Read Ateso Aimario 8 Bible Online

Aimario 8 - Ateso bible

Aimario 8

¹ Kotema EJAKAIT Musa atiar,

² “Kolimok Aaron ebe, Naisipokinia ijo atalai, atalai akanykaarei kes ecaete koiŋaren kepir loka atala.”

³Kiswama Aaron kwaŋin; kosipok atalai nen tetere ecaete koiŋaren kepir loka atala, kwape kicorakinia EJAKAIT Musa.

⁴ Eswamatai epir loka atala kwanata, esabu loerukuk; kwapuke kiton aturoke da korau aswam naerukuk: kwape ajaar aput naabu EJAKAIT kitodikinite Musa, kwaŋin kiswamau ŋesi epir loka atala.

⁵Kotema EJAKAIT Musa atiar,

⁶ “Kolem Ilebin kodwe luka Isirael, kitalau kes.

⁷ Ikonakini ijo neta aitalaun kes: ibwatakini kes akipi nuitesegaarete, kobarenoto da kes akuan kere, ido kilotata ikecenapen, kitalaunos bonik.

⁸ Kosodete ayaŋaar emoŋ lotobait, ka ainakineteke naka akiria, akiria nuidicic nuinyalakinitai akinyet, iyaŋaari ijo emoŋ lotobait ece araun ainakinet naka adiakaret.

⁹ Isukunyikini ijo Ilebin kiŋaren kewema loka airiamunun: itukonokini da ekodet kere loka idwe luka Isirael.

¹⁰ Isukunyikini Ilebin akonyen nuka EJAKAIT: idokonokinete idwe luka Isirael akecekanin oLebin:

¹¹Ŋanari Aaron Ilebin kakonyen nuka EJAKAIT araut ainakinet naiianio, kanuka idwe luka Isirael, tetere eraunete luiswamaete aijaanakin EJAKAIT.

¹² Idokonokinete Ilebin akecekanin akwes nuka imoŋin lutoba: iinakini ijo ediopet araun ainakinet naka adiakaret, ediopet da araun ainakinet naicweio mama ejai EJAKAIT, alucio Ilebin.

¹³Itobwoi Ilebin kakonyen nuka Aaron, kakonyen da nuka odweke, iinakini kes araut ainakinet naiianio mama ejai EJAKAIT.

¹⁴ Igituni kwaŋin Ilebin kodwe luka Isirael: eraunos do Ilebin lukaŋ

¹⁵ Ido akaulo kaŋun elomarete Ilebin toma aswam naka aijaanakin naka ewema loka airiamunun: italauni ijo kes, iinakini kes araut ainakinet naiianio.

¹⁶ Naarai einakina kesi cut mamakaŋ kodwe luka Isirael; ayanau kes mamakaŋ aibois naka ŋul kere luepukorete aliligeta, kes ikiyaik kere luka idwe luka Isirael.

¹⁷ Naarai ikiyaik kere luka idwe luka Isirael eraas lukaŋ, etuŋanan ka etiaŋ da: kapaaran naadanyia ikiyaik kere luka akwap nako Misiri abu ketalau kes kanukaŋ.

¹⁸Ayaŋa Ilebin aibois naka ikiyaik kere kotoma odwe luka Isirael.

¹⁹ Ido ainak Ilebin araut ainakinet mama ejai Aaron ka odweke kodwe luka Isirael, aijaanakin owema loka airiamunun kanuka idwe luka Isirael, alucio idwe luka Isirael: tetere mam atular ebunokini idwe luka Isirael, arai kikunyakis idwe luka Isirael die kaibois nakalaunan.”

²⁰Apotu Musa ka Aaron ka ekodet kere loka idwe luka Isirael kiswamakis Ilebin kwaŋin: kwape ajaatar kere nuecorakinit EJAKAIT Musa kanuka Ilebin, apotu idwe luka Isirael kiswamakis kes kwaŋin.

²¹ Kitesegaros Ilebin karonisikec, kilota da ikecenapen; koinak Aaron kes araut ainakinet naijaŋio kakonyen nuka EJAKAIT: ido koluc Aaron kes aitalaun kes.

²² Akaulo kaŋun kolomasi Ilebin toma aswam naka aijaanakin naka ewema loka airiamunun kakonyen nuka Aaron, kakonyen da nuka odweke: kwape ecorakinitor EJAKAIT Musa nuka Ilebin, kiswamakis kes kwaŋin.

²³Kotema EJAKAIT Musa atiar,

²⁴ “Nu kes akiro nuka Ilebin: ageun kaluka ikar akaisaarei ka lukany ka luedeparito, kes elomarete akapakin aijaanakin kaswam naka ewema loka airiamunun:

²⁵Ido kedolo ikar lukapoloukec akaisakany itasaŋete akapakina aswam, mam bobo ijaanakinete:

²⁶ Konye iŋarakinete iinacanakec kotoma owema loka airiamunun, aidar nuititinitai, konye mam ijaanakinete. Iswamakini ijo Ilebin kwaŋin kanuka nuititinitai.”