Read Ateso Aimario 34 Bible Online

Aimario 34 - Ateso bible

Aimario 34

¹Kotema EJAKAIT Musa atiar,

² “Kicorak idwe luka Isirael, ebe, Kidoloto akwap naka Kanaan, (ŋin ŋes akwap nakibei yes araun airumet, akwap nako Kanaan kwape ejaatar iikorunoke.)

³ Ewaikus loka ari naka eŋalakimak enyouni kamodiŋ naka Sin kiririkina Edom, eikorukus da loka ari naka eŋalakimak enyouni kosaŋe loka Aŋolol naka Abalaŋ kobei kide:

⁴ Ekudoori ekusikor ari naka eŋalakimak naka acinat naka Akurabim, kobei Sin: kodoli ari naka eŋalakimak naka Kades-barunea; kolosi Kasaradar, kobei Asumon:

⁵ Ekudoori bobo eikor koAsumon kiton ocor yenika Misiri, kodoli aŋolol.

⁶“Eikorukus da loka ari nakoto ŋes Aŋolol Nakapolon karirike: eraun ŋol eikorukus loka ari nakoto.

⁷“Lo ŋes eikorukus loka ari naka agolitomei: igirunete anyoun kAŋolol Nakapolon kiton Moru Kor:

⁸ Anyoun koMoru Kor igirunete kiton neelomaria Kamat; kodoli eikor Sedad;

⁹ Kolosi eikor kiton Sipiron, kodoli Kasar-enan: ŋol ŋes eikorukus loka ari naka agolitomei.

¹⁰“Igirunete eikorukus loka ari nakokide anyoun koKasar-enan kiton Sepam:

¹¹ Ŋesar eikor anyoun koSepam kiton Ribula, kari nakokide naka Ain; iiesar eikor edoli ariri naka aŋolol naka Cineret kobei kide:

¹²Ŋesar eikor kiton Yorodan, kodoli Aŋolol naka Abalaŋ: eraun ŋin akusikwap kwape ejaatar ikeikoruno luelukunito.”

¹³ Kicorak Musa idwe luka Isirael ebe, “Ŋin ŋes akwap nairumete kailamilam eroet, naecoraki EJAKAIT ainakin atekerin akanykaoŋon, ka atutubet naka ateker:

¹⁴ Naarai adumu ateker naka idwe luka Reuben kwape ejaatar ikalia luka lukapapaakec, ka ateker naka idwe luka Gad kwape ejaatar ikalia luka lukapapaakec, adumu da atutubet naka ateker naka Manase airumetekec:

¹⁵Adumut atekerin aarei ka atutubet naka ateker airumetekec juwai naka Yorodan koYeriko kari nakokide, neelomunia akoloŋ.”

¹⁶Kotema EJAKAIT Musa atiar,

¹⁷ “Lu kes ikiroria luka ituŋa luekorokoroetc akwap kanukus araun airumet: Eleasar esasedoti, ka Yosua okoku loka Nun.

¹⁸Ilemunete yesi ekapolon ediopet loka ŋiniteker akorokor akwap araun airumet.

¹⁹ Lu kes ikiroria luka ituŋa: loka ateker naka Yuda, Kaleb okoku loka Yepune.

²⁰ Loka ateker naka idwe luka Simeon, Semuel okoku loka Amikud.

²¹ Loka ateker naka Benyamin, Elidad okoku loka Cisilon.

²²Loka idwe luka Dan ekapolon, Buki okoku loka Yoguli.

²³ Loka idwe luka Yosep; loka ateker naka idwe luka Manase ekapolon, Kaniel okoku loka Epod:

²⁴loka ateker naka idwe luka Epuraim ekapolon, Kemuel okoku loka Sipitan.

²⁵Loka ateker naka idwe luka Sebulun ekapolon, Elisapan okoku loka Paranac.

²⁶Loka ateker naka idwe luka Isakar ekapolon, Palutiel okoku loka Asan.

²⁷Loka ateker naka idwe luka Aser ekapolon, Akikud okoku loka Selomi.

²⁸Loka ateker naka idwe luka Naputali ekapolon, Pedakel okoku loka Amikud.

²⁹ Ŋul kes luecorakini EJAKAIT akorokor airumet kanuka idwe luka Isirael kakwap naka Kanaan.”