Read Ateso Aimario 36 Bible Online

Aimario 36 - Ateso bible

Aimario 36

¹ Kikunyut ikapolok luka ikalia luka lukapapa luka ekek loka idwe luka Gilead, okoku loka Makir, okoku loka Manase, luka ikalia luka odwe luka Yosep, kinerata kakonyen nuka Musa ka ikapolok, kes ikapolok luka ikalia luka lukapapa luka idwe luka Isirael:

² Kobalas ebe, “Abu EJAKAIT kicorak ekajakait ainakin idwe luka Isirael akwap araun airumet kailamilam eroet: kicorak da EJAKAIT ekajakait ainakin airumet naka onacekosi Selopekad adweke.

³Arai kemanyata odwe luka atekerin ace nuka idwe luka Isirael kes, elemario do airumetekec kairumet naka lukapapakosi, imorikikinio airumet naka ateker naemanyario kes: kwaŋin elemario do koroet loka airumetekosi.

⁴ Kedol ekaru loka eyubili loka idwe luka Isirael, ŋes do imorikikinere airumetekec kairumet naka ateker naemanyario kes: kwaŋin elemario do airumetekec kairumet naka ateker naka lukapapakosi.”

⁵ Kicorak Musa idwe luka Isirael kwape ajaar akirot naka EJAKAIT, ebe, “Inera ateker naka odwe luka Yosep nuedolito.

⁶Na ŋes akirot naicorakinit EJAKAIT kanuka adwe nuka Selopekad, ebe, ‘Kodukokinos kesi luitojokito kesi; konye edukokinos lukokek loka ateker naka papakec.’

⁷ Kwaŋin mam airumet naka idwe luka Isirael eyaŋaario kateker adiopet ainakinio aceteker: naarai idoŋete idwe luka Isirael ŋinituŋanan airumet naka ateker naka lukapapake.

⁸ Ido ŋinipese naejai airumet kotoma ateker kere naka idwe luka Isirael, edukokini lokokek loka ateker naka papake, tetere irumete idwe luka Isirael ŋinituŋanan airumet naka lukapapake.

⁹Kwaŋin mam airumet eyaŋaario kateker adiopet ainakinio aceteker; naarai idoŋete atekerin nuka idwe luka Isirael ŋinidiopet airumeteke.”

¹⁰Kwape kicorakinia EJAKAIT Musa, kiswamata adwe nuka Selopekad kwaŋin:

¹¹ Naarai apotu Mala, ka Tirusa, ka Kogila, ka Milika, ka Noa, adwe nuka Selopekad, kodukonokinos odwe luka iinacan luka papakec.

¹²Apotu kodukonokinos okekia luka odwe luka Manase okoku loka Yosep, kosalak airumetekec ateker naka ekek loka papakec.

¹³ Ŋun kes aicorakineta ka itubesia luecorakini EJAKAIT idwe luka Isirael kama ka Musa, kapuutona nuka Moab kariri naka Yorodan koYeriko.