Read Ateso Aimario 27 Bible Online

Aimario 27 - Ateso bible

Aimario 27

¹ Kosodi kikunyut adwe nuka Selopekad, okoku loka Keper, okoku loka Gilead, okoku loka Makir, okoku loka Manase, nuka ikekia luka Manase, okoku loka Yosep: lu kes ikiroria luka adweke; Mala, ka Noa, ka Kogila, ka Milika, ka Tirusa.

² Kobwaata kakonyen nuka Musa, kakonyen nuka Eleasar esasedoti, kakonyen da nuka ikapolok ka ekodet kere, kokek loka ewema loka airiamunun, kobalas ebe,

³“Abu papakosi kotwanik amodiŋ, konye mam ŋes arai opaupakec kaŋul luapotu kotukokinos nepepe aluikin EJAKAIT korioŋet loka Kora: konye atwani ŋesi da kotoma adiakareteke; komameete idwe lusap.

⁴Kanukinyo elemarere ekiror loka papakosi kokekike, naarai amameete ŋes idwe lusap? Koinakinai sio airumet koinacan luka papakosi.”

⁵ Koyau Musa akecekirot mama ejai EJAKAIT.

⁶Kotema EJAKAIT Musa atiar,

⁷ “Ineras adwe nuka Selopekad nuedolito: abeit iinakini kes airumet koinacan luka papakec; ido itebei airumet naka papakec mamakec.

⁸Ilimokini idwe luka Isirael ebe, ‘Arai ketwana etuŋanan, komamei ikoku yenisapat, itebei do airumeteke mama ejai akokuke.

⁹Arai emamei ŋes akokuke; iinakini airumeteke mama ejaas iinacanake.

¹⁰Arai emameete ŋes iinacanake, iinakini do airumeteke mama ejaas iinacan luka papake.

¹¹ Arai emameete papake iinacan, iinakini akeirumet mama ejai opajanake loka ekekike, ŋesi da irumi: eraun kama ejaas idwe luka Isirael ekisil loka etube, kwape kicorakinia EJAKAIT Musa.’ ”

¹² Kobala EJAKAIT Musa ebe, “Kodoka moru lo loka Abarim, koany akwap naainak eoŋ idwe luka Isirael.

¹³ Kianyu ŋes, kiyaŋaario mama ejaas ikonituŋa kwape ayaŋaarere onacekon Aaron:

¹⁴ Naarai ibu kipaliik akakirot kotoma amodiŋ naka Sin, kopeget loka ekodet, aitalaun eoŋ kakonyenekec kakipi.” (Ŋun kes akip nuka Meriba loka Kades kamodiŋ naka Sin.)

¹⁵Kotema Musa EJAKAIT atiar,

¹⁶ “Kodakak EJAKAIT, Edeke loka imoyon luka awat kere, etuŋanan ayait ekodet.

¹⁷ Loepedori alomar ka alomun da kakonyenekec, loepedori aiŋarenikin kes alomar ka alomun da; tetere mam ekodet loka EJAKAIT esubi bala amerekekin nuemameete ekecokon.”

¹⁸ Kobala EJAKAIT Musa ebe, “Koyaŋa Yosua okoku loka Nun, etuŋanan loejai emoyo, kidokok ŋes akonikan;

¹⁹ Kitobwo kakonyen nuka Eleasar esasedoti, kakonyen nuka ekodet kere; kodakak da ŋes apolou kakonyenekec.

²⁰ Iinakini ŋes akonipolou, tetere erimari ekodet kere loka idwe luka Isirael.

²¹ Ebwoi kakonyen nuka Eleasar esasedoti, loinitununei kanuke kotube loka Urim kakonyen nuka EJAKAIT: kakirotoke elomariata, kakirotoke da elomuniata, ŋes ka idwe kere luka Isirael nepepe kaŋes, ekodet kere.”

²²Kiswama Musa kwape kicorakinia EJAKAIT ŋes; koyaŋa Yosua, kitobwo ŋes kakonyen nuka Eleasar esasedoti, kakonyen da nuka ekodet kere:

²³ Kidokok ŋes akaninike, kodakak apolou, kwape kineria EJAKAIT kama ka Musa.