Read Ateso Kabakuk 2 Bible Online

Kabakuk 2 - Ateso bible

Kabakuk 2

¹ Abwoi do eoŋ kaitelieisika, Adokari togo loeoj, Eteluori aanyun nuinera keoŋ, Ka nuaboŋokini nuka aŋuurianaka.

² Kaboŋok EJAKAIT eoŋ ebe: “Kiwadika aitapoet, kidelelei kamor, Tetere ekeri do yenesiomi.

³ Naarai eriŋa aitapoet ejai kanuka apak naeseikinitai, Ewonyari mama ejai esaŋe, mam iŋalai. Karaida kitumor, kidareu ŋes; Naarai abeit ebuni, mam iyapi.

⁴ Koany edakara aijarake, Mam itenara kotomake: Konye ebusi ikadoliton kanuka aiyuunike.

⁵ Eebo, ateni, ebino ŋes ekagwelanaran loemodi, Etuŋanan loiwoŋoono, lomam esalenenei ore; Loitalalaari eimielike bala Okatwak, Esubit bala atwanare, mam epedorio aimonikin, Konye etukonokini atekerin kere mamakeŋ, Etunakini ituŋa kere mamakeŋ.

⁶Mam lu kere itatamete awarag aluikin ŋes, agarac naikienatari ŋes, ebalasi ebe, “Itukwi ŋol loiyatakini lumere luke! Itodoli ai? Loigugunatoi kaititiŋeta!”

⁷Mam kereka kes enyounete katipet lukikonyete jo, Ekwenyunete lukitunyunyurikinete jo? Iraun do ijo loŋatunakec.

⁸Naarai iŋat ijo atekerin nuipu, Kiŋasete jo luedeunos kere luka ituŋa; Kanuka aokot nuka ituŋa, ka akaje naeswamakinio akwap, Naeswamakinio ere ka luiboiete kotoma kere.

⁹Itukwi ŋin yenedumakini etogoke ameda naerono, Tetere esipokini akaike neicelelei, Tetere itajario kakan naka aronis!

¹⁰Ineru nukileic abunokin etogokon, Naarai igela ijo atekerin nuipu; Idiaka kama ejai aijarakon.

¹¹Naarai emonyi amoru kotoma arwatat, Abao da kotoma akito eboŋokini ŋes.

¹²Itukwi ŋin yeneduki ere kaokot, Kiticat ere kanumam adolit!

¹³ Koany, mere naka EJAKAIT loka ajoresio Ituŋa aitaaritoi kanuka akim, Ka atekerin da agogoritoi kanuka aamameak?

¹⁴ Naarai ilelebun akwap aijen aibuses naka EJAKAIT, Kwape erapitotor akip aŋolol.

¹⁵Itukwi ŋin yenitamasi iidunyereke, Kosodi ainyalakin aisoritike, Kitemer ŋes da tetere eseseni amujalalakec!

¹⁶Ileleba ijo ileic itia aibuses. Komat ijo da, koraun bala yenimam ekepep. Kibelokin aikopo naka akan nakoteten naka EJAKAIT mamakon, Ejaunos ileic luimodokokas mama ejai aibusesukon.

¹⁷ Naarai kirapi jo akale nakiswamakin Lebanon, Kitukurian jo amudiar naka itiaŋ; Kanuka aokot nuka ituŋa, ka akaje nakiswamakin akwap, Ka ere, ka luiboiete da kotoma kere.

¹⁸Anyoin ameda kidumakini aput naegerer, Naegeria ekasubanike ŋes; Aput naecalara, ka ekesisianakinan aimod? Naarai emunokina ekasubanike akeswam, Naesubunia aputosia nuebaŋaaka.

¹⁹Itukwi ŋin yenetemari akito ebe, Kokweny; Amoru da naabaŋ ebe, Konyou! Isisianakini tope ŋin? Koany, iladaaritai kesabu ka epuesa, Emamei cut eiyeŋane kotomake.

²⁰Konye ejai EJAKAIT kotoma oyekaluke lokalaunan: Kililiŋ akwap kere kakonyeneke.