Read Ateso Aimario 4 Bible Online

Aimario 4 - Ateso bible

Aimario 4

²“Kimarasi odwe luka Kokat kotoma odwe luka Lebi, kwape ejaatar ikekiakec, kwape ejaatar ikalia luka lukapapaakec.

³ Ageun kaluka ikar akaisauni ka luedeparito aitodol luka ikar akaisakany, kere luekapakina aijaanakin, aswam kotoma owema loka airiamunun.

⁴ Na ŋes aswam naka odwe luka Kokat kotoma owema loka airiamunun, koboro lukalaunak cut;

⁵ Naitobwosere idukurun, elomari Aaron ka odweke toma, elacunete aigalisit naetiakit, erapakiniata ŋes asaduku naka aitejenunet.

⁶ Erapakinete da emukule loka etakas [2] kujuke, ido eburiarete kere kegoe lobululu, irupakinete adaketake.

⁷ Epesikinete egoe lobululu omesa loka imugatin luka aitodikin, idokokinete nen atuba ka akaalei ka atanya, ka aikopon nubukununet: ejaunete nen da imugatin ludue:

⁸Ido erapiarete kere kegoe lokareŋan, eburiarete bobo kemukule loka etakas, irupakinete da adaketake.

⁹ Elemunete egoe lobululu, aimukoria epir loka atala naka aica, ka atalaike, ka aridetake, ka aitudeŋetake, ka itidoike luka akinyet luetwasamaete kesi aijaanakinia:

¹⁰Eburiarete ŋes ka itidoike kere kemukule loka etakas, idokokinete adaketeke.

¹¹ Epesikinete egoe lobululu otem loka esabu, iburiarete bobo kemukule loka etakas, irupakinete da adaketake:

¹²Ibwaikinete iboro kere luetwasamaete aijaanakinia, luejaanakiniata kotoma aibois nakalaunan, toma ogoe lobululu, eburiarete da kere kemukule loka etakas, idokokinete da adaketeke.

¹³Emudarete ekurwon kotoma otem, epesikinete egoe lomuge:

¹⁴Idokokinete nen iboroke kere, luejaanakiniata ŋes, ieuman luka akim, ka igoluna luka akiriŋ, ka amudeta, ka atanyia, iboro kere luka etem; epesikinete da eimukoret loka emukule loka etakas, irupakinete da adaketake.

¹⁵ Kedaut Aaron ka odweke arapakin aibois nakalauian ka iboro kere lukotoma aibois nakalaunan, naedolio aitobwot iidukurun; akaulo kaŋun, epote odwe luka Kokat aidak ŋes: konye mam kes etirorete iboro lukalaunak kinyeis atwakare. Iboro ŋul kes luedakete odwe luka Kokat luka ewema loka airiamunun.

¹⁶ “Ido luidari Eleasar okoku loka Aaron esasedoti kes lu, akinyet naka atala, ka lukisupurununo, ka ainakinet naduc naka akiria, ka akinyet nakinyonyoanakina, idari da ewema lokalaunan ka lueja toma kere, aibois nakalaunan ka iboroke da.”

¹⁷Kotema EJAKAIT Musa ka Aaron atiar,

¹⁸“Sirikitiakasi ateker naka ikekia luka Ikokatin kotoma oLebin:

¹⁹ Konye kiswamak kes kwana, tetere eiarere kinyeis atwakare, kikunyakis neejaas iboro lukalaunak noi: elomari Aaron ka odweke toma, kosodete aitodianakin kes ŋinituŋanan akeswam ka ibore yenedaki:

²⁰ Konye mam elomarete toma aanyun iboro lukalaunak, nepecep da, kinyeis atwakare.”

²¹Kotema EJAKAIT Musa atiar,

²²“Kimar odwe luka Gereson da, kwape ejaatar ikalia luka lukapapaakec, kwape ejaatar ikekiakec;

²³ Imari kes ageun kaluka ikar akaisauni ka luedeparito aitodol luka ikar akaisakany; kere luekapakina aijaanakin, aswam. Kotoma owema loka airiamunun.

²⁴Na ŋes aswam naka ikekia luka Igeresonin, naijaanakiniata naedakiata da iboro:

²⁵ Edakete kesi aigalisio nuka ewema lokalaunan, ka ewema loka airiamunun, eimukoreteke, ka eimukoret loka emukule loka etakas loejai kujuke, ka aigalisit naka ekek loka ewema loka airiamunun;

²⁶Ka luikajaj alaro, ka aigalisit naka ekek loka erute loka alaro, naidunyas kewema lokalaunan, naidunyas da ketem kolukunite, ka aunoikec, ka iboro kere da lueupatar kaijaanakinikec, kere nuibusakinit aiswamakin kes, ŋupeŋun ijaanakinete.

²⁷Kwape icorakinia Aaron ka odweke kwaŋin ijaanakiniata odwe luka Igeresonin, kotoma kaluedakete kere, kotoma kaluiiaanakinete da; itodikinete kes luedakete kere.

²⁸Ŋin ŋes aswam naka ikekia luka odwe luka Igeresonin kotoma owema loka airiamunun: idarete kesi koanyanari Itamar okoku loka Aaron esasedoti.

²⁹“Ka odwe luka Merari da, imari ijo kes kwape ejaatar ikekiakec, kwape ejaatar ikalia luka lukapapaakec;

³⁰ Imari kes ageun kaluka ikar akaisauni ka luedeparito aitodol luka ikar akaisakany, ŋinituŋanan yenekapakina aijaanakin, aswam kotoma owema loka airiamunun.

³¹ Lu kes iboro luidarete kesi, kwape ejaar aswamukec kotoma owema loka airiamunun; abaoi nuka ewema lokalaunan, ka akitoke nukirionokina, ka ipirinoke ka aigaŋetakec;

³² Ka ipirino luka alaro naelukunit, ka aigaŋetakec, ka ikeceloin, ka aunoikec, ka iborokec kere lueupatar, ka luijaanakiniata; ibilete ikiroria luka iboro kere luidarete kesi ka luedakete.

³³Ŋin ŋes aswam naka ikekia luka odwe luka Merari, kwape ejaar aijaanakinikec kere kotoma owema loka airiamunun, koanyanari Itamar okoku loka Aaron esasedoti.”

³⁴ Kimarata Musa ka Aaron ka ikapolok luka ekodet odwe luka Ikokatin kwape ajaatar ikekiakec, kwape ajaatar ikalia luka lukapapaakec.

³⁵ Ageun kaluka ikar akaisauni ka luedeparito aitodol luka ikar akaisakany, ŋinituŋanan yenekapakina aijaanakin, aswam kotoma owema loka airiamunun.

³⁶Ŋul da luaponi kimarai kakesi kwape ajaatar ikekiakec emwaasi ilukumin iarei ka akwat akanykaarei ka akaisakany.

³⁷Ŋul kes luaponi kimarai luka ikekia luka Ikokatin, kere luapotu kijaanakis kotoma owema loka airiamunun, luemarete Musa ka Aaron kwape ajaar aicorakinet naka EJAKAIT kama ka Musa.

³⁸Ka ŋul da luaponi kimarai luka odwe luka Gereson, kwape ajaatar ikekiakec, kwape ajaatar ikalia luka lukapapaakec.

³⁹Ageun kaluka ikar akaisauni ka luedeparito aitodol luka ikar akaisakany, ŋinituŋanan yenekapakina aijaanakin, aswam kotoma owema loka airiamunun.

⁴⁰Ŋul luaponi kimarai kakesi, kwape ajaatar ikekiakec, kwape ajaatar ikalia luka lukapapaakec, emwaasi ilukumin iarei ka akwat akanykape ka akaisauni.

⁴¹Ŋul kes luaponi kimarai luka ikekia luka odwe luka Gereson, kere luapotu kijaanakis kotoma owema loka airiamunun, luemarete Musa ka Aaron kwape ajaar aicorakinet naka EJAKAIT.

⁴²Ka ŋul da luaponi kimarai luka ikekia luka odwe luka Merari, kwape ajaatar ikekiakec, kwape ajaatar ikalia luka lukapapaakec.

⁴³ Ageun kaluka ikar akaisauni ka luedeparito aitodol luka ikar akaisakany, ŋinituŋanan yenekapakina aijaanakin, aswam kotoma owema loka airiamunun.

⁴⁴Ŋul luaponi kimarai kakesi kwape ajaatar ikekiakec, emwaasi ilukumin iuni ka akwat aarei.

⁴⁵Ŋul kes luaponi kimarai luka ikekia luka odwe luka Merari, luemarete Musa ka Aaron kwape ajaar aicorakinet naka EJAKAIT, kama ka Musa.

⁴⁶Ŋul kere luaponi kimarai luka Ilebin, luemarete Musa ka Aaron ka ikapolok luka Isirael kwape ajaatar ikekiakec, kwape ajaatar ikalia luka lukapapaakec.

⁴⁷ Ageun kaluka ikar akaisauni ka luedeparito aitodol luka ikar akaisakany, ŋinituŋanan yenekapakina aswam naka aijaanakin, ka aswam naka aidak iboro kotoma owema loka airiamunun.

⁴⁸Ŋul luaponi kimarai kakesi, emwaasi ilukumin ikanykauni ka akwat akany ka akaisakanykauni.

⁴⁹ Kwape ajaar aicorakinet naka EJAKAIT aponi kimarai kes kama ka Musa, ŋinituŋanan kwape ajaar aijaanakinike, ido kwape ajaar aidakake: kwaŋin aponi kimarai, kwape kicorakinia EJAKAIT Musa.