Read Ateso Aimario 3 Bible Online

Aimario 3 - Ateso bible

Aimario 3

¹Na ŋes aur naka Aaron ka Musa kapaaran naeneratar EJAKAIT kaMusa komoru Sinai.

² Lu kes ikiroria luka odwe luka Aaron: Nadab ekiyaike, ka Abiku, Eleasar, ka Itamar.

³ Lu kes ikiroria luka odwe luka Aaron, isasedotin luaponi kinyonyoikinai akinyet, luatiakuni ŋesi aijaanakin toma aswam naka esasedoti.

⁴ Kotwakikis Nadab ka Abiku akonyen nuka EJAKAIT, naainakiniata akim naitegelikina kakonyen nuka EJAKAIT, kamodiŋ naka Sinai, komameete kes idwe: kijaanakis Eleasar ka Itamar kaswam naka esasedoti kakonyen nuka Aaron papakec.

⁵Kotema EJAKAIT Musa atiar,

⁶ “Kisukuny ateker naka Lebi, kibwaik kes akonyen nuka Aaron esasedoti, tetere ijaanakinete ŋes.

⁷ Ido idarete akiroke, ka akiro da nuka ekodet kere loejai iŋaren kewema loka airiamunun, aijaanakin toma owema lokalaunan.

⁸Idarete da iboro kere luka ewema loka airiamunun, ka akiro da nuka idwe luka Isirael, aijaanakin roma owema lokalaunan.

⁹ Iinakini Ilebin mama ejai Aaron ka odweke: ainakin kes cut mamakeŋ kanuka idwe luka Isirael.

¹⁰ Itebeikini Aaron ka odweke, aidarenen esasedotenekec: eario eloŋwait kere loikunyuni die kewema.”

¹¹Kotema EJAKAIT Musa atiar,

¹² “Ka eoŋ da, koany, alemu Ilebin kodwe luka Isirael aibois naka ikiyaik luepukorete aliligeta kotoma odwe luka Isirael; eraunos da Ilebin lukaŋ:

¹³ Naarai ikiyaik kere eraas lukaŋ; kapaaran naadanyia ikiyaik kere kotoma akwap nako Misiri abu ketalau ikiyaik kere koIsirael kanukaŋ, ituŋanan ka itiaŋ da: eraunos lukaŋ; arai eoŋ EJAKAIT.”

¹⁴ Kotema EJAKAIT Musa kamodiŋ naka Sinai atiar,

¹⁵ “Kimar idwe luka Lebi kwape ejaatar ikalia luka lukapapaakec, kwape ejaatar ikekiakec: imari ŋolikiliokit ageun kayenika elap ediopet ka yenedeparit.”

¹⁶Kimar Musa kes kwape ajaar akirot naka EJAKAIT, kwape kicorakinitere.

¹⁷ Lu kes odwe luka Lebi kwape ejaatar ikiroriakec; Gereson, ka Kokat, ka Merari.

¹⁸ Lu kes ikiroria luka odwe luka Gereson kwape ejaatar ikekiakec: Libuni ka Simei.

¹⁹Odwe luka Kokat kwape ejaatar ikekiakec; Amuram, ka Isar, ka Keburon ka Usiel.

²⁰Odwe luka Merari kwape ejaatar ikekiakec; Mali ka Musi. Ŋul kes ikekia luka Ilebin kwape ejaatar ikalia luka lukapapaakec.

²¹Kotoma Gereson ŋes alomunia ekek loka Ilibunin, ka ekek loka Isimein: ŋul kes ikekia luka Igeresonin.

²²Ŋul luaponi kimarai kakesi, kwape ejaar etiai loka ikiliok kere, ageun kayenika elap ediopet ka yenedeparit, ŋul luaponi kimarai kakesi emwaasi ilukumin ikanykaarei ka akwat akany.

²³ Luka ekek loka Igeresonin idukurete agule kewema lokalaunan kari nakoto.

²⁴Ekapolon loka ekal loka lukapapaa luka Igeresonin ŋes Eliasap okoku loka Lael.

²⁵ Ido kotoma owema loka airiamunun idarenenete odwe luka Gereson ewema lokalaunan, ka Bwema, ka eimukoreteke, ka aigalisit naka ekek loka ewema loka airiamunun.

²⁶ Ka luikajaj alaro, ka aigalisit naka ekek loka alaro, naidunyas kewema lokalaunan, naidunyas ketem kolukunite, ka aunoike, kwape ejaar aijaanakinikec kere.

²⁷ Kotoma Kokat ŋes alomunia ekek loka Imuramain, ka ekek loka Isarin, ka ekek loka Ikeburonin, ka ekek loka Iusielin: ŋul kes ikekia luka Ikokatin.

²⁸Kwape ejaar etiai loka ikiliok kere, ageun kayenika elap ediopet ka yenedeparit, emwaasi ilukumin ikanykauni ka akwat akanykape, idarenenete aibois nakalaunan.

²⁹ Luka ikekia luka odwe luka Kokat idukurete osiep loka ewema kari naka eŋalakimak.

³⁰Ekapolon loka ekal loka lukapapaa luka ikekia luka Ikokatin ŋes Elisapan okoku loka Usiel.

³¹ Idarenenete kes asaduku, ka emesa, ka epir loka atala, ka itemwan, ka iboro lukotoma aibois nakalaunan luetwasamaete kesi aijaanakinia, ka aigalisit, ka aijaanakinikec kere.

³² Eleasar da okoku loka Aaron esasedoti ŋes eraun ekapolon loka ikapolok luka Ilebin, ido eanyanari ŋul luidarete aibois nakalaunan.

³³Kotoma Merari ŋes alomunia ekek loka Imalin, ka ekek loka Imusin: ŋul kes ikekia luka Merari.

³⁴Ŋul luaponi kimarai kakesi kwape ejaar etiai loka ikiliok kere, ageun kayenika elap ediopet ka yenedeparit, emwaasi ilukumin ikanykape ka akwat aarei.

³⁵Ekapolon loka ekal loka lukapapaa luka ikekia luka Imerarin ŋes Suriel okoku loka Abikail; idukurete kesi osiep loka ewema kari naka agolitomei.

³⁶ Ido luaseikinitai odwe luka Merari aidarenen kes abaoi nuka ewema lokalaunan, ka akitoke nukirionokina, ka ipirinoke, ka aigaŋetakec, ka iboro kere lueupatar, ka aijaanakinikec kere:

³⁷Ka ipirino luelukunito alaro, ka aigaŋetakec, ka iloinokec, ka aunoikec.

³⁸ Ŋul da luidukurete iŋaren kewema lokalaunan kari nakokide, orute loka ewema loka airiamunun kama eŋiunia akoloŋ, kes Musa ka Aaron ka odweke, idarenenete aibois nakalaunan, ka akiro da nuka idwe luka Isirael: ido eario eloŋwait loikunyuni die kewema.

³⁹ Kere luaponi kimarai luka Ilebin, luemarete Musa ka Aaron kaicorakinet naka EJAKAIT, kwape ajaatar ikekiakec, ikiliok kere ageun kayenika elap ediopet ka yenedeparit, emwaasi ilukumin akaisaarei ka luarei.

⁴⁰Kolimok EJAKAIT Musa ebe, “Kimar ikiyaik kere lukiliok luka idwe luka Isirael ageun kayenika elap ediopet ka yenedeparit, kimar etiai loka ikiroriakec.

⁴¹ Kolemikinai eoŋ Ilebin (arai eoŋ EJAKAIT) aibois naka ikiyaik kere kodwe luka Isirael; ka ibaren luka Ilebin aibois naka ikiyaik kere luka ibaren luka idwe luka Isirael.”

⁴²Kimar Musa ikiyaik kere kodwe luka Isirael, kwape kicorakinia EJAKAIT.

⁴³Ikiyaik kere lukiliok kwape ejaar etiai loka ikiroriakec, ageun kayenika elap ediopet ka yenedeparit, ŋul luaponi kimarai kakesi, emwaasi ilukumin akaisaarei ka luarei ka akwat aarei ka akaisakanykaarei ka luuni.

⁴⁴Kotema EJAKAIT Musa atiar,

⁴⁵ “Kolem Ilebin aibois naka ikiyaik kere kodwe luka Isirael, ka ibaren luka Ilebin aibois naka ibarenekec: eraunos Ilebin lukaŋ: arai eoŋ EJAKAIT.

⁴⁶ Ido kanuka alakunio naka ikiyaik akwat aarei ka akaisakanykaarei ka luuni luka idwe luka Isirael luedeparitotor kesi etiai loka Ilebin.

⁴⁷ Ijauni isekelin ikany kaneejai ŋinituŋanan; ijauni kes kwape ejaar esekel [1] loka aibois nakalaunan (esekel ŋes igeran akaisaarei):

⁴⁸Iinakini Aaron ka odweke apesan nuelakunere luedeparitotor kes.”

⁴⁹ Kijau Musa apesan nulakunet kaneejaas ŋul luadeparitotor kesi lualakunete Ilebin:

⁵⁰ Kijau ŋesi apesan kaneejaas ikiyaik luka idwe luka Isirael; isekelin elukumit ka akwat auni ka akaisakanykape ka lukany, kwape ejaar esekelloka aibois nakalaunan:

⁵¹Kijaik Musa Aaron ka odweke apesan nulakunet, kwape ajaar akirot naka EJAKAIT, kwape kicorakinia EJAKAIT Musa.