Read Ateso Nakum 3 Bible Online

Nakum 3 - Ateso bible

Nakum 3

¹Itukwi ijo ere loka aokot! Ileleba kere aiŋal ka luepoopootai; Mam enyounete lumejauna.

²Ecelet loka edaaset, Ka ecelet da loka airurum naka agalin; Ibalasin luidamaeacas, Agalin da nuesomanaros!

³Ekebwanenon loedoki, Ekileŋ loemwekimweki, ka akwara naimilia, Aipues da naka lueario, Ka atukot da naepol naka lukatwak, Mam edaununos atesin; Iguikinos atesinakec!

⁴ Naarai apoloor adoteu naka naadote naetemelel, Alopet ecudet, Naegwelari atekerin kanuka adoteuke, Ka ikekia kanuka ecudeteke.

⁵ Ebala EJAKAIT loka ajoresio ebe, Koany, aluikini eoŋ jo, Alaeari inapenekon kakonyenekon; Etodikini atekerin amujalalakon, Ka ajakanuto da ileicikon.

⁶Kacakakini jo luimodokokas, Etisili jo, Ebwaikini jo araun naesesenio kamenit.

⁷Kosodi kanen, kere lukisesenete jo Ekerete kamakon, Kobalas ebe, Esiliana Ninebe; Iŋai bo ibworo ŋes? Ai bo kamoikinia jo lukitalakarete?

⁸Ijok kereka ijo adepar No-amon, Naajai neajaas icorin, Nairimorito akip: Etutike ŋes aŋolol, Arwatatake da kerai aŋolol?

⁹ Keraas Etiopia ka Misiri agogoŋuke, Ŋin da namam enaŋi; Keraas Put ka Lubim da ikeŋarakinakakon.

¹⁰ Konye kijoreoritai ŋes, kikamaritai: Kipicipicitai ikedwe ludidik Kasisiarin nuka irotin; Apotu kilamalamata iroeta akoria isotiake, Koenitete iketuŋa kere lukapolok kirikoi.

¹¹Imerikin ijo da, ileleboi; Imoi ijo da abwas kanuka lokasurup.

¹² Eputokinos ireriakon kere luebwaitai Itinin luejaas araito nugeet: Arai kijaŋijaŋi, Edoununete aituk naka ikanyaman.

¹³ Koany, eraas ituŋakon kamakon aŋor; Eŋaara noi kolalak irutei luka akonikwap Mama ejaas lukasurupokon; Edopo akim atiketakon.

¹⁴Kirit akipi eriŋa kirigauna, Kitogogoŋ ireriakon luebwaitai: Kolot neejai elupe, kicak alupot, Kitiŋ atuba nasubet amatapalin.

¹⁵ Idopori jo akim kanen, Kijepi jo ekileŋ, Kidopori jo kwape enyede. Kipuaros kwape enyede, Kipuaros kwape emaase!

¹⁶Ibu kiyatak ikagwelanarakakon Adepar aacer nukokuju, Ebutori enyede, kosodi aporor.

¹⁷ Eputos lukon luitanapitai aboko kwape emaase, Ka ikewadikakakon kwape atukon nuka ibeerei, Luidukurete abwasin kapaaran naelilim, Konye kelom akoloŋ epororete, Aiboisikec da neajaas mam ejenun.

¹⁸ Ijotoete ikonikecokok, Ijo ekabaka loka Asuria; Iluranaros isotiakon, Isiarakinos ikonituŋa oroŋan, Emamei da yenetukokini kes.

¹⁹ Mam ariebokon ejoniar; Epol amusuŋutukon. Kere luiirarete eemutukon Kibapakinete jo akaninikec. Naarai iŋai yenimam edolokinit Aronisikon naduc?