Read Ateso Sekaria 14 Bible Online

Sekaria 14 - Ateso bible

Sekaria 14

¹Koany, ebunit apaaran naka EJAKAIT, naekorokoroere lunatarakon kokidiŋikon.

² Naarai atukonokini atekerin kere asurokin Yerusalem aitijie; irumio ere, eŋatario itogoi, aŋor da emunaario: ijoreorio atutubet naka ere, konye luideunos luka ituŋa mam egelario kore.

³Kosodi konyet elomari EJAKAIT, aitiji atekerin ŋun, kwape kejior kapaaran naka ejie.

⁴ Kapaaran kaŋin ebwoete akekejen komoru loka Iseitunin, loitei Yerusalem kari nakokide; ecila emoru loka Iseitunin kokidiŋike kari nakoto ka ari da nakokide, ejaun aditot naepol noi; enyoun atutubet naka emoru aibe ari naka agolitomei, ka atutubeteke ace aibe ari naka eŋalakimak.

⁵ Ikerete yesi da kaditot naka iroŋanaka, naarai edoli aditot naka iroŋan Asel: eebo, ikerete, kwape ikeriata anyoun kamaran naka akwap kapaarasia nuka Usia ekabaka loka Yuda. Kosodi kanen ebuni EJAKAIT Ekadeke, ka lukalaunak kere nepepe kaŋes.

⁶Kosodi kanen kapaaran kaŋin, mam ejaun aica kaimiliaun karaida amuton:

⁷ konye eraun apaaran adiopet naejeni EJAKAIT; mere apaaran, mere kuare da: konye kanen do ejaun aica eboŋ.

⁸ Kosodi kanen kapaaran kaŋin, elelearete akipi nukajarak anyoun ko Yerusalem; atutubetekec ebeete aŋolol nakokide, atutubetekec da ebeete aŋolol nakoto: ejaunete kamu, ka aiporo da.

⁹ Eraun EJAKAIT ekabaka loka akwap kere: kapaaran kaŋin eraun EJAKAIT ediopet, ekekiror da ediopet.

¹⁰ Ituluorio akwap kere apuuton, anyoun koGeba kiton Rimon kari naka eŋalakimak naka Yerusalem. Konye esali Yerusalem, icelelei kaiboisike, anyoun korute loka Benyamin kiton aibois naka erute losodit, kiton orute loka Agor anyoun da kotogo loeoja loka Kananel kiton acueta nuka ekabaka.

¹¹ Iboiete ituŋa da kotoma, mam bobo ekenit; konye iboie Yerusalem iyamakina.

¹²Na ŋes atular naedanyia EJAKAIT ituŋa kere luetijiete Yerusalem: ebosi akecekiriŋ eriŋa ebwoete, ebosikinete akecekonye toma adokocokec, ebosikinete aŋajepakec toma aitukekec.

¹³ Kosodi kanen kapaaran kaŋin, ejaun aiticanio naebuni kama ejai EJAKAIT mamakec; ikamuni ŋinituŋanan akan naka ikeidunyet, ikeuni da akekan asurokin akan naka ikeidunyet.

¹⁴Yuda da itijiei Yerusalem. Etukonokinio abar naka atekerin kere nuirimorito, esabu ka epuesa, ka anapito, luipu noi noi.

¹⁵Edoikini da atular kwape atular ŋin obalasin, onyubun, akaalai, asigiria, ka otiaŋ da kere luejaunos oidukurun ŋul.

¹⁶ Kosodi kanen elosenenei ŋinituŋanan yenideun katekerin kere nuapotu koloto asurokin Yerusalem, elosenenei ŋesi ŋolikaru aima Ekabaka, EJAKAIT loka ajoresio, ido idari ŋesi epucit loka iswamin.

¹⁷ Ejaun do ebe ŋin yenika ikekia kere luka akwap yenimam elosi Yerusalem aima Ekabaka, EJAKAIT loka ajoresio, mam akiru etepakini kes.

¹⁸Arai da mam ekek loko Misiri elosi, aitodiar bon, kosodi edoikini atular mamakec, naedanyia EJAKAIT atekerin numam elosete aidar epucit loka iswamin.

¹⁹Ŋin ŋes eraun aiticanet naka Misiri, ŋes aiticanet da naka atekerin kere numam elosete aidar epucit loka iswamin.

²⁰Kapaaran kaŋin egirir kocirin luka ibalasin ebe, “Yenikalaunan yenika EJAKAIT.” Eputokinos da amoti nukotoma otogo loka EJAKAIT, kwape atanya nukoiŋaren ketem.

²¹ Eebo, eraun ŋinimot koYerusalem ka Yuda nakalaunan mama ejai EJAKAIT loka ajoresio: ŋul kere da lueinakinete asuban epote eyaŋaarete kes, ipoete akiriŋ naka asubanit kotoma. Kapaaran kaŋin da emameun bobo ekagwelanaran kotogo loka EJAKAIT loka ajoresio.