Read Ateso Aimario 28 Bible Online

Aimario 28 - Ateso bible

Aimario 28

¹Kotema EJAKAIT Musa atiar,

² “Kicorak idwe luka Isirael, kolimok kes ebe, ‘Ainakinetaka, ikanyamat luka ainakinetaka nueinakinere kakim, luka asakat naeuru saa mamaka, iricete ainakin eoŋ kapakikec naebeit.’

³ Ilimokini kes ebe, Na ŋes ainakinet naeinakinere kakim, naiinakinete EJAKAIT; imerekekin lukiliok luka ekaru ediopet lumam eŋwalito, iarei ŋinipaaran, araut ainakinet naicweio naduc.

⁴ Iinakinete imerekek idiopet tupuruc, kosodi idiopet iinakinete eboŋ:

⁵ Ka idiopet kotomon yenika epa [20] loka akiria nuidicic araun ainakinet naka akiria, nuinyalakinitai idiopet kooŋon yenika ekin [21] loka akinyet naerukuk.

⁶Erai ainakinet naicweio naduc, naecorakinio komoru Sinai araun asakat naeuru saa, ainakinet naeinakinere kakim mama ejai EJAKAIT.

⁷ Ainakinet da namatat ŋes idiopet kooŋon yenika ekin kanuka imerekek idiopet; ibukokini neejai EJAKAIT kotoma aibois nakalaunan ainakinet namatat naka nuitemerete.

⁸Ka imerekek ice iinakini eboŋ; kwape kainakinet naka akiria naka tupuruc, kwape kainakineteke namatat, iinakini ŋes, ainakinet naeinakinere kakim, naka asakat naeuru saa mama ejai EJAKAIT.

⁹“Kapaaran nakasabato imerekekin lukiliok iarei luka ekaru ediopet lumam eŋwalito, ka iarei kotomon luka epa loka akiria nuidicic araun ainakinet naka akiria, nuinyalakinitai akinyet, ka ainakineteke namatat;

¹⁰ Ŋin ŋes ainakinet naicweio naka ŋinipaaran nakasabato, kogelara ainakinet naicweio naduc, ka ainakineteke namatat.

¹¹ “Kotoma ageuneta nuka ilapiokus iinakinete ainakinet naicweio mama ejai EJAKAIT: imoŋin lutoba iarei, ka emerekek, ka imerekekin ikanykaarei lukiliok luka ekaru ediopet lumam eŋwalito;

¹² Ka iuni kotomon luka epa loka akiria nuidicic araun ainakinet naka akiria, nuinyalakinitai akinyet, kanuka ŋolimoŋ lotobait; ka iarei kotomon luka akiria nuidicic araun ainakinet naka akiria, nuinyalakinitai akinyet, kanuka emerekek ŋol;

¹³Ka idiopet kotomon yenika akiria nuidicic nuinyalakinitai akinyet araun ainakinet naka akiria naka ŋinimerekek; araun ainakinet naicweio naka asakat naeuru saa, ainakinet naeinakinere kakim mama ejai EJAKAIT.

¹⁴Ainakinetakec da numatan eraun atutubet naka ekin loka ebino kanuka emoŋ lotobait, ka idiopet kouni yenika ekin kanuka emerekek, ka idiopet kooŋon yenika ekin kanuka imerekek; ŋin ŋes ainakinet naicweio naka ŋolilap adaun ilapio kere luka ekaru.

¹⁵Ka ekoroi ediopet araun ainakinet naka adiakaret mama ejai EJAKAIT; einakinio kogelara ainakinet naicweio naduc, ka ainakineteke namatat.

¹⁶ “Toma olap losodit, kapaaran nakitomonet kaoŋon naka elap, ŋes Aleleŋ naka EJAKAIT.

¹⁷ Apaaran nakitomonet kakany naka elap kaŋol ejaun epucit; enyamio emugati lomam itubuunitoi apaarasia akanykaarei.

¹⁸ Toma apaaran nasodit ejaun atukokinet nakalaunan; siriswamaete aswam naelaŋir.

¹⁹ Konye iinakinete ainakinet naeinakinere kakim, ainakinet naicweio mama ejai EJAKAIT: imoŋin lutoba iarei, ka emerekek, ka imerekekin ikanykaarei lukiliok luka ekaru ediopet: eraunos kamakus lumam eŋwalito:

²⁰Ka ainakinetekec naka akiria, akiria nuidicic nuinyalakinitai akinyet: iinakinete iuni kotomon kanuka emoŋ lotobait ka iarei kotomon kanuka emerekek;

²¹Iinakini da idiopet kotomon kanuka ŋinimerekek kotoma omerekekin ikanykaarei;

²² Ka ekoroi ediopet araun ainakinet naka adiakaret, alucio yes.

²³Iinakinete ŋun kogelara ainakinet naicweio naka tupuruc, naerai ainakinet naicweio naduc.

²⁴ Iinakinete kopone kaŋol ŋinipaaran, adaun apaarasia akanykaarei, inyamat luka ainakinet naeinakinere kakim, naka asakat naeuru saa mama ejai EJAKAIT: einakinio kogelara ainakinet naicweio naduc, ka ainakineteke namatat.

²⁵ Kapaaran nakikanyetekaarei ejaun yes atukokinet nakalaunan; siriswamaete aswam naelaŋir.

²⁶ “Kapaaran naka araito nuegeete, naiinakiniata ainakinet naka akiria nuka agwe mama ejai EJAKAIT kopueitikus loka asabaton, ejaun yes atukokinet nakalaunan; siriswamaete aswam naelaŋir.

²⁷ Konye iinakinete ainakinet naicweio araun asakat naeuru saa mama ejai EJAKAIT; imoŋin lutoba iarei, ka emerekek, ka imerekekin ikanykaarei lukiliok luka ekaru ediopet;

²⁸Ka ainakinetekec naka akiria, akiria nuidicic nuinyalakinitai akinyet, iuni kotomon kanuka ŋolimoŋ lotobait, ka iarei kotomon kanuka emerekek ediopet.

²⁹Ka idiopet kotomon kanuka ŋinimerekek kotoma omerekekin ikanykaarei;

³⁰Ka ekoroi ediopet, alucio yes.

³¹Iinakinete kes kogelara ainakinet naicweio naduc, ka ainakineteke naka akiria (eraunos kamakus lumam eŋwalito), ka ainakinetakec numatan.