Read Ateso Sepania 3 Bible Online

Sepania 3 - Ateso bible

Sepania 3

¹Itukwi ŋol lokepali loemunauna, Ere loemwaŋana!

² Mam erimarit eporoto; Mam ecamunit alecorio; Mam emunokina EJAKAIT; Mam ikunyakinit Ekedeke.

³Ikapolokoke kokidiŋike kes iŋatunyo luegatas; Ikatubokoke kes ipeen luka eboŋ; Mam iteperorete ibore kiton tupuruc.

⁴ Inabinoke kes ituŋa luebenen luebilakinete ebotet: Amunaasi isasedotinike aibois nakalaunan, Eswamakis ekisil nuka akaje.

⁵ Edolit EJAKAIT kokidiŋike; Mam iswamaenenei cut numam adolit; Isideleleuni eketube ŋinitupuruc. Mam ekurwori; Konye lumam edolito mam ejenete aileicikin.

⁶“Abu eoŋ kagela atekerin; Asiŋoros itogoikec lukagogoŋok; Etisil irotinikec, komamei yenitori; Amudiaros ireriakec, tape emamei ituŋanan, Emamei yeniboie kotoma.

⁷ Kabala ebe, ‘Abeit kayoŋi eoŋ, Ecamuni alecorio; Kinyek aiboisike agelario, Kwape ajaatar kere nuaseu kanuke.’ Konye kodilokis anyoun kitobosata aswamisiokec kere.”

⁸ Kanuka ŋun ebala EJAKAIT ebe, “Kidareutu yesi eoŋ, Aitodol apaaran naanyounio amejaun, Naarai apeleikinit atukonokin atekerin, Ainotun ajakanuto, Abukokin kes aisiopoka, Akanyunyura kere naededeŋ; Naarai idoporio akwapin kere kakim naka ekoloka.

⁹“Naarai kapak kaŋin ebelokini do einere loka atekerin Araun einere loesegara, Tetere iworoete kere ekiror loka EJAKAIT, Ka aijaanakin da ŋes ketau ediopet.

¹⁰ Anyoun kokekwa juwai kocorin luka Etiopia, Eyaunete ikeŋaiŋaakaka, Apese naka luisiarisiaraka, ainakineteka.

¹¹ “Kapaaran kaŋin mam kileicikin kanuka aswamisiokon kere, Nuibuearit kamakaŋ; Naarai alemari kokidiŋikus luituros luiwoŋooko, Mam bobo ipoga koroŋataka lokalaunan.

¹² Konye enyeini kokidiŋikon ituŋa lueroikinitoi lukican, Emunosi kesi ekiror loka EJAKAIT.

¹³ Mam aatoŋot naka Isirael iswamai numam adolit, Karaida einer nuka aisab; Karaida mam edumuna aŋajepa nuka aiŋal aitukekec: Naarai enyamete eperete, Emameun da yenitukuriani kes.”

¹⁴ Koye, ijo akoku naka Sion, Kibwoŋ, ijo Isirael! Kiyalama, kolakara ketau kere, Ijo akoku naka Yerusalem!

¹⁵ Alema EJAKAIT itubesiakon, Ereŋea lokasurupikon. Ekabaka loka Isirael, Ŋes EJAKAIT, Ejai kidiŋikon: Mam bobo ikurianar aronis.

¹⁶ Kapaaran kaŋin elimokinio Yerusalem ebe, “Sirikikurianar, ijo Sion, Kinyeis akonikanin aleiekekar.

¹⁷Ejai EJAKAIT Ekonideke kidiŋikon, Lokirigi loitajari: Iyalamikini ŋesi kanukon kailel; Iyeŋi ŋesi kaminake, Elakari kayoore kanukon.”

¹⁸ Kwape kapaaran naka atukonokin nakalaunan, “Alemari abili kamakus, Tetere mam idumunete amorosit kanuke.

¹⁹Koany, kapak kaŋin Eswamakini eoŋ ŋul kere lukiroikinito jo; Etajari ŋin naicodo, Etukonokini ŋin naereŋearitai: Etuluori ikeceleic araun aiturit ka ekiror, Kakwapin kere.”

²⁰ Ebala EJAKAIT ebe, “Kapak kaŋin kesukunyikini yes, Kapak kaŋin da atukonokini yes: Naarai ketuluori yes ekiror ka aiturit Kotuŋasinei kere luka akwap, Nakenyakunia kaijoreoriokus kakonyenekus.”