Read Ateso Sekaria 3 Bible Online

Sekaria 3 - Ateso bible

Sekaria 3

¹ Abu ŋesi ketodik eoŋ Yosua esasedoti lopeti, ebwoi kakonyen nuka emalaika loka EJAKAIT, ebwoi Satan da kakekan nakoteten araun loka surupike.

² Kotema EJAKAIT Satan atiar, “Kitoron EJAKAIT jo, Satan! Eebo, EJAKAIT loabu koseu Yerusalem kitoron jo! Mere lo akalas naalemuna kakim?”

³ Konapit Yosua inapen lumodok, ebwoi kakonyen nuka emalaika.

⁴ Koboŋok, kolimok ŋul luebwoete kakonyeneke ebe, “Kolacak ŋes inapen lumodok.” Kotema ŋes atiar, “Koany, alaca numam edolitokon kamakon, ketanapi do jo igoen luejokuka cut.”

⁵ Kabala ebe, “Kitanapikis ŋes egoe loelai lokieniena akouke.” Kitanapikis ca egoe loelai lokieniena akouke, kitanap da inapen; kobwo emalaika loka EJAKAIT kodieke.

⁶Kitogogoŋ emalaika mama ejai Yosua kobala ebe,

⁷ “Inera kwanata EJAKAIT loka ajoresio ebe: Arai ilosenenei korotinika, arai da iricit aicorakineteka, ŋes konyet itubokinia ekatogo, idari da alaroika, kainakini eoŋ jo aibois alomunun nepepe kaŋul luebwoete kodie.

⁸ Kopup bo ijo, Yosua, esasedoti lopeti, ijo ka ipaupakon luiboiete kakonyenekon; naarai kes ituŋa lueraas aanyunet; naarai koany, etolomikini ekakejaanakinan Atenut.

⁹ Naarai koany, amoru naebwaikinit kakonyen nuka Yosua; ejaas akonye akanykaarei kamoru: koany, ebala EJAKAIT loka ajoresio ebe, Egirakini emacareteke, alemari da numam adolit naka akwap kana kadiopepaaran.

¹⁰ Ebala EJAKAIT loka ajoresio ebe, Kapaaran kaŋin inyaraunete yesi ŋinituŋanan ekeidunyet kwap kemusabibuke ido kwap ketinike.”