Read Ateso Aimario 32 Bible Online

Aimario 32 - Ateso bible

Aimario 32

¹ Ajaas idwe luka Reuben ka idwe luka Gad ibaren luipu noi: keanyut akwap naka Yaser, ka akwap naka Gilead, ebe arai aibois naebus kanuka ibaren;

²Kopotu idwe luka Gad ka idwe luka Reuben kinerata kaMusa ka Eleasar esasedoti ka ikapolok luka ekodet atiar,

³“Atarot, ka Dibon, ka Yaser, ka Nimura, ka Kesibon, ka Eleale, ka Sebam, ka Nebo, ka Beon.

⁴ Akwap naetiji EJAKAIT kakonyen nuka ekodet loka Isirael, erai akwap naibusakinit ibaren, ejaas da ikonikejaanakinak ibaren.”

⁵Kotemasi atiar, “Arai kidumunit asianut kakonyenekon, koinakinai ikonikejaanakinak akwap na araun airumet; sirikiitodok sio Yorodan.”

⁶Kotema Musa idwe luka Gad ka idwe luka Reuben atiar, “Do iinacanakus elosete ojie, kiboiete yesi kane?

⁷Kanukinyo itakalanyata itauon luka idwe luka Isirael kotoma alosit akwap naainaki kes EJAKAIT?

⁸ Apotu lukapapakus kiswamata kwaŋin, naejukaria kes koKades-barunea airot akwap.

⁹ Naarai kedokasi aditot naka Esukol, koanyut da akwap, kitakalanyata itauon luka idwe luka Isirael kinyeis alomar akwap naainakinit kes EJAKAIT.

¹⁰ Kinep anyunyura naka EJAKAIT kapaaran kaŋin, kiyapo ebe,

¹¹ ‘Abeit emamei kotoma otuŋa lualomunete koMisiri, ageun kaluka ikar akaisaarei ka luedeparito, loeanyuni akwap naabu keyapoik Aburaam, ka Isaak, ka Yakob; naarai mam katuparito eoŋ kekecetau kere:

¹² Dimarai Kaleb okoku loka Yepune Ekenisit, ka Yosua okoku loka Nun: naarai atupasi EJAKAIT kekecetau kere.’

¹³ Kinep anyunyura naka EJAKAIT aluikin Isirael, kisirim kes kamodiŋ ikar akaisaoŋon, aitodol neadaikinor nen aturi kere naabu kiswama aronis kakonyen nuka EJAKAIT.

¹⁴ Ido koany, inyout yesi airum aibois naka lukapapakus, ailwek naka ikadiakanarak, aiyatakin bobo anyunyura naededeŋ naka EJAKAIT mama ejai Isirael.

¹⁵ Naarai arai kipaasi yesi kotoma atupite ŋes, itasalikini bobo ŋesi kes amodiŋ; ido imudiarete yesi ituŋa lu kere.”

¹⁶Kikunyut mama ejai ŋesi, kotemasi atiar, “Kibwaikini akosiituk aujoi nee, kidukokini ikosidwe ludidik ireria:

¹⁷ Konye isio ikulepek kikapakini cut aiŋarenikin idwe luka Isirael, aitodol nekiyaŋaaria kes aiboisikec; ido iboikinos ikosidwe ludidik oreria luebwaunitai kanuka luiboiete kakwap.

¹⁸ Mam kiboŋori oreriakosi, aitodol nairumiata idwe luka Isirael ŋinituŋanan airumeteke.

¹⁹ Naarai mam sio kirumi kakes okekwa juwai loka Yorodan; naarai akosiirumet ejai okekwa lo loka Yorodan ari nakokide.”

²⁰ Kotema Musa kes atiar, “Arai kiswamata yesi akirot ŋin; arai kikapakinos yesi alosit ojie kakonyen nuka EJAKAIT.

²¹Kosodi ŋoltuŋanan loekapakina kayesi aidok Yorodan kakonyen nuka EJAKAIT, aitodol naireŋearia lukasurupoke kakonyeneke.

²² Kipikoroi akwap kakonyen nuka EJAKAIT: kosodete konyet aboŋun, komam nuigwaunito kama ejai EJAKAIT, kama ejai Isirael da; eraun akwap na airumetekus kakonyen nuka EJAKAIT.

²³ Konye arai mam iswamaete kwaŋin, koany idiakasi kama ejai EJAKAIT: abeit itodun akusidiakaret.

²⁴ Kodukokis ikusidwe ludidik ireria, kobwaikis akusimerekekin aujoi; kiswamata da ŋun nualomutu kaitukekus.”

²⁵Kinerata idwe luka Gad ka idwe luka Reuben kaMusa atiar, “Iswamaete ikonikejaanakinak kwape icorakinia ekajakait.

²⁶ Ikosidwe ludidik, ka akosiŋor, ka ikosisipanin ka ikosibaren, ejaunos toma oreria luka Gilead:

²⁷ Konye edokete ikonikejaanakinak, ŋoltuŋanan loekapakina ejie, kakonyen nuka EJAKAIT, ejie, kwape ebalar ekajakait.”

²⁸ Koinak Musa Eleasar esasedoti, ka Yosua okoku loka Nun, ka ikapolok luka ikalia luka lukapapaakec luka atekerin nuka idwe luka Isirael aidar akiroke.

²⁹Kolimok Musa kes ebe, “Arai kedokasi idwe luka Gad ka idwe luka Reuben Yorodan nepepe kayes, ŋoltuŋanan loekapakina ejie kakonyen nuka EJAKAIT, kosodi akwap aipikorio kakonyenekus; iinakinete do kes akwap naka Gilead araun airumet:

³⁰Konye arai mam edokete nepepe kayes kokapakina, irumete nepepe kayes kotoma akwap naka Kanaan.”

³¹Koboŋokis idwe luka Gad ka idwe luka Reuben ebe, “Kwape alimokinia EJAKAIT ikonikejaanakinak, kiswamai isio kwaŋin.

³²Kidoki kakapakina kakonyen nuka EJAKAIT alomar akwap naka Kanaan, kosalak airumetekosi okekwa loka Yorodan.”

³³ Koinak Musa kes, idwe luka Gad ka idwe luka Reuben, ka atutubet naka ateker naka Manase okoku loka Yosep, ajakanut naka Sikon ekabaka loka Imorain, ka ajakanut naka Og ekabaka loka Basan, akwap kwape ajaatar ireriake ka iikorunokec, kes ireria luka akwap lualukunito.

³⁴ Kodukoto idwe luka Gad Dibon, ka Atarot, ka Aroer;

³⁵Ka Aturot-sopan, ka Yaser, ka Yogubeka;

³⁶Ka Bet-nimura, ka Bet-karan: ireria luabwaitai, ka aujoi nuabwaitai nuka amerekekin.

³⁷Kodukoto idwe luka Reuben Kesibon, ka Eleale, ka Kiriataim;

³⁸ Ka Nebo, ka Baal-meon, (kilocoi ikecekiroria,) ka Sibima: komaikis ireria luadukete icekiroria.

³⁹ Koloto idwe luka Makir okoku loka Manase Gilead, kiruma ŋes, kodemasi ŋes Imorain luajaas toma.

⁴⁰ Koinak Musa Makir okoku loka Manase Gilead; kiboienenei da kanen.

⁴¹ Kolot Yair okoku loka Manase kirum ireriakec, komaik kes Kabot-Yair.

⁴² Kolot Noba kirum Kenat, ka ireriake ludidik, komaik ŋes Noba ekekiror obe.