Read Ateso Sekaria 12 Bible Online

Sekaria 12 - Ateso bible

Sekaria 12

¹ Akirot naka EJAKAIT naka Isirael. Inera EJAKAIT lokepesikini akuj, lokepesi da apetetait naka akwap, lokesubi emoyo loka ituŋanan kotomake, ebe:

²“Koany, etuluor Yerusalem aikopo naka aigetigeta mama ejaas ituŋa kere luirimorito; ejaun mama ejai Yuda da kotoma airigaunio naka Yerusalem.

³ Kosodi kanen, kapaaran kaŋin, etuluori Yerusalem amoru naelaŋir noi mama ejaas ituŋa kere; ŋul kere luedakete ŋes imusuŋanakinos noi. Etukonokinos atekerin kere nuka akwap asurokin ŋes.

⁴ Ebala EJAKAIT ebe, Kapaaran kaŋin, esuumokini ŋolibalasit, esikeripikini ekebwanenonike. Konye esesenete akakonye ekek loka Yuda, naetumudakia ŋolibalasit loka ituŋa.

⁵Etemarete ijaka luka Yuda kotauonokec ebe, ‘Luiboiete ko Yerusalem kes akagogoŋ kotoma EJAKAIT loka ajoresio Ekecedeke.’

⁶“Kapaaran kaŋin etusubi ijaka luka Yuda bala atido naka akim kotoma akito, ido bala akalas naka akim kotoma oisutan; idoporete ituŋa kere airimor, kakan nakoteten ka nakokediany da; eriŋa bobo iboie Yerusalem kaiboisike, ŋes Yerusalem.

⁷ “Isiauni EJAKAIT aitajar iweman luka Yuda, tetere mam itopolooritai aibuses naka ekek loka Daudi ka aibuses naka luiboiete koYerusalem adepar Yuda.

⁸ Kapaaran kaŋin eiikini EJAKAIT luiboiete koYerusalem; ŋin da yenikalanyana kakesi kapaaran kaŋin eraun kwape Daudi; ekek da loka Daudi eraun kwape Edeke, kwape emalaika loka EJAKAIT kakonyenekec.

⁹Kosodi kanen kapaaran kaŋin amoi eoŋ amudiar atekerin kere nuepote asurokin Yerusalem.

¹⁰ “Abukokini ekek loka Daudi, ka luiboiete koYerusalem, emoyo loka asianut ka loka aiŋaiŋa; esesenete ŋol loapotu kicumata: ibworos ŋes, kwape ibworor ituŋanan okokuke loteluna, ekuudiani ŋes, kwape yenekuudiani ekiyaike.

¹¹ Kapaaran kaŋin ejaun aibworo naepol ko Yerusalem, kwape aibworo naka Kadad-rimon kaditot naka Megidon.

¹²Ibworos lukakwap, ŋolikek kowaike; ekek loka etogo loka Daudi kowaike, ka akeceŋor kowaikec; ekek loka etogo loka Natan kowaike, ka akeceŋor da kowaikec;

¹³ekek loka etogo loka Lebi kowaike, ka akeceŋor kowaikec; ekek loka Isimein kowaike, ka akeceŋor kowaikec;

¹⁴ikekia kere luedeunos, ŋolikek kowaike, ka akeceŋor da kowaikec.