Read Ateso Aimario 30 Bible Online

Aimario 30 - Ateso bible

Aimario 30

¹ Kolimok Musa ikapolok luka atekerin nuka idwe luka Isirael ebe, “Na ŋes akirot naecoraki EJAKAIT.

² Naiyapoo ituŋanan aiyaposit mama ejai EJAKAIT, arai naisumunio aisumunet ajen eketau kaenet, sirikinyei aitodol akekirot; iswamai kwape ejaatar akiro kere nuelomunete kaitukuke.

³Naiyapoo aberu aiyaposit mama ejai EJAKAIT, koenikini da bon kaenet, koroko ejai okale loka papake, koiditeuke;

⁴Kepupu papake aiyapositike, ka aeneteke naeenitor eketau, kosodi papake aililiŋikin ŋes: iburai do akeiyaposio kere aitodolio: ka ŋinienet naeenitor ŋesi eketau iburai aitodolio.

⁵Konye arai keneroki ŋes papake kapaaran naepupunio; epalunio aiyaposioke kere, ka aeneta kere nueenitor ŋesi eketau: isionie da EJAKAIT ŋes, naarai abu papake koneroki ŋes.

⁶Konye arai emanyit ŋes ekiliokit, kojaas aiyaposioke mamake, arai aisud einer kaitukuke, nueenitor ŋesi eketau;

⁷Kepupu okilenike, kosodi aililiŋikin ŋes kapaaran naepupunio: iburai do akeiyaposio aitodolio, ka aenetake nueenitor ŋesi eketau iburai aitodolio.

⁸ Konye arai keneroki ŋes okilenike kapaaran naepupunio; itapaluni aiyapositike naejai mamake, ka aisud einer kaitukuke, nueenitor ŋesi eketau: isionie EJAKAIT ŋes.

⁹ Konye aiyaposit naka apuserut, ka ŋin da naireŋearit okilenike, iburai do ŋes aitodol ŋinikirot naeenitor ŋesi eketau.

¹⁰Arai eyapoi ŋesi kotoma togo loka okilenike, arai ajen eketau kaenet naka aiyaposit.

¹¹Kepupu okilenike kosodi aililiŋikin ŋes, komam enerokini ŋes; iburai do aiyaposioke kere aitodolio, ka ŋinienet nakeenia ŋesi eketau iburai aitodolio.

¹²Konye arai itapalunit kes okilenike kapaaran nakepupunio; epalunio do kere nuka aiyaposioke arai nuka aenet naka etauke nualomunete kaitukuke; etapalau kes okilenike: isionie da EJAKAIT ŋes.

¹³Epedori okilenike aitogogoŋ arai aitapalaun niniyaposit ka ninisumunet naeenit aiticania etau.

¹⁴Konye arai kililiniki okilenike ŋes ŋinipaaran, itogogoŋi do akeiyaposio kere, arai aenetake kere nuejaas mamake: etogogoŋ kes naarai abu kililinik ŋes kapaaran naapupunio kes.

¹⁵Konye arai kitapalau kes akaulo kapupun kes, ibwoki do ŋesi numam adolit nuka aberu.”

¹⁶Ŋul kes ikisila, luecorakini EJAKAIT Musa, mama ejai etuŋanan ka akeberu, mama ejai papa ka akokuke naejai koiditeuke, okal loka papake.