane imoŋin ikanykaatei ka imerekekin ikanykaarei.”

³⁰Kiswama Balak kwape abalar Balaam, koinak kaŋolitem emoŋ ka emerekek.