Read Ateso Sekaria 13 Bible Online

Sekaria 13 - Ateso bible

Sekaria 13

¹ “Kapaaran kaŋin epukorio atan mama ejai ekek loka Daudi, ka luiboiete ko Yerusalem, aitalaunia kes karonis ka amamus aila.

² “Kosodi kanen kapaaran kaŋin ebala EJAKAIT loka ajoresio ebe, Amudiari ikiroria luka aputosia kakwap, mam bobo iitunio: etonyouni da inabi ka emoyo loerono alemar kakwap.

³ Kosodi kanen, arai ketakanu bobo ituŋanan edwari, kosodi papake ka totoke luauruunete ŋes atemar ŋes atiar, ‘Mam ijari; naarai inera ijo nukaiŋal kokiror loka EJAKAIT.’ Icumete ŋes papake ka totoke luauruunete ŋes naedwaria.

⁴Kosodi kanen kapaaran kaŋin, ileicikinete inabin, ŋolituŋanan aitapoeteke, naedwaria; mam enapete da elou lokajul aiŋalaa;

⁵konye etemari atiar, ‘Mam eoŋ arai enabi, arai ekakorion akwap; naarai alup kes akairumet ameun keiditeuka.’

⁶Arai kiŋit ŋes idio atiar, ‘Anyoika amusuŋun ŋun kopurakon?’ Kosodi ŋesi aboŋokin ebe, ‘Ŋun kes amusuŋ nukemusuŋio kotogo loka ipaperoka.’ ”

⁷ Ebala EJAKAIT loka ajoresio ebe, “Kokweny, ijo ekileŋ, asurokin ekecokonika, Asurokin da etuŋanan epadicika: Kosen ekecokon, kisiarakinos amerekekin; Ebelokini akakan mama ejaas ludidik.

⁸ Kosodi kanen ebala EJAKAIT ebe, Kakwap kaŋin kere, egelario atutubeta aarei nukotomake, etwakete; Konye kinyeinai atutubet nakiwuniet nakotomake ejari.

⁹ Etotori atutubet ŋin nakiwuniet akim, Eliliauni kes kwape eliliauna epuesa, Etemi kes kwape itemere esabu. Iwoneete ekakiror, eirari kes. Kabala ebe, ‘Eraas ikatuŋa’, Kes da ebalasi ebe, ‘Erai EJAKAIT Ekadeke.’ ”