Read Ateso Kagai 1 Bible Online

Kagai 1 - Ateso bible

Kagai 1

¹ Kokaru lokiareit loka ekabaka Dario, kolap lokikanyetekape, kapaaran nasodit naka elap, kobu akirot naka EJAKAIT mama ejai Kagai enabi, ka Serubabel okoku loka Sealutiel, ekayaiton loka Yuda, ka Yosua okoku loka Yekosadak, esasedoti lopeti, ebe,

²“Inera EJAKAIT loka ajoresio kwanata ebe: Ebalas ituŋa lu ebe, Eroko apak naduket etogo loka EJAKAIT edolo.”

³ Kosodi kobu akirot naka EJAKAIT mama ejai Kagai enabi ebe,

⁴“Erai kereka na apak naiboioto yesi kotogoikus luitubusitai, kwabo asilior etogo lo?

⁵Aso do inera EJAKAIT loka ajoresio kwanata ebe: Koomoomata ikusiponesio.

⁶Ipotu koyeata luipu, isakete luikidioko; inyamete konye mam imonikinos; imasete, konye mam numatan kiupete; inapitos igoen, konye emamei yenemwana; ŋin yenedumununei eropit, edumununei eropit aibwaikin oriagi loepedopedo.

⁷“Inera EJAKAIT loka ajoresio kwanata ebe: Koomoomata ikusiponesio.

⁸Ebala EJAKAIT ebe, Kodokasi oroŋat, koyaut akito, kodukoto etogo; eoŋ da esiyalamikini ŋes, ketubusikinere.

⁹Ipotu koomito adumun luipu, ido keany, koraunos luikidioko; naiyauniata kes ore, abu kakuta. Ebala EJAKAIT loka ajoresio ebe, Kanukinyo? Kanuka ekatogo loasilior, kwabo ikerete yesi ŋinituŋanan togoke.

¹⁰ Kanuka ŋun etikoki akuj akopyo, etikoki da akwap akeraito kanukus.

¹¹ Abu kanyarak akamu toma akwap, ka iroŋan, ka akima, ka ebino, ka akinyet, ka lueraete kalup, ka ituŋa, ka ibaren, ka aitaaritoi da kere naka akanin.”

¹² Kosodi Serubabel okoku loka Sealutiel, ka Yosua okoku loka Yekosadak, esasedoti lopeti, ka luedeuna kotuŋa, arimar eporoto loka EJAKAIT Ekecedeke, ka akiro nuka Kagai enabi, kwape abu EJAKAIT Ekecedeke kijukaria ŋes; koyoŋata ituŋa EJAKAIT.

¹³ Kosodi Kagai, ekiyakia loka EJAKAIT atemar kakirot naka EJAKAIT mama ejaas ituŋa atiar, “Ebala EJAKAIT ebe, Ajai eoŋ kayes.”

¹⁴ Kisidik EJAKAIT emoyo loka Serubabel okoku loka Sealutiel, ekayaiton loka Yuda, ka emoyo loka Yosua okoku loka Yekosadak, esasedoti lopeti, ka imoyon da luka luedeuna kere kotuŋa; kopotu kiswamata aswam kotogo loka EJAKAIT loka ajoresio, Ekecedeke,

¹⁵kapaaran naka akaisaarei ka nuoŋon naka elap, kolap lokikanyetekape.